Ibrani 12 - ALLAH ANE WENW KET MEKE WAROGO WOKNINAKHIKHE WENE

Inetaiken Allah oba hakotdiluk inobakhanini hapugutdiluk dogoagaluk inasuk wakhikhe wene

¹ It akhuni alebageik hagarik wagoukha meke inabok ilik wago iti, inebe doalegat ninaliluke dagakhogon inileken laknisik werek iti nen he, tha ae 'busuk tha ae 'busuk luogoluk yi meke ti meke inoba akin meke nokorlogo here'isalok lageikharek iti hak, nit ninoba akin weak irluk-marlukhogon welagarek meke iti inom, ninobabut weak hagakhorek meke ninoba dekelek motok welagarek meke iti inom, tha'bokhogonat nokorlogo here'isalok, Allah nen, “Hurli iti hurli lano,” iluk yoknisasikhe iti, ninakla nen, “Ninelokhoma piokhogon hurli iti bagaat luok,” iluk, ninobatnerogon laga dogouok o.

² Itithogon laga dogolik, ebekeram ninetaiken Yesus oba hakotduagaluk, at nenat ninakla kagalhik, hurli ilugun oba hano 'bogokhogon motok asi loagaluk, at nenat thetnisik welageik, hagakherek iti nen, arat nit ninileken nen wolok mutluk laga dogouok o. At akla nen he, “Inebe o baga meldisalok inekarli warogo inakharek iti hak, an itithogon watlasu nekarli,” iluk apigidek dogolik, “An yabokane nakla arleken akhagein,” iluk at ebe wakhe korlek obakhanini hapugutdiluk welageikhesik nen, yabokane iluk ageikhesik yogotak Allah kok welagarekma etoma alilu iki ebeke kogat werek o.

³ Hit hinakla puk atluk hinobatne dek asunogo iluk, it akhuni weak hagakharek meke nen at Yesus inakla nen meanetdiluk, ebe weagatdisi korlek kamotdisalok obakhanini hapugutdiluk welageikhe iti, hit nen, “At nikithogon hagakhikhe nogo,” iluk hinakla nen hutdekhe dogono o.

⁴ Hit anek he, weak hagasu hina'it nen, wim inobatnerogon yakharek iti hak hagakhunem, aban hinamep ulabogo hinakhidek meke welagap o.

^5-6 Inopase lak nen ina'buri yekerugi inasuk wakharek iti hak, hit Allah a'buri meke, at nen hinasuk wakherek meke iti obarlikmatdegesip oba welagap a? At nen ekhe dogolik, “Akhuni an netaiken hunik meke inebe tomok inasuk wakhik, it an na'buri meke iluk, pakhogon egerek meke inebe tomok tugi inakhik, an nen hagakherek iti nen, na'but o. Hat nen, Nopase nen nasuk wakhe, iluk hakla nen, An na'it, iluk here'isugun o. An nen, Weak hagakhen, iluk yokhekhe halok, hakla puk ageidek dogono,” iluk isikhemo holal waganogo 'bisukha.

⁷ It yekerugi inopase lak nen inasuk wakhidek aperek welageikharek nogo? Inasuk wakharek anek iti nen, Allah nen hinasuk wakhunem, hit nen, “Nit at a'buri welago iti nen ninasuk wakhe,” iluk hinobakhanini hapugutdiluk dogono o.

⁸ Yekerugi inebe tha'bokhogonat inasuk wakharek anek iti hak, hit aperek hinasuk wakhidek halok he, hit at a'buri ebeat meke 'buk o. We, yugunat nen itago meke o.

⁹ Nen, nit ninopase lak ninebe itakninakhukha meke nen ninasuk wakhunem, inane hologo inalon halogo hagakhorek iti hak, niniluk dogoagaluk ninopase nen ninobabut ket itakninabiogo meke ane hologo hagasusak dek nogo? At ane holek dogosagat o.

¹⁰ It nen he, “Hano hagasusak meke yi higi,” iluk elanma hasik we herlekha'bugat inasuk wakharek mekeat he, ninopase Allah anek he, at weak hagakhidek karelek welagarek iti hak, nit ninom itithogonat karelek dogoagaluk ninasuk wakherek.

¹¹ Ninasuk wakhe korlek etaat ninakla hano agarek dek. Ninakla weak agarek mekeat he, yabokane ninasuk wakharek iti baga, ninasuk warek welagorek meke, yi meke ti meke eken ikherek iti hak, ninobabut hano enago dogolik mothogon anek hagakhe dogogun iti.

Inakla eberek dogolik hagakhe dogoagaluk yogeisasikhe wene

¹² Iti nen he, hiniki obatne dek meke obatnetdigik, hinitibagal dik-dik iliogo meke hapugutdigik, hagatno o.

¹³ Itithogon hanotdiluk, hinisok abel mirlalek meke yabokane weak ageidek hano asuagaluk, holak mot enago hano yagoma laga dogono o.

¹⁴ Hit hinebe karelogo Allah meke 'bisigidek dogogun halok he, at ebe hinileken hugun motok dek iti nen,akhuni tha'bokhogonat hinom hano dapulik dogolik, hinebe at hasik 'bisalok weak hagakhidek hano karelek motok dogouogoluk hinobatnerogon hagakhe dogono o.

¹⁵ Akhuni hit meke aperek Allah obabut hano nen woknisekherek meke iti here'isalok dukhisinem, arle-arleka dabulatluk nen, hano meke arletdekherek hak, ap iti nen akhuni tha'bokhogonat weagarinabinogo iluk hinileken hanorogon dogono o.

¹⁶ At Esau hipiri abu nen, men isikhe, “Makusa itago an atma, an ite asigin meke iti kok he, dek. Nagot ite asuak,” iluk hipiri piring opakiat temerek meke hasik, at agot oba oko waganhikhe iti hak, hit aperek param hagakhik, wene ebeat meke kogotdigidek hinakla puk ageik, hagakhe dogogup o.

¹⁷ At Esau hagakhikhe iti, hit hinilu o. At akla nen, “Nopase nen yoknekhe dogolik, Allah nen hanothakhe dogoak o, iluk yoknesuak,” iluk yabokane yogosuagaluk de aga dogolik kino yogokhikhe mekeat he, agot arat yogokhikhesikmo nogo nen, yabokane apuke waganusak erlok dek ageikhe iti.

¹⁸ Nagarlak lak nerugi. Alebat it akhuni Israel meke tom Sinai iniki erlok hakhausak, meke baga wagoukha iti hak, hit tom iti hakene meke baga wageidek. Tom Sinai iti baga ebe yigithogon hagakhunem wagoukha. Hetu amulok dageigik, o thebe iluk hi ageik, hisakne obatnerogon hubetha ageik,

^19-20 ane pikon ane hakene kokhogon igik, isinem Allah ane kokhogon ekhe dogolik, wene yigithogon isikhe, “Akhuni inom, domba sapi inom, tom yi iniki hakha ago halok he, inebe helekit oba pike motok inatno o,” iluk inasuk wakhunem holhukhasik, inasuk holek dogosak motok erlok dek ageikhemo, it nen, “At ane iti yabokane ageikhe inom yoknisausak dek o,” iluk inane obatnerogon kino isukha.

²¹ Motok inayuk meke inileken hasukhasik inane obatnerogon itithogon kino isukhama, at Musa nen, men yogeisasikhe, “An meneke, nayuk nen noageleke dik-dik hagakhe lagei o,” iluk yogeisasikhe.

²² It iti hakene meke baga wagoukha mekeat, hit anek he, tom Sion Allah iluk welagarek meke ai o kota yerusalem pogot oba meke baga wagap iti. Etoma malaikat motok doalegat inom

²³ Allah a'buri makusa meke inetagapogot oba holal waganek werek meke natogorlek inakla arleken akhekho werekma inom, it akhuni hano hagakhe lagoukhama Allah nen 'bogokhogon hanorinakhikhe meke inagoreke inom, Allah ebe, akhuni tha'bokhogonat wene inoba 'bigik, kokhik, hagakherek meke etnogo inom, inom werekma oba wagap o.

²⁴ Yogotak Allah nen nit ninom hunisuogoluk wene ket meke warogo wokninakhikhesik, Yesus ebe woknisasikhemo turlem heisogo werek iti inom werekma wagap o. Iti at Habel oe nen wakhikhemo amep wene weak meke hagatlageikhe meke iti oba wagap 'buk. Yesus ebe wakhukhama amep oba hisathigik warogo hano wene hagatlageikhe meke oba wagap o.

²⁵ It akhuni Allah ane agat oba yogeisugunem inasuk holusak ina'it welagoukha meke, inebe iniluk here'isigidek inakhe lageikhe iti. Halok he, nit yigithogon, wene pogot oba nen yoknisugunem ninasuk holusak nina'it dogogun halok he, ninakhidek here'inanigin apegep a? Dek o. Motok ninasigin iti nen, at ane isi korlek hinasuk holhidek, “Nina'it,” iluk here'isaunogo iluk, hinobabut hebelogo dogono o.

²⁶ Itinem, at Allah ane isikhe iti baga agat aborlogothasikhe mekeat he, yogotak, at nen, “An yabokane itithogon hagasigin,” iluk abok isikhe meke yigithogon holal waganek werek, “An yabokane opaki hasigat agat yi anek aborlogothagein 'buk. Dek o. Pogot inomat aborlogothagein o,” iluk isikhemo holal waganek werek.

²⁷ Itithogon “Opaki hasigat aborlogothagein,” iluk isikhe iti, aborlok usak dek a'bet meke dogoagaluk thogotdiluk, pogot agat at nen winametdisikhe meke tha'bokhogonat aborlogothagein iluk isikhe iti.

^28-29 Itithogon aborlogothagein mekeat he, nit anek he, Allah apma 'binanherekma aborlok igin motok dek meke woknisasikhemo ite agosik welago iti nen, “Allah nopase,” iluk heagei wakhe dogouok o. Nen, at Allah ebe, yi meke ti meke hetu nen nekerek iti hagatma, nit itithogon weagatninabinogo iluk, at ebe ninayukhogon hagakhik, alon halogo hagakhik, hagakhe dogolik, at ane hologo akla warlok meke hagakhe dogolik, hogorakhe dogouok o.