La'isasikhe 10 - ALLAH ANE WENW KET MEKE WAROGO WOKNINAKHIKHE WENE

Kornelius nen Petrus ayoko 'bisikhemo, oba wageikhesik hagakhikhe wene

¹ O Kaisarea etoma ap opaki doalek tentara meke etaga ap Italia opaki doalek iluk ekhe lagoukha meke ap ageikhe inoe kok meke etaga Kornelius welageikhe.

² At ebe men, a'buri men, Allah ayukhogon dogolik hogorakhe lagoukha. Hogorakhe dogolik it akhuni Yahudi meke emenogo aperek inameke dek meke kokhogon yomageisekhe dogolik, sembayan huk ageidek isi motok welageikhe.

³ Itithogon isi motok dogolik, iki ageikhe baga, o mo korok i laga korlek, jam 3 hakene, a'bikaka men hasikhe. Malaikat Allah nen yoko usa'isa agarek meke emenogo ageikhe usa'ageikhesik Kornelius oba ukisikhesik nen, “Kornelius,” iluk anek hakhasikhe.

⁴ Ane hakhasinem, at Kornelius ileken at oba tek-tek 'birogo dogolik, ayuk ageikhesik nen, “I, noe. Nenaluk,” iluk isikhemo, at nen he, “Dek o. Hat sembayan igik, akhuni inameke dek meke yomageisigik, hagakhe lagan iti nen, Allah ilu agasik hoba eberek werek o.

⁵ O yogotak o Yope etoma ap ageikhe opakiat meke etaga pere. Ageikhe Simon igik, ageikhe Petrus igik, iliogei meke etnaga wisuagaluk, ap ageikhe at ayoko la'isano o.

⁶ At ebe ap huso wagasik nen, ap Simon 'bagei oado sapi oado karogo pugutdekherek meke etnaga aila i laut kok yekelekma alilu etoma werek o,” iluk yogokhikhe.

⁷ Arat yogotluk nen, malaikat Allah nen yoko usa'isa agarek meke etnogo dukhisikhesik dageisikhemo, at Kornelius nen, atuaneke uma welageikharek meke inebe pere men, ap ageikhe ebe tentara, ekeragun meke Allah ebe hogorakhe dogolik Kornelius wolok nekhe lageikhe meke iti men, waisasikhe.

⁸ Waisasikhesik la'isagaluk hagakhe dogolik, wene a'bikaka hasikhe wene etnogo yogeisalok nen, o Yope la'isasikhe.

⁹ La'isasikhemo, it etnogo hubenke holagarlem lagoukhasik o Yope horogat ukuogoluk laga korlek, at Petrus etnogo dikene jam 12 sembayan igiluk o warleke thabia talekma dagegarekma dageisikhe.

¹⁰ Dageisikhesik sembayan isi dogolik, hipiri abu ageikhemo, akhuni aperek nen hipiri noagaluk uma aban werakhe korlek, a'bikaka men hasikhe.

¹¹ Pogot hialogo, su kain hakene kok meke ukut 4 ugu meke kilogo agat oba usa'i agunem ileken hasikhe.

¹² Su kain iti akla, agat oba welagarek meke, yi wam ti wam, yi warlo ti warlo inom, pogot obake hitluk nekherek meke, yi thue ti thue inom, tha'bokhogonat ukharlek welageikhe.

¹³ Werekma Allah nen tha ane heat yogokhe dogolik, “Petrus. Hebe melatluk nen ethoma warogo nan o,” iluk yogokhikhe.

¹⁴ Itithogon yogokhikhemo, at Petrus nen, “Dek o. Noe. An usa meke men, yoalhidek welagarek meke men, 'bugurlagat halok nikidegat welagarek,” iluk yogokhikhe.

¹⁵ Itithogon yogokhikhemo, ane etnogo nen yogokhikhesik, ageikhe yabokane yogokhe dogolik, “Allah nen, Hano nausak, iluk ekhe halok, hat nen, Usa, nausak dek, iluk hakla apugun o,” iluk yogokhikhe.

¹⁶ Iki pere baga itithogon yogokhikhesik, ageikhe yogotluk nen, kain etnogo pogot oba nen lisogo waganhikhemo apuke dageisikhe.

¹⁷ Dageisikhemo at Petrus nen, “Na'bikaka higi iti ebe nena meke heat,” iluk obakha palageikhesik akla ebekho werekma, it ap Kornelius nen la'isasikhe meke emenogo lagoukhasik, akhuni aperek yogeisekhe dogolik, “Simon aila ki,” iluk hinok waganhukhama, it nen, “Aila ithi,” iluk isukhama, holagape baga arat ukisukha.

¹⁸ Ukisukhasik inane uma kola'isukhama, inebe dukhisukhama men yogeisasukha, “Ap huso meke etaga Simon Petrus etnaga ebe yoma wagasik hinom welagap a? Dek a,” iluk hinok waganhukha.

¹⁹ Hinok waganhunem, at Petrus etnogo a'bikaka hasikhe meke etnogo, “Ebe nena meke higi,” iluk akla ebekhoat werekma, Allah Agoreke nen, “Ap inebe henagan meke herakhabik wageikhasik werek o.

²⁰ Halok he, hat hebe metokhogon usalok, it iti an nenat la'isa ageima wageikha iti nen, Ninom lausak erlok dek, iluk, hakla wene munini ebekhidek hinom lano,” iluk yogokhikhe.

²¹ Yogokhikhemo, at Petrus inoba usasikhesik nen, men yogeisasikhe, “Nebe heraknabik wagap iti, an nebe yi o. Hit nikithogon nen wagap,” iluk yogeisasikhe.

²² Itithogon yogeisasikhemo, it nen, “Ap tentara meke opaki doalharek meke inoe kok etaga Kornelius, iti nen la'inani agama wago. At iti obabut mothogon hagakhik, Allah ebe ayukhogo welageik, hagakherek iluk, it akhuni Yahudi meke tha'bokhogonat nen obabut palharethek nen, itithogonat abok hano egarek. At iti itithogonat hagakhunem, malaikat Allah nen yoko usa'isa agarek meke emenogo ageikhe nen, Petrus iti nen wene hat hasuk holusak meke yokhesigin werek o, iluk hat hayoko la'inani isuagaluk yogokhemo, at nen la'inani agama hoba wago o,” iluk yogokhukha.

²³ Itithogon yogokhukhama, at nen, “Halok he, an ninom noge uok nen, ukitni,” iluk yogeisasikhe. Yogeisasikhemo noge iluk nen, hubuluke iniluk atluk nen, it Allah a'buri o Yope etoma meke inomat wagoukha.

²⁴ Waga dogolik, holagarlem iniki opakiat noge iluk nen, o Kaisarea wagoukha. Waga korlek, at Kornelius inelokhoma dogolik, at ougi agarumi men, at agarlak lak erugi at inom ekayo meke men, inayoko 'bisikhemo, tha'bokhogonat natogokhukhasik werekma wagoukha.

²⁵ Wagoukhasik nen, at Petrus ebe uma ukigiluk hagakhunem, at Kornelius nen at ebe waganhikhesik itibagal yukukhogon Petrus apma thoma iluk hogorakhikhe.

²⁶ Itithogon hogorakhikhe mekeat he, at Petrus nen, “Dek o. Noe. Melasin. An nebe akhuni mekeatma, itithogon hogotnabusak dek o,” iluk iki hago meldisikhe.

²⁷ Meldisikhesik nen, ipisagat wenekak ilik-ilik uma ukisukhasik, akhuni doalegat natogosi agoukhasik werekma at Petrus ileken hisasikhe.

²⁸ Ileken hisilik, men yogeisasikhe, “Nit akhuni Yahudi meke hit akhuni itikmanke meke ninom hunikhik, nit hinoba ukigik, hagasusak dek iluk, wene palek welagarek iti hinilu. Itithogon meke re, at Allah nen, Akhuni aperek meke iti, inom dogosak usa maga, iluk hagasusak dek o, iluk yakulnekhemo,

²⁹ hit nen nayoko la'isegep na'it igidegat wagei o. Wagei meke re, wene ageikhe hinok wokhisak. Wene ebe nikithogon nen nayoko la'isegep,” iluk yogeisasikhe.

³⁰ Itithogon yogeisasikhemo, at Kornelius nen, “Uahe mo korok i laga korlek, jam 3 baga o yigirlinemat an sembayan naila igi.

³¹ Sembayan itithogon isinem, ap ageikhe asu a'bi'bal weak ugu meke an nilhanemat melasi usa'aga. Melasi usa'agasik nen, Kornelius. Hat sembayan egetek iti, Allah asuk holhemo. Nen, akhuni inameke dek meke yomageisekhethek iti, Allah nen hoba eberek weregat o.

³² O Yope etoma ap etaga Simon Petrus ayoko loak nen ap ageikhe la'isan o. At ebe, ap huso mekeat wagasik nen, ap etaga Simon, 'bagei oado sapi oado karogo pugurakherek meke etnaga aila i laut kok yekelekma aik oba etoma werek etnaga o, iluk yoknekhe.

³³ Iti nenat, an niki ageikhe welageidegat, ap ageikhe hayoko hoba la'isigima, hat hobabut hano nen huk ageidek hano wagan, noe. Nit tha'bokhogonat yogotak Allah il oba welago yoma re, ninoe Etagapogot nen, Wene yogeisano, iluk yokhekhe meke, wene iti tha'bokhogonat ninasuk holuogoluk welago, noe,” iluk yogokhikhe.

At Petrus nen wene yogeisasikhe wene

³⁴ At Petrus nen wene erlo baga nen yogeisekhe dogolik, “At Allah obabut, akhuni inoado baga anek ileken hisalok, aperek elokhoma 'bisigik, aperek oporlike 'bisigik, hagakherek dek, iluk yogotak nen hutdigi.

³⁵ Akhuni inukuloak etaga ya meke ta meke at ebe inayuk dogolik inobabut mothogon hagakharek meke woginakherek anek higi o.

³⁶ Meke re, nit akhuni tha'bokhogonat ninoe Etagapogot Yesus Kristus nen dapukhogon 'binanuagaluk, wene hano wene iti, ebe nit akhuni Yahudi meke ninoba la'i ageikhe iti hinilu o.

^37-38 Wene ebe hagatlageikhe iti, at Yohanes nen ima usa'inakhe dogolik, wene ima usa'inakharek wene iti yogeisekhe lageikhesikmo nen, at Yesus ai Nazaret meke iti, Allah nen Agoreke oba usa'i ageik, obatne wogokhik, hagakhikhesik, ipisak welageikhe iti nen, alebageik o Galilea eloke etoma nen, o akhuni Yahudi meke inai yi ai ti ai etoma laga dogolik, yi meke ti meke hanorogo hagakhik, it aperek Iblis nen a'bethogon hagasik welageikhe meke hano hagarinakhik, hagarik nekhe lageikhe iti hiniluat o.

³⁹ Akhuni Yahudi meke inaila o yi ai ti ai etoma inom, o kota Yerusalem halekma etoma inom, nekhe dogolik, tha'bokhogonat hagakhe lageikhe meke iti, nit ninileken hasugu. Itithogon mekeat, at ebe o baga meldiluk wakhukha iti.

⁴⁰ Itithogon wakhukha mekeat he, iki pere warek werekma, iki ageikhe baga, Allah nen ilugutdisikhesik nen, ebe akhuni nen inileken hoagaluk winametdisikhe iti.

⁴¹ Itithogon winametdisikhe mekeat he akhuni tha'bokhogonat inileken higidek. Alebat at Allah nen, It inebe etaat inileken hoak o, iluk wenakninakhikhe meke anek, at Yesus ebe warek werekma Allah nen ilugutdisikhemo, nit at ebe ninom dogolik hipiri men, i men, ninomat nasugu.

⁴² Itithogon hagakhe dogolik, nit nen akhuni wene yogeisilik laga dogolik, Akhuni tha'bokhogonat, watlagoukha meke men, iniluk werek meke men, ukum inoba 'bigik, kokhik, hagasuagaluk, Allah nen Yesus at meldisikhe, iluk, hutukhogon yogeisilik laga dogoagaluk ninayoko 'bisikhe.

⁴³ At Yesus hasik, it ap Allah ane yogeisekhe lagoukha meke emenogo tha'bokhogonat nen, abok ekhe dogolik, men isukha, At ebe wagunem he, it akhuni weak hagakharek meke inetaiken at oba hakotdugun meke inebe dopok, it weak hagariogei meke iti, at Allah nen at Yesus etaga baga thagalogo degetdisagein o, iluk yogeisekhe lagoukha,” iluk at Petrus nen yogeisasikhe.

Akhuni itikman meke Allah nen Agoreke wogeisasikhe wene

⁴⁴ At Petrus nen wene iti aban yogeisekho werekma, Allah Agoreke it akhuni wene iti inasuk holhe lagoukha meke emenogo inebe tha'bokhogonat inoba duk usa'ageikhe.

^45-46 Itithogon usa'ageikhemo, it akhuni Yahudi meke wene eberogonat iluk waganhukha meke Petrus inom o Yope nen wagoukhasik werekma, Allah nen Agoreke itithogon it inoba usa'i ageikhemo, horlasukhasik, wene it ninat meke inane inokodek meke baga elalinat igik, Allah hogorakhik, hagakhunem, inileken higik, inasuk holhik, hagakhukhasik nen, men isukha, “Allah nen Agoreke it akhuni itikmanke meke erlogat wogeisekhemo higi. Nayuk e,” iluk hogorakhukha. Itithogon hogorakhukhama, at Petrus nen, men yogeisasikhe,

⁴⁷ “Lakhani. It yi Allah Agoreke nit woknisasikhe iti hagat, it wogeisekhemo horlega iti. Halok he, tha nen, It ima usageinabusak dek, iluk wene palusak apegep. Erlok usageinabusagat o,”

⁴⁸ iluk yogeisasikhesik, Yesus Kristus etaga palogo ima usa'inabuagaluk, it aperek yogeisasikhemo usa'inakhukha. Itithogon usa'inakhukhama it inaierek meke nen, at Petrus yogokhe dogolik, “Noe. Hiki pererlagat ageikhe ninom dogoluk nen lanok o,” iluk ayoko 'bisukhama inom welagoukha.