Ibrani 4 - ALLAH ANE WENW KET MEKE WAROGO WOKNINAKHIKHE WENE

¹ Iti halok he, Allah ne a'buri thet waloagaluk abok yogeisasikhe meke iti dek ageidek werek meke iti, nit yabokane thet waloagaluk woknisageinmo etoma hit aperek ukigidek hagasunogo iluk hinayukhogon dogolik mothogon hagakhe dogono o.

² Wene hano wene iti it alep yogeisasikhe iti hagat, nit itithogonat yoknisasikheat. Meke re, wene yogeisasikhe meke iti, it inasuk holhukhasik nenat, inetaiken oba hakotdigidek hagakhe lagoukha iti baga, wene iti it inobasik erlok dek ageikhe iti.

³ It inobasik itithogon erlok dek ageikhe mekeat he, nit ninetaiken Allah oba hakotdekhe lago meke, at nen, “Hit thet walagun,” iluk abok isikhe etnogo nirat thet walagun o. Wene iti hasik, Allah nen yigithogon isikhe apigi, “An nakla aga dageiluk hupuk palogo wenageisekhe dogolik, An thet walogo welagarek iti hak, it thet walagun motok dek o,” iluk isikhe iti, pogot agat at nen walhasikhesik nen thet walekhe dogolik isikhe.

⁴ O iniki 7 baga welageikharek etnogo meke hasik, Allah ane baga yigithogon holal waganek werek, “Allah nen yi meke ti meke tha'bokhogonat walhekhe lageikhesik, iki 7 baga thet walasikhe,” iluk isikhemo holal waganek werek.

⁵ Wene iti hasik, Allah ane ageikhe yigithogon holal waganek weregat, “An thet walogo welagarek iti hak, it thet walagun motok dek o,” iluk isikhemo hola waganek werek.

⁶ Ebekeram, it nen hano wene iti inasuk holhukhasik nenat, inasuk hologo mothogon hagakhidek iti nen, at Allah nen, “It thet walagun,” iluk abok isikhe etnogo, thet ebe waligidek. Iti halok he, it akhuni ninat meke aperek erlok thet walagun, iluk hutdusak o.

⁷ Wene iti abok yogeisasikhesik oba nen, yi tahun ti tahun doalegat welageihesik nen, yabokane, “Iti baga,” dogogun iluk at Daud yogokhe dogolik, “Yogotak ya baga,” iluk yogokhikhe meke alebageik igi hagat holal yigithogon waganek werek, “Yogotak ya baga Allah ane hinasuk holhep halok he, hinetaiken a'bet dogogup o,” iluk isikhemo holal waganogo 'bisukha iti.

⁸ Allah nen, “Hit thet walagun,” iluk abok yogesasikhe iti, at Yosua nen wogosik uki ageikhe iti baga, arat ebeat atlepma re, it uki agoukhasik oba nen yabokane Allah nen, “Iti baga thet walagun,” iluk abok isikhe iti, ilep degat o.

^9-10 Allah nen yi meke ti meke walhekhe lageikhesik nen, yabokane ilugun kobokhogon iki 7 baga thet walasikhe iti hak, nit at a'buri thet walagun meke iluk abok isikhe meke etnogo ukugun halok, ninebe dopok yi meke ti meke yabu ninekaerek hasik hagakhe lago meke ilugun kobokhogon thet walagun meke weregat o.

¹¹ It ale Allah ane hologo mothogon hagakhidek nen, thet waligidek iti hak, nit aperek it inomanem thet waligidek hagasunogo iluk, ninobatnerogon hagakhe dogouok o.

¹² At Allah ane ekherek iti, karok elak abel ebelak-ebelak motok mago iti hakene dek o. Meke re, at ane iti, iluk meke obatneak elaklak weak motok dogolik, inoak elekenma ukigik, inamukok elola ukigik, hagasu hak, inakla inetaiken oba hakha lagarethek nen, inakla apegarek meke inom, inetaiken nen warlok apegarek meke inom, ileken erlok penakherek.

¹³ Allah il oba, yi meke ti meke at nen walhasikhe meke ageikhe limago welagarek motok dek o. Meke re, at il oba, yi meke ti meke tha'bokhogonat, thelekma motok welagarek iti nen, nit hagakhe lago meke, at ilumo ninoba dopogat ninom ugun o.

Yesus ebe kok Allah iteerek welagarek wene

¹⁴ Nit ninoe kok Allah iteerek Allah a'but Yesus etnogo pogot abel upuke Allah werekma dageisikhesik nit ninobasik werek iti nen he, nit ninetaiken at oba hakotdiluk ninane pakhogon ekhe lago meke iti, niniki a'bethogon hago dogouok o.

¹⁵ Nit ninoe kok Allah iteerek welagarek iti, nit ninobatne dek erlok dek iti, at okodek 'buk. At nit ninobabut waganhikhesik werekma, nit weak hagasuagaluk weak meke etnogo nen ninakla kagalherek hak, at itithogonat yi meke ti meke hasik akla kagali aga lageikhe mekeat he, at weak ageikhe hagakhidek dogolik ninobabut ilu o.

¹⁶ Iti nen he, nit weak asusak werekma, hano asuagaluk, ninopase Allah obabut hano nen akmutninakhik, yomaknisigik, hagasuagaluk, at Allah kok welagarekma dogolik obabut hano enagorogon hagakherek iti nen, ninayuk dekhogonat horokhogon ukuok o.