Ibrani 1 - ALLAH ANE WENW KET MEKE WAROGO WOKNINAKHIKHE WENE

At Allah nen ane at a'but yogokhikhemo, at nen nit yoknisasikhe wene

¹ O muk haganeat, at Allah nen it ap at ane yogeisekhe lagoukha meke emenogo iki hibiku-yogoku, wene at ageikhe yogokhik, at ageikhe yogokhik, nekalok-nekalogat yogosugunem, it nen nit ninopa lak yakulisekhe lagoukha.

² Meke re, o ilugun oba, nit yogotak welago ya baga, Allah nen a'but yogokhikhemo, at nen nit yakulnisa ageikhe. At a'but iti, erloma Allah nen yi meke ti meke tha'bokhogonat winametdisikhe iti, ebe at a'but nenat winametdisikhemo, iteerek dogoagaluk meldisikhemo dogogin iti o.

³ Mulikin terlelek-werlelekhogon la'i agarek hak, Allah ebe hogorakharek meke iti nen, Yesus ebe la'i ageikhemo agat oba liarogo dogolik, opase alino hakene at welagarek iti. Itithogon dogolik, yi meke ti meke tha'bokhogonat welagarek iti, at ane obatne baga welagarek. Werekma, nit weak hagakhe lagagu meke arat horogo degetdisikhesik nen, Allah Etagapgoto kok meke etnogo baga dageisikhesik alilu iki ebeke kogat welagarek iti o.

Malaikat erlok dek negen meke re, Allah a'but anek he, kok motok welagarek wene

⁴ At Allah nen, it malaikat emenogo inetaga wema baga negen werek korlek, at Yesus anek etaga siakthek kok dogoagaluk thalinakhikhe hagat, it malaikat inebe wema baga negen werek korlek, Yesus ebe siakthek kok welagarek iti.

⁵ Allah nen at yogokhe dogolik, “Hat an na'burat o. Hebe yogotak itakhakhi,” iluk yogokhikhe iti hak, it malaikat meke ageikhe wene yigithogon yogeisasikhe nogo? Dek o. Nen ageikhe, “An he, at opase asigin. Nen, at he, an na'but asuak o,” iluk, it malaikat aperek yogeisasikhe nogo? Degat o.

⁶ Iti nen, at Allah nen a'but opakiat itago agat oba yoma usa'i ageikhe itinem, it malaikat yigithogon yogeisasikhe, “Hit an nagarumi malaikat tha'bokhogonat, at anek oba hakokthek dogolik hogorakhe dogono o,” iluk yogeisasikhe.

⁷ Nen ageikhe, it malaikat inobasik men isikhe, “An nen it malaikat inebe o hisakne hakene hagarogo 'bisigik, it yoko la'isegerek meke inebe hetu amulok hakene hagarogo 'bisigik, hagakherek,” iluk isikhe.

⁸ Meke re, a'but yogokhe dogolik, “Hat hebe Allah at dogolik, yi akhuni ti akhuni hagasik motok dogogin o. Hat kok itithogonat dogolik, wene mothogon anek moretdisekhe dogogin o.

⁹ Nen, hat hobabut, mothogon anek hagakhetek iti meke hagakhe dogolik, korlo hagakhe dogosak ha'it motok iti nen, hagarlak lak hinom welagathep meke inapma negen werek korlek, hat anek, hukuloak oba apusu tialogo an hopase nen meldagasigi iti nen, hakla arleken motok akhekhe dogono o,” iluk yogokhikhesik

¹⁰ wene ageikhe yigithogon yogokhikheat, “Hat Hetagapogoratma ebekeram nen, agat yi erlo walhigik, pogot hiki baga walhigik, hagakhiginat o.

¹¹ Tha'bokhogonat winametdisigin meke iti, su hakene momok atluk yabokane dek asigin mekeat, hat anek hikhok motok dogogin o.

¹² Pogot agat iti, su dikilogo 'begarek iti hak, hat nen dikilogo 'biluk, yabokane ket meke 'bigin mekeat he, hat hebe anek yi tahun ti tahun hagatlaga korlek, hebe yaman ageidek hikhok motok dogogin o,” iluk yogokhikhe.

¹³ Itithogon yogokhikhesik nen, ageikhe men yogokhikheat, “Akhuni hat hathili meke emenogo hisok nen al debelogo 'bisanok nen iluk, an nen aban 'bisa ageidek werek korlek, hat hebe an nalilu niki ebeke kok dogono,” iluk, it malaikat meke emenogo ageikhe yogokhikhe nogo a? Dek o.

¹⁴ Allah agarumi malaikat iti inebe, nikithogon hagakharek meke nogo? It inebe, nit Allah nen tilninabigin meke yomaknisekhe dogoagaluk, at nen inayoko 'biluk la'isa agarek mekeat o.