Kolose 3 - ALLAH ANE WENW KET MEKE WAROGO WOKNINAKHIKHE WENE

¹ At Allah nen he, Kristus ilugutdekhe dogolik, hit hinomat hiniluguthinakhikhemo welagap iti nen, yi meke ti meke Kristus ebe pogot oba Allah alilu iki ebeke kogat welagarek oba etoma meke horla luok nen, hinobatnerogo hagakhe dogono o.

^2-3 Hinebe watlagagisip nen, yabokane Kristus hinomat hiniluk dogogun meke Allah nen aban thelekmatdigidek aburarek werek iti nen, hinakla nen, yi meke ti meke agat oba meke oba ebekhidek dogolik, pogot oba meke oba ebekhe dogono.

⁴ Ebekho werekma, at Kristus ninebe yabokane niniluk motok dogoagaluk hagatninakherek meke etnogo thelegat wagunem, hit at hinomat thelekma atlukmo hogothinabugun iti o.

“Hinobabut alep meke here'isalok nen, ket meke waganino,” iluk yogeisasikhe wene

⁵ Iti nen he, hinobabut hinikhogat dogolik, hinakla nen yi warlok ti warlok apegethep meke iti warogo here'isekhe dogono. Hinobabut iti, param ha'isegarek iti inom, inakla nen, warlok iluk wosi nekarek iti inom, inetaiken nen nekerethek inoba agaken dageikherek iti inom, inileken lageisalok inakla nen warlok apegarek iti inom, kaneke oba hakokthek dogou hak, inakla nen, “Yi meke ti meke, an meke anek dogolep,” iluk apegarek iti inom, hinobabut iti meke tha'bokhogonat warogo here'isekhe dogono.

⁶ It akhuni Allah ane inasuk holu'buk meke nen inobabut itithogonat hagakhunem, Allah akla aga dageiluk, weagarinabigin werek o.

⁷ Hit alebageik, iti meke hasigat hagakhe dogolik, hinobabut itithogonat hagakho welagagip.

⁸ Itithogon mekeat he, yogotak hit hinobabut ageikhe yi meke tha'bokhogonat here'isausagat. Inakla aga dageikherek iti inom, inakla hetpet ekherek iti inom, it aperek weagarinakharek iti inom, inape baga, inabok weak palhik, weak hagakharek meke asagan tha'bok igik, egarek iti inom, here'isekhe dogono.

^9-10 Su alep meke nokorlogo la'isalok nen, yabokane ket meke ikarek hak, hit hinobabut alep hagakhe lagagip meke here'isalok, yabokane hinobabut ket meke waganhigip iti nen, hinekalat ekhe dogogup o. Hinobabut ket meke iti, Allah nenat winametdinageisikhesikmo nogo nen, at ekaerek obabut hakene hagatlatluk nen, ebe motok hutukhogon hinilu asuagaluk, eran-alebat hagathinabiogo iti o.

¹¹ Itithogon hagathinakhunem, ninebe tha'bokhogonat ninoe Etagapogot Kristus arligatma, ninebe tha'bokhogon at ninom hunik welago iti nen, inukuloak etaga Yunani meke igik, Yahudi meke igik, egarek iti inom, inoado aperlagap palek meke igik, palek dek meke igik, egarek iti inom, inane kut palek meke igik, walegat okamake meke igik, egarek iti meke inom, inatuaneke meke igik, inasokne meke igik, egarek iti inom, ekhe dogosak dek welagap iti.

¹² Hit hinebe, Allah nen wenago ekaerek hasik 'bakhasikhesik nen, “An nekaerek na'buri o,” iluk, akmurogon welagarek iti. Halok he, su ket meke ikharek hak, hinobabut men meke waganino. Inebe inakmurinakharek meke iti inom, inobabut enago welageikharek meke iti inom, inekaerek nen hogorakhigidek inetaiken thebekhogon welageikharek meke iti inom, inobabut liokhogon hagakharek meke iti inom, inobakhanini hapugutdiluk welageikharek meke iti inom, hinobabut iti meke waganino.

¹³ Hit-hit aperek nen aperek weak hagathinakhunem, ua 'bigidek hinobakhanini hapugutdiluk hagakhe dogolik, thagalogo here'isekhe dogono. Hit weak hagakhe lagagip meke, ninoe Etagapogot nen thagalogo here'isasikhe hak, hit-hit itithogonat thagalogo here'isekhe dogono o.

¹⁴ Itithogon hagakhe dogolik, ebe kok hakene re, akhuni inebe hinakmurogon dogono. Inakmurogon welageikharek meke iti baga, hinebe opakiat motok dapukhogon dogou hagat dogogun iti.

¹⁵ At Allah nen Kristus ebe opakiat meke hinom dapukhogon hunik dogobageik iluk hinayoko 'bisikhe iti nen, yi meke ti meke hagasuogoluk, hinakla nen, “Kristus nen ninom dapukhogon 'binanhikhemo welago,” iluk, wene itiat kogotdekhe dogolik, mothogon hagakhe dogono. Itithogon hagakhe dogolik, Allah ebe heagei wakhe dogono.

¹⁶ Akhuni inameke doalegat meke inikierek welageikharek hak, hit nen, Kristus ane itiat hinetaikenma obatnerogon 'biluk dogolik, hinakla kagalogoat, hit-hit wene hinasuk wat-wat hagakhe dogolik, wene hit nen yakulisigik, it nen yakulhisigik, hagakhe dogono. Yakulisekhe dogolik, Allah hasi etai Mazmur meke wakhik, etai Allah hogorakharek meke wakhik, Allah Agoreke nen hinakla kagalhunem, etai ket kagalogo wakhik, hagakhe dogolik, hinetaikenma nen Allah heagei wakhe dogono.

¹⁷ “Ninopase Allah nen woknisekherek iti, ebe Yesus nenat woknisekherek o,” iluk, Allah heagei wakhe dogolik, “Ninoe Etagapogot Yesus apma dogolik, hagakhe lago,” iluk, yi meke ti meke tha'bokhogonat hagasuogoluk, hinane yi meke ti meke hasik uogoluk, at Yesus etaga palogo hagakhe dogono o.

Humi ap yekerugi inai opakimo meke, “Yigithogon hagakhe dogosak,” iluk inasuk wakhikhe wene

¹⁸ Hit humi nerugi. Ninoe Etagapogot hinom hunik dogolik hinobabut hagasusak tak-tagat, hinaguni inapma dogolik inane hologo hagakhe dogono o.

¹⁹ Nen, hit ap nagarlak lak. Hinagugi mep dageik-dagokhogon hagarinakhidegat, hinakmurogon dogono o.

²⁰ Nen, hit yekerugi, nagarumi. Hinagosa, hinopase lak nen, yi meke ti meke hasik yokhisugunem, inane hologo hagakhe dogoumo, ninoe Etagapogot oba hotok igin iti nen, itithogonat hagakhe dogono o.

²¹ Nen, hit inopase lak, nagarlak lak. Hina'buri inakla korlo asunogo iluk inakla aga liakhe dogogup o.

²² Hit inatuaneke meke nagarlak lak nerugi. Hinougi agat oba meke nen, yi meke ti meke hagasuagaluk isinem, inebe inil oba halok inakla hanorogon hagakhik, dekma halok huk ageik, hagakhe dogogup o. At he, ninoe Etagapogot hinayukhogon hinetaiken opakiat dogolik, hinougi iti inane hologo hagarisekhe dogono.

²³ Yi meke ti meke hagakhe dogolik, hinakla nen he, “Akhuni hasik hagakhe lago dek o. Ninoe Etagapogot obasigat o,” iluk, hinetaiken oba nenat hagakhe dogono o.

²⁴ Hinebe ninoe Etagapogot Kristus at apma dogolik, at obasigat hagakhe lagap iti nen, hinakla nen, “Nit hagakhe lago iti hasik, oko at ninoe Etagapogot Kristus nen itetdinanigin werek o,” iluk, hinakla hutdiluk dogono.

²⁵ Meke re, at ninoe Etagapogot nen, akhuni inelokhoken oba anek hisalok, aperek elokhoma 'bisigik, aperek oporlike 'bisigik, hagakherek dek iti nen, tha nen weak hagakhe meke hasik, oko wogosu hak, weak hagakhe iti tak-tagat ukum oba 'bigin werek o.