Ibrani 6 - ALLAH ANE WENW KET MEKE WAROGO WOKNINAKHIKHE WENE

¹ Iti nen he, Kristus agarumi atluk hagakhe dogosak meke wene alebageik yakulharek iti meke yakulhugu meke iti werek korlek, inarlue atluk hagakhe dogosak meke yakulhe dogouok o. O herlaga hano 'biluk iniki abel dagalharek dek iti hak, nit alep weak hagakhe lagagu meke 'bualogo here'isalok ninobabut hebelatluk ninetaiken Allah oba hakotdisugu meke iti yabokane abel dagaluok dek o.

² Ima usegarek wene iti yakulhik, inukuloak thebelharek wene iti yakulhik, watlatlukmo Allah nen ninilugutninabigin wene iti yakulhik, ilugun oba ukum ninoba 'bigik, kokhik, hagakhunem motok-motok dogogun wene iti yakulhik, hagakhugu meke iti ninane abel dagakhogon yabokane yakuluok degat o.

³ Allah nen hano apekhe halok, yabokane yakulusak meke itiat yakulik laga dogouok o.

^4-6 It akhuni aperek, Allah nen inakla liarinakho korlek, yi meke ti meke ituk walhalok hano meke waganharek iti hak, Allah pogot oba nen oko dek werlegat woknisekherek meke iti waganhik, Agoreke suputnisekherek meke iti aperek waganhik, Allah ane iti hano motok iluk iniluat welageik, Allah obabut hano nen yabokane obatnerogon hano motok hagatninabigin iti aban hagatninakhidek werek korlek, yogotak ya yi meke ti meke hipiri dirlu nekarek hak, wogeisasinem horligik, hagakharethek nenat he, yabokane it nen, “Allah nina'it,” iluk ane here'isalok inapuke dukhi lalok dogolik, Yesus Allah a'but ebe o baga meldiluk wakhe dogolik inane sagun yogokhukha iti hagat, yabokane hagariogei iti o. Itithogon motok hagarik laga korlek, yabokane, it nen, “Nit weak hagakho,” iluk inobabut hebeluagaluk, inapuke nikithogon wogosik wisu heat. Motok erlok dek o.

⁷ Allah nen hibiku-yogoku o miso agat oba usa'i agunem, agat hano hotelagunem akhuni nen yabu waganogo yi meke ti meke ai yakharek meke ebe hano nasinem, Allah nen, “Agat iti hano,” iluk hanotdekheregat o.

⁸ Itithogon mekeat he, agat iti yi oka ti oka weak meke inom, pati arlok meke inom, dukhekherek halok he, “Agat yi we yugunat alomarogo werek iti weak na'it,” iluk Allah nen homan 'biluk nen, yabokane hetu hundumo tha'bokhogonat nigin o.

⁹ Itithogon igi mekeat he, nagarlak lak nerugi. Hinebe nakmu. Allah nen weagathinabigin, iluk ninakla apekhe lago dek. At he, hit alebat tilhinakhikhesikmo Allah nen hanothinabigin iluk hutdekhe lago.

¹⁰ At Allah obabut he, korlo hagakherek meke 'buk. At mothogon anek hagakherek iti nen, hit nen at obasik hagakhe dogolik hinagarlak lak hinerugi Allah a'buri meke aperek hinakmu nen alebageik yomageisigik, yabokane yomageisigik, hagakhe lagap meke iti, at nen hit hinobarlikmatdigin dek o.

¹¹ Nagarlak lak nerugi. Nit ninakla warlok he, hit hinakla nen, “Allah nen nit hanotninabigin,” iluk hinakla arleken akhekhe lagap meke itiat akhekhe dogoluk, hurli ilugun oba iteerek asubageik nen, hagakhe lagap iti hagat, hinebe tomok hinobatnerogon hagakho motok dogosak warlok apekhe lago o.

¹² Hit hina'it weak hagakhe dogosak he, nina'it o. It akhuni alep inetaiken Allah oba hakotdiluk ina'it ageidek, it nen, “Eberogonat waganugun,” iluk apekhe lagoukha baga, Allah nen, “Wokhisagein,” iluk abok yogeisasikhe meke ebe waganhukha iti hagat, hit itithogonat it inobabut waganogo hagakhe dogono o.

“Allah nen abok yogeisekherek meke dek agarek dek,” iluk yogeisasikhe wene

^13-14 At Allah nen he, Abraham yogokhe dogolik, “Hat yabokane yigithogon hagathabigin,” iluk abok yogokhe dogolik, “Hat hebe hani-hanorogonat hagathakhik, hat ha'buri nen itago meke motok doalegat wiak-wayakhogon wokhikhik, hagasigin o,” iluk, ap ninat meke etagapogot degatma, Allah ekaerek etaga baga hupuk palogo yogokhikhe.

¹⁵ Itithogon yogokhikhemo nen, Abraham akla puk ageidek therogo motok welageikhe iti baga, wene abok yogokhikhe meke iti, arat ebeat ageikhe iti.

¹⁶ Meke re, it akhuni nen inetaga hupuk paluogoluk halok he, inekaerek inetaga erlok dek negen nen, inekaerek inetaga baga hupuk palhidek. It aperek inetagawerek kok meke inetaga baga hupuk palharek iti. Itithogon palhunem, it apurukhugi nen wene palhe dogogun meke emenogo inane dek agarek iti o.

¹⁷ Itithogon hagatlagarek iti hak, Allah nen, “Akhuni an nakla apalok abok yogeisegerek meke, nane dagakhogon yabokane ninat meke ageikhe yogeisegerek dek o,” iluk, it wene abok yogeisasikhe meke eberogonat apoagaluk, hupuk palogo yogeisasikhe iti.

¹⁸ Wene hupuk palogo yogeisasikhe iti, nit Allah apma uki ago meke ninakla nen, “Hanotninabigin,” iluk eberek welago meke ninetaiken hapukhogon dogoagaluk nirat abok yoknisasikhe. Abok yoknisigik, hupuk palhik, wene pere isikhe iti, nit nen, Allah ekalat ekherek motok dek, iluk ninetaiken hapukhogon dogoagaluk yoknisasikhe iti.

¹⁹ At nen he, “Hanothinabigin,” iluk isikhe iti dek asigin dek o. “Ebeat asigin,” iluk apekhe lago meke iti, ku thoat agatma a'bethogon usa'iluk welageikharek iti hak, ninetaiken pogot oba o akla itikmoke kakok palek Allah werekma etoma hunetdiluk hapukhogon dogouok o.

²⁰ At Yesus nit ninobasik holak yarik, o etoma ukisikhesik, ap Melkisedek Allah iteerek dogolik hagakhe lageikhe iti hak, motok-motok hagakhe dogogin meke Allah iteerek kok ageikhesik welagarek iti.