Ibrani 8 - ALLAH ANE WENW KET MEKE WAROGO WOKNINAKHIKHE WENE

At Yesus nit ninobasik Allah iteerek kok welagarek wene

¹ Nit wene ekhe lago iti, kok he, yi o. Nit ninoe kok Allah iteerek ogo iti hagat werek o. At ebe, ninopase Etagapogot Allah welagarekma iki ebeke kogat werek o.

² Itithogon werek iti, Allah ai su meke akhuni nen elanma hasik halhukha baga werek 'buk. Dek o. Allah ekaerek ai ebe meke halhikhe baga etoma dogolik nit ninobasik hagakherek o.

³ It ap Allah iteerek inougi koktek inebe tomok meldisegarek iti, yi meke ti meke Allah wogokhik, inako warikhik, hagakhe dogoagaluk meldisegarek iti hak, nit ninoe Allah iteerek kok iti, yi meke ti meke aperek nit ninobasik Allah wogosusak werek o.

⁴ Wene Allah nen ninasuk wakhikhe meke iti tak-tagat, yi meke ti meke Allah hasik wogokhe dogosak meke, it ap Allah iteerek meke inebe werek iti nen he, at Yesus ebe agat oba yoma dogolepma, Allah iteerek dogolep dek o.

⁵ Allah nen, “Nai su meke elanma hasik haldanino,” iluk Musa yogokhikhemo, ebe haligiluk hagakhunem he, yabokane men yogokhikhe, “An nipisak tom oba dogolik, an nai yigithogon haldanino, iluk walegeke walhalok inuguthiigi etnogo tak-takhogon haldaninok nen, hakla eberek motok dogono o,” iluk yogokhikhe iti hagat, it ap Allah iteerek agat oba yoma dogolik, ebe pogot oba werek meke oba likhik, alino hagakhik, hagakharek iti.

⁶ Itithogon hagakhe dogolik, it he, erlok dek alino hagarek meke hagakharek mekeat he, Allah nen, “Hit hano hagathinabigin,” iluk abok yoknisasikhe meke oba dukhogon, at Yesus ebe Allah inom, nit akhuni ninom, turlem heisogo dogolik, wene Allah nen ket meke warogo wokninakhikhe tak-tagat ebe mekeat kok motok hagakherek iti o.

⁷ Wene alep Allah nen, “Hano hagathinabigin,” iluk wene warogo wokninakhikhe iti baga erlok dek ageidek hano hagatninabilepma, wene iti obolukmo, “Hanothinabigin,” iluk yabokane ilep degat o.

⁸ Meke re, Allah a'buri wene alep meke iti hago dogolik, erlok degat hagakhe lagoukhama men yogeisasikhe, “Akhuni Israel meke inom, Yehuda meke inom, an nen wene ket meke warogo woginabigin oba weregat o, iluk eberogonat yokhisigi o.

⁹ An nen hit hinopa lak o Mesir nen wogosik dukhisigiluk niki hagasik dogolik, Itithogon hagathinabigin, iluk wene alebageik warogo yogeisasigi iti hak 'buk. Ninat o. An nen it wene warogo yogeisasigi meke iti hologo mothogon hagakhidek iti nen, it inebe na'it, iluk kolelogo here'isasigi iti o.

¹⁰ Yabokane akhuni Israel wene ket meke warogo woginabigin iluk igi iti, ebe yiat. An nen wene inasuk wakherek meke iti inakla eberek motok dogoagaluk, wogeisigik, inetaikenma holal waganogo 'bisigik, hagatluk nen, an it inopase dogogin. Nen, it an na'buriat dogogun o.

¹¹ It inarluetek inom, yekerugi inom, tha'bokhogonat inopase an nebe inilu dogogun iti nen he, it inougi inageikhugi inom, inagarlak lak inerugi inom, yogeisekhe dogolik, Hinopase Allah at hinilu atni o, iluk yakulisausak dek o. Inekaerek inabusagat, nebe inilu aga dogogun o.

¹² It weak hagakharek meke iti, an nen thagalogo degetdisalok, yabokane nakla eberek dogogin dek o,” iluk Allah nen yogeisasikhemo holal waganek werek.

¹³ At nen he, “Wene ket meke warogo woginabigin,” iluk isikhe iti, wene haganeat meke degetdigiluk isikhe. Yi meke ti meke haganeat meke il momok agunem ibat thogotdisegarek iti hak, wene alep meke degatdigiluk isikhe iti.