Ibrani 7 - ALLAH ANE WENW KET MEKE WAROGO WOKNINAKHIKHE WENE

Ap Melkisedek Allah iteerek dogolik hagakhe lageikhe wene

¹ Ap Melkisedek iti ebe, akhuni o Salem meke inoe kok dogolik, Allah Etagapogot iteerek welageikhe. Werekma at ap Abraham ap inebe koktek meke inatluk apuke wagunem, at Melkisedek iti nen 'bikha dukhisikhesik, “Allah nen hebe hanothabuak,” iluk ane hanorogon heagei wakhikhe.

² Itithogon yogokhikhemo, Abraham nen, wim yakhe dogolik, yi meke ti meke hugul waganhikhe meke tha'bokhogonat iki wenago 10 baga ageikhe meke aperek mikirlogo Allah hasik 'bisalok, ap Melkisedek etnogo wogokhikhe. Ap Melkisedek iti etaga nit ninane baga, “Kok etagapogot obabut mothogon anek hagakherek meke,” iluk u hak, etaga Melkisedek thalekma ekhe lagoukhaat. Nen ageikhe, “Kok etagapogot hogot walherek meke,” iluk u hak, akhuni o Salem meke inoe kok etagapogot iluk ekhe lagoukhaat.

³ Ap Melkisedek iti hasik, at agosa opase iti nen itago meke igik, ap iti opa lak iti nen itago meke igik, at iti hurli baga itaklageikhe igik, iti hurli baga watlageikhe igik, abok hutukhogon ageikhe igidegat. Iti nen he, at ebe Allah ekaerek a'but ipisak tak-tagat dogolik, at ebe Allah iteerek motok welagarek hakeneat o.

⁴ Nit akhuni Israel meke ninopa Abraham nen wim iti yakhe dogolik, yi meke ti meke hugul waganhikhe meke emenogo iki wenago 10 baga hagatlasi ageikhe meke aperek mikirlogo Allah hasik 'bisalok, ap Melkisedek wogokhikhe iti nen he, nit ninakla nen, “At Melkisedek iti ebe kok motok,” iluk apausak iti 'bikhani!

⁵ Nit akhuni Israel meke wene Allah nen ninasuk wakhikhe wene etnogo baga yoknisekhe dogolik, ageikhe men isikhe, “Yi meke ti meke iniki wenago 10 baga hagatlagarek meke aperek mikirlogo an nobasik 'banhunem, ap an iteerek it ap Lewi nen itago meke anek waganhe dogoak o,” iluk inasuk wakhikhemo holal waganek werek o. It inebe opakiat meke ap Abraham nen itago meke inagarlak lak inerugi nenat 'bisinem waganhe dogoak o, iluk isikhe iti.

⁶ Itithogon isikhe meke re, ap Melkisedek iti, ebe ap Lewi nen itago meke 'buk. At ebe werlek meke dogoligat, at Abraham Allah nen, “Hanothabigin o,” iluk abok yogokhikhe meke etnogo nen, yi meke ti meke iki wenago 10 baga hagatlasi ageikhe meke aperek mikirlogo Allah hasik 'bisalok Melkisedek wogokhikhemo waganhikhesik nen, “Allah nen hanothabuak o,” iluk ane hanorogon yogokhikhe iti.

⁷ Itithogon yogokhikhe iti, it akhuni inebe koktek nenat inagarumi inapma meke inane hanorogon yogeisegarek iti, nit tha'bokhogonat itithogon hagakharek ninilu nogo nen, wene iti hasik inane thagalusak dek o.

⁸ It ap Allah iteerek dogolik, it akhuni aperek nen yi meke ti meke iniki wenago 10 baga hagatlasi agarek meke aperek mikirlogo Allah hasik 'bisinem, inebe akhuni watlageikharek meke nen waganhe lagoukha mekeat he, ap Melkisedek iti anek he, iluk welagarek meke nen itithogon waganhikhe, iluk Allah ane baga holal waganek werek o.

^9-10 At waganhikhe iti hasik, it akhuni Israel meke nen yi meke ti meke iniki wenago 10 baga hagatlasi agarek meke aperek Allah hasik mikirlogo 'bisinem, ap Lewi nen itago meke waganhe dogoagaluk isikhe etnogo mekeat he, at Abraham ap Melkisedek ipisak abuk agoukhasik, yi meke ti meke iki wenago 10 baga hagatlasi agarek meke aperek Allah hasik mikirlogo 'bisikhe meke iti, at Lewi aban itaklageidek werek korlek Melkisedek wogokhikhe iti. At Abraham nen wogokhikhe mekeat he, it ap inukuloak etaga Lewi meke Abraham nen itago meke nogo nen, it nen wogokhukha umo re, erlogat o.

¹¹ It ap inukuloak etaga Lewi nen itago meke Allah iteerek kok werekma, Wene Allah nen ninasuk wakhikhe meke etnogo baga it Israel meke 'bogokhogon hanorinakhe dogolepma, Allah nen he, “Ap Harun nen itago meke dek. An iteerek Melkisedek hagakhe lageikhe iti hak, ap ninat meke ageikhe meldigin,” iluk ilep degat o.

¹² It ap Allah iteerek alep meke here'isalok, ket ninat meke meldisagaluk halok he, wene Allah nen ninasuk wakhikhe wene iti obolukmo wene ilugun ninat meke iluk nen meldisausak o.

Allah iteerek at Melkisedek hakene dek, ninat meke meldisikhe wene

^13-14 Wene yi ninoe Etagapogot Yesus ukuloak etaga Yehuda meke hasigat o. At ukuloak etaga Yehuda meke iluk akhuni tha'bokhogonat inilu meke re, at Musa nen it ap Allah iteerek hasik ekhe dogolik, it ap Yehuda meke inabok ekhe lageikhe motok dek. Iti nen he, it ap inukuloak etaga Yehuda meke ageikhe Allah iteerek dogolik Allah ako warekhe dogoagaluk meldisekhe lagoukha motok degat o.

¹⁵ Ap Allah iteerek at Melkisedek hakene ageikhe winam ageikhesik werek iti hasik, wene thelekma motok werek o.

^16-17 At iti, Allah iteerek melageikhesik werek iti, akhuni nen, “Ap inukuloak etaga iti meke meldisegarethekma, iti mekeat hano dogoak,” iluk meldisegarek iti hak, meldisikhemo werek 'buk. Dek o. At hasik wene yigithogon holal waganek werek. Allah nen he, “Ap Melkisedek an iteerek welageikhe iti hak, hat an iteerek motok-motok dogonogoluk meldagagi o,” iluk isikhemo holal waganogo 'bisukha iti hak, at Yesus yabokane watlageidek iluk motok obatneak welagarek iti baga meldisikhemo werek.

^18-19 Itithogon werekma, Allah nen wene alep ninasuk wakhikhe iti erlok dek nen 'bogokhogon hano hagathinakhidek, wirlidikhogon dogunogo iluk, degetdisalok nen, yabokane wene ilugun ket meke ulakhikhemo nen, ninebe 'bogokhogon hano hagatninabigin iluk Allah oba horokhogon uki aga lago.

²⁰ Nen, wene iti Allah nen etaga hupuk palogo ulakhikhe o. It akhuni aperek nen he, it ap Allah iteerek dogoagaluk etaga hupuk palhidek meldisegarek mekeat,

²¹ at Yesus anek he, Allah nen etaga hupuk palogo meldekhe dogolik, men yogokhikhe, “An Netagapogot nen, hat an iteerek motok-motok dogonogoluk netaga hupuk palogo meldagagi iti, yabokane nane dagakhogon wene ninat meke ageikhe nekalat igin dek o,” iluk yogokhikhe.

²² At Allah nen, “Yigithogon 'bogokhogon hano hagathinabigin,” iluk wene ket meke warogo wokninakhikhe iti, ebe asigin iluk at Yesus ebeat meldiluk woknisasikhe itiat o.

²³ Nen, wene opakiat ageikhe weregat o. It ap Allah iteerek dogolik hagakharek meke hunik-hunigat motok hagakhidekma inebe obakha baga nen watlagunem hem, inobolukmo meldisigik, hagarik wagunem inebe doalegat watlageikharek iti o.

²⁴ Itithogonat meke re, at Yesus anek he, Allah iteerek iluk motok dogogin iti nen he, Allah nen, it akhuni aperek at obolukmo meldisagein dek o. At arligat motok dogogin o.

²⁵ Itithogon iluk motok dogolik, nit akhuni ninobasik Allah ayoko 'bisi motok welagarek iti nen he, nit akhuni Allah werekma ukuogoluk at oba haklarik ukisinem erlok tilninabiluk nen 'bogokhogon motok hano hagatninabigin iti.

²⁶ Nit ninakla nen, “Ap ageikhe Allah iteerek nit ninobasik hano 'bogokhogon yigithogon kok dogolik hagakhe dogolep e,” iluk apogorek mekeat he, Allah nen ninoe Yesus itiat meldisikhemo werek o. At obabut weak korlo ageikhe hagakhidek, hano karelek motok werekma, akhuni weak hagakharek meke inakla nen karelogo pogot abel upuke upu eloma lia'isikhemo nit ninobasik werek o.

²⁷ It ap Allah iteerek koktek iti hibiku-yogoku inekaerek weak hagakharek meke hasik tak, inako Allah warekharethek nen yabokane akhuni aperek weak hagakharek hasik inako Allah warogo wogokharek mekeat he, at Yesus anek he, nit weak hagakhorek meke hasik ninako Allah waresu hak, at ebe opaki hasik watlaga dogolik, ebe Allah wogokhikhe iti.

²⁸ Alep wene Allah nen ninasuk wakhikhe meke iti baga, ap erlok dek meke, Allah iteerek meldisekhe lagoukha mekeat he, yabokane Allah nen etaga hupuk palhikhe iti baga, at ebe a'but nit tilninakherek meke hano 'bogokhogon meldisikhemo at iteerek kok motok werek iti o.