Ibrani 13 - ALLAH ANE WENW KET MEKE WAROGO WOKNINAKHIKHE WENE

Allah akla hanorogon hagakhe dogosak wene

¹ Nagarlak lak nerugi. Allah a'buri hinebe opakiat meke negen nakmu-hakmurogon hagakhethep meke iti, itithogon hinom hunigat hagakhe dogono o.

² It akhuni aperek nen, malaikat meke inebe ap huso thalek inobakha palek woginakhukhasik inarini isakhukha iti nen, ap huso hinoba wago halok, hinobakhanini here'isigidek woginakhe dogono o.

³ It aperek herle warek werekma, hinakla nen, “Nit meneke, ninomat herle warek hakene welago,” iluk it inoba ebekhik, it aperek yi weak ti weak hagarinakhunem, hit hinakla nen, “Nit meneke, agat oba yoma aban werekma itithogonat hagatninabusagat o,” iluk, it inoba ebekhik, hagakhe dogono o.

⁴ Ap dek, humi dek, inobabut yugunat hagarinabik lageikharek meke inom, ap inagugi meke param hagakharek meke inom, it yabokane Allah nen wene inoba 'biluk weagarinabigin iti nen, ap nen humi iginakharek iti, akhuni tha'bokhogonat nen kogotdiluk, yugunat hagainakhidek humi ap waganek meke dopok inom hano noge ekhe dogosak o.

⁵ Allah nen ninebe tomok hasigat ekhe dogolik, “An nen hat niki hetokhogon here'agagik, hebe hasokneat 'bageigik, hagasigin dek o,” iluk isikhe iti nen, hit uang hinetaiken hundiluk dogogup o. Herlekha'bugat werek iti, hit hinakla nen, “Yi erlok werek,” iluk apausak o.

⁶ Itithogon apekhe dogolik, hinakla nen, Allah nen, “Niki hetokhogon here'agagin dek o,” isikhe iti nen, ninetaiken hapukhogon dogolik men ekhe dogosak, “Nopase Etagapogot, an yomaknekherek meke. Halok he, akhuni nen an nikithogon hagatnabusak. An nayuk dek o,” iluk ekhe dogosak iti.

⁷ Hinougi alebat thethisik welagoukha meke nen, Allah ane yokhisasukha meke iti, inoba eberek dogono o. It inetaiken Allah oba hakotdiluk, inebe iniluk dogolik inom, watlasuogoluk inom, hagakhe lagoukha meke hutdiluk, hit it inobabut waganogo hinetaiken Allah oba hakotdiluk dogono o.

⁸ At Yesus Kristus ebe o haganeat nen, yogotak ya nen, ikhok motok welagarek iti hak, yabokane itithogonat ikhok motok dogogin o.

⁹ Itithogonat dogogin iti nen, it akhuni aperek nen yi wene iti wene ninat meke baga nukhetdinageinogo. Nen, it akhuni alebat nekarek meke hasik kogotdiluk hagakhe lagoukha iti baga hano ageidekma, ninetaiken iti baga horle asusak erlok dek o. Allah obabut hano nen woknisekherek iti baga ninetaiken hano horle asusak o.

¹⁰ Allah ai su ai meke halekma it ap Allah iteerek Yahudi meke nen kambing sapi Allah hasik warogo helekit halek oba 'bekhe lagoukha iti hak, nit nen Allah hasik 'bisekhe lago meke iti, it ap iti nen nasusak erlok dek o.

¹¹ O etoma it ap Allah iteerek inoe kok nen it tha'bokhogonat weak hagakhe lagoukha meke Allah nen thagalogo degetduagaluk, kambing sapi warogo amep wolok o kakok palek Allah ekaerek aila hakene iti ukisi lageikhe mekeat he, kambing sapi ebe anek he, leget itikmanke hetu huni dukhekhe lagoukha.

¹² Itithogon hagakhe lagoukha iti nen, at Yesus ekaerek amep oba a'buri weak hagakharek meke horogo, inebe Allah hasik 'bisagaluk leget 'bakleget ape palek abel itikmanke watlageikhe iti.

^13-14 Itithogon watlageikhe iti nen, nit agat oba yoma motok dogosak dek. Nit yabokane o motok dogogun meke herakhe lago iti nen he, at Yesus akhuni nen inane aik dagok paik dagok dalhe lagoukha hak, nit itithogonat yoknisekho korlek, at oba leget abel itikmanke dukhisi dogouok o.

¹⁵ Iti nen he, at Yesus ninom hunik dogolik, nit nen, “Allah nopase,” iluk kambing sapi warogo at hasik wogokhe dogou hak, hibiku-yogoku ninape baga nen Allah etaga kokhogon hogorakho motok dogouok o.

¹⁶ Itithogon ekhe dogolik, akhuni aperek hano hagarinakhik, yomageisigik, hagakhe dogouok. Itithogon hagakhe dogosak iti, Allah akla hanorogo kambing sapi warekhe dogou hagatma, obarlikmatdusak motok dek o.

¹⁷ Hit hinougi inakla nen, “Yabokane Allah nen, It inebe hasik nikithogon hagakhe lagasip, iluk yoknisugunem, nit nen ninoba dopogat oko yogosugun higi,” iluk, hanorogo thethisik motok welageikharek iti nen, it inapma thoma iluk inane hologo hagakhe dogono o. Itithogon hagakhe dogogun halok he, it inakla arleken, hit hinobasik hagakhe dogogun iti. Meke re, hit nen it inane hologo dogogun dek halok he, it inakla weak dogolik, hit hinobasik alomarogoat hagakhe dogosak o.

¹⁸ Nit yi meke ti meke hasik hano anek hagakhe dogouogoluk, apekhe dogolik, ninakla nen, “Nit wene ninoba dek. Ninakla thelek,” iluk apekhe lago iti nen, nit ninobasik sembayan ekhe dogono o.

¹⁹ Ekhe dogolik, ebe kok he, an nebe Allah nen ibat-ibat hit hinoba napuke la'ani isuagaluk sembayan ekhe dogobageik nen iluk kino yokhisigi iti o.

Allah nen hanorinabuagaluk sembayan isikhe wene

²⁰ Ninopase Allah dapulogo 'binanherek meke etnogo nen, ninoe Etagapogot Yesus watlageikhesikmo nen ebe ilugutdisikhe. At ebe amep ulabogo wakhukha iti baga, Allah nen nit ninom hunisuogoluk wene motok dogogin meke warogo wokninakhikhesik, nit tha'bokhogonat Yesus nen ako domba negen thetnisik dogoagaluk ebe kogat meldisikhe iti.

²¹ Hit Allah akla warlok apekherek meke anek hano hagasubageik nen, yi meke ti meke hano meke tha'bokhogonat wokhisoak. Itithogon wokhisugunem, nit ninom tha'bokhogonat nen Allah akla hanorogo hagakhe dogoagaluk, ninobabut at nen woknisagein iti, ebe, Yesus Kristus nen woknisoak o. At Kristus itiat hogorakho motok dogouok o. Ebeat asuak u hak, “Amin,” igi iti.

Wene ilugun warogo yogeisasikhe wene

²² Nagarlak lak nerugi. Wene hemurlugat hinasuk warogo holal waganogo hinoba la'i agei iti, hina'it ageidek hinasuk hologo dogono o.

²³ Nen, ninagot Timotius etnogo, ebe arat herle hisalogo ula'egama nen hinilurogo dogobageik iluk yokhisigi o. At ebe ibat-ibat an noba waga halok he, an yabokane hit hinoba 'bithisa aga dogolik nipisak wisugun o.

²⁴ Hit nen, it ap hinougi hit thethisik welageikharek meke inom, Allah a'buri inom, inebe tha'bokhogonat, “At nen heagei wathinakhe,” iluk yogeisano o. Nen, ninagarlak lak ninerugi o Italia welageikharek meke nen heagei wathinakhaat o.

²⁵ Nagarlak lak nerugi. Allah obabut hano etnogo nen hit tha'bokhogonat thethisik dogoak o.