Ibrani 3 - ALLAH ANE WENW KET MEKE WAROGO WOKNINAKHIKHE WENE

“At Musa ebe 'bugurlagat negen meke re, at Yesus anek he, ebe motok kogat,” iluk yogeisasikhe wene

¹ Iti nen, Allah a'buri ekaerek hasik wenago 'binageikhemo welagap meke nagarlak lak nerugi. At Allah pogot oba nenat hit ninomat ninayoko 'bisikhemo wene waganhugusik pakhogon ekhe lago iti hasik, at Yesus ebe Allah iteerek ninoe kok dogoagaluk, Allah nenat la'i ageikhemo werek iti halok, hit hinetaiken oba nenat hutdekhe dogono o.

² At Musa nen Allah a'buri inebe re, Allah ai halekma negen, iluk it inobasik obabut hupukhogon hagakhe lageikhe it hak, Allah nen Yesus itithogonat hagasuagaluk meldisikhemo obabut hupukhogon hagakherek iti o.

³ It akhuni nen o halek meke herlekha'bugat negen hogorakhe dogolik, it ap o halharek meke iti anek he, kokhogon hogorinakharek iti hak, at Musa 'bugurlagat negen hogorakhe dogolik, at Yesus anek he, kokhogon hogorakhe dogosak o.

⁴ O halek ebe tomok, it ap o halharek meke inebe werek mekeat he, yi meke ti meke tha'bokhogonat, Allah arligat nen o halu hak walhasikhe o.

⁵ At Musa ebe Allah atuaneke dogolik, at Allah a'buri inebe tha'bokhogonat at ai halek negen iluk, it inobasik obabut hupukhogon hagakhe dogolik, men ekhe lageikhe, “Allah nen yi wene ti wene yabokane yigithogon yoknisagein meke werek,” iluk abok yogeisekhe lageikhe.

⁶ Mekeat he, at Yesus anek he, Allah ebe a'but nogo nen, at iteerek nenat hagakherek. Nit hanotninabigin wene iti hasik ninetaiken ninobatnerogon oba hakotdiluk motok dogogun halok he, Allah ai halek iti, nit ninebeat o.

“Akhuni Allah a'buri meke yabokane thet walagun,” iluk yogeisasikhe wene

⁷ Iti nen he, Allah Agoreke nen men yoknisekherek, “O yogotak ya baga Allah ane hinasuk holhep halok he,

⁸ hinopa lak o limo akhuni dekma nekhe dogolik, inetaiken obatne atluk, it nen Allah nina'it, iluk, Obatne werek a? Dek a, iluk obabut palik nekhe lagoukha iti hak, hit itithogonat hagakhup o.

^9-10 Allah nen ekhe dogolik, O etoma 40 tahun dogolik, an nen hit hinopa lak hagarinakhunem inileken tomok nen hekhe lagoukha mekeat he, At obatne werek a? Dek a, iluk dalnakhik, nobabut palhik, hagakhe lagoukha. Itithogon hagakhe lagoukha iti nen, an nakla aga inoba 'bekhe dogolik, men yogeisasigi, Hinobabut dapi-daparek dogolik nane dopokhogon waganusak hina'it iti nen,

¹¹ an nakla aga dageiluk hupuk palogo wenageisekhe dogolik, An nen, Hit thet walagun, iluk abok yokhisasigi hak, hit thet walagun motok dek o, iluk yogeisasigi,” iluk isikhemo Allah Agoreke nen yogeisasikhemo holal waganogo 'bisukha.

¹² Halok he, nagarlak lak nerugi. Hit aperek hinobabut weak atluk, hinetaiken Allah iluk motok welagarek meke oba hakotdigidek dogolik, at ebe here'isalok hinapuke dukhi launogo iluk, hinobabut hebelogo dogono o.

¹³ Hit aperek weak hagakhe dogolik hinekaerek nukhetdakhalok hinetaiken a'bereak asunogo iluk Allah ane baga, “O yogotak ya baga,” iluk isikhe iti dek ageidek werek korlek, hit-hit hibiku-yogoku hinetaiken ago wat-wat hagakhe dogono o.

¹⁴ Itithogon hagakhe dogolik, ebekeram ninetaiken at oba hakotdisugu meke itiat, niniki nomokhogon herogo werekma, hurli ilugun oba hago dogogun halok he, nit Kristus agarlak lak erugi agosik welago o.

¹⁵ Allah ane baga holal yigithogon waganek werek, “O yogotak ya baga, hit Allah ane hinasuk holhep halok he, hinopa lak nen, Allah ebe nina'it, iluk ekhe lagoukha hak, hit nen, At nina'it, iluk hinetaiken a'bereak agup o,” iluk isikhemo holal waganogo 'bisukha.

¹⁶ Akhuni Allah ane inasuk holhe lagoukhasik nenat, “At ebe nina'it,” iluk ekhe lagoukha iti ap thani nogo? It iti, at Musa nen o Mesir nen wogosik dukhi ageikhe meke inebe tha'bokhogonat emenogo apigi.

¹⁷ Nen, 40 tahun oba dogolik, Allah akla aga thani inoba 'bekhe lageikhe nogo? It iti weak hagakhe lagoukhama, o limo akhuni dekma motok watlarik wagoukha emenogo apigi.

¹⁸ Allah nen wenageisekhe dogolik wene hupuk yigithogon palhikhe, “An nen, Hit thet walagun, iluk abok yokhisasigi etnogo, thet walagun motok dek o,” iluk yogeisasikhe iti thani nogo? Iti it akhuni Allah ane hologo mothogon hagakhidek here'isekhe lagoukha meke emenogo apigi.

¹⁹ It iti inetaiken Allah oba hakotdigidek hagakhe lagoukha iti nen, thet wala ukusak motok erlok dek ageikhe, iluk nit yogotak hutdekhe lago o.