Galatia 1 - ALLAH ANE WENW KET MEKE WAROGO WOKNINAKHIKHE WENE

Heagei warinakhikhe wene

^1-2 Hit Allah a'buri o Galatia yi ai ti ai natogokhe lagap meke nagarlak lak nerugi. An Paulus nagarlak lak nerugi Allah a'buri aperek o yoma ninom welago meke inebe tha'bokhogonat ninom nen wene yi holal waganogo hinoba la'i ago iti. An nayoko 'biluk la'ani ageikhemo wagagi iti, erlo akhuni nen 'buk. Nen, ap ageikhe wene oba warogo 'biluk la'ani ageikhe 'bugat o. Meke re, at Yesus Kristus ebe watlageikhemo opase Allah nen ilugutdisikhe meke etnogo ipisak nenat nayoko 'biluk la'ani agoukhama wagagi iti.

³ Ninopase Allah men, ninoe Etagapogot Yesus Kristus men, ipisak inobabut hano etnogo nen hano meke wokhisigik, hinetaiken hapukhogon thethisik welageik, hagakhe dogoak o.

⁴ Nit weak hagakhorek iti nen ninopase Allah akla nen, “Itithogon hagasuak,” iluk akla apasikhe baga, at Yesus Kristus nen nit akhuni agat oba meke yoma tilninabigiluk, etaiken nenat nit ninobabut weak motok hagakhorek meke iti ukum at ekaerek nen oba 'bakhalok watlageikhe iti.

⁵ Iti nen, at Allah at hogorakho motok dogouok. Itithogon igi iti, “Ebeat asuak,” u hak, “Amin,” igi iti.

“Hano wene pere dek. Opakiat anek,” iluk yogeisasikhe wene

⁶ At Allah nen, hit Kristus obabut hano meke etnogo hinom hunik dogobageik iluk hinayoko 'bisikhe mekeat he, thogotdisalok ibat nomokhogon hano wene thalek ninat meke oba ebesi laga lagap iti, an nayuk.

⁷ Ebe re, wene hano wene ninat ageikhe welagarek dekmaat o. Mekeat he, it akhuni aperek nen hano wene Kristus nen hagakhikhe wene iti meke ninat hagarogo nukhethinabuogoluk yokhisiliogei iti nenat igi o.

⁸ Meke re, tha nen, it ap iti nen a, nit nen a, malaikat pogot oba meke nen a, hano wene nit nen yokhisasugu meke iti, thogotdisalok ninat meke, yokhisagun halok he, Allah nen homan 'bisoagat o.

⁹ Iti nen, wene haganeat yokhisasigi hak, yabokane dagakhogon yokhisak. Ap thani nen wene hit waganhigip meke etnogo thogotdisalok ninat meke yokhisa ago halok he, Allah nen homan 'bisoagat o.

¹⁰ An nane igi iti, akhuni nen, “Hat hano egen,” iluk yoknesuagaluk ekhe lagei a? At he, Allah nen, “Hat hano egen,” iluk, yoknesuagaluk ekhe lagei a. Akhuni inakla hanorogo ekhe lagei halok he, an nebe Kristus atuaneke usak degat o. Meke re, an Allah akla hanorogo ekhe lagei o.

“An Kristus nen itithogon nayoko 'biluk la'anhikhe,” iluk yogeisasikhe wene

¹¹ Nagarlak lak nerugi. An nen hano wene yogeisilik nekhe lagei iti, akhuni inane meke yogeisilik nekhe lagei dek iti hit hinilu asusagat o.

¹² Wene iti, akhuni nen woknekhik, yakulnekhik, isukhama waganhigi 'buk. Wene iti, at Yesus Kristus akla limago welageikhe meke, at nenat thelekmaat yakulnikhikhemo waganhigi o.

¹³ An alebat nit Yahudi meke ninawene a'bethogon hago dogolik, akhuni Allah a'buri meke yi aik ti aik hagarinakhik, inebe motok degetdisoagaluk nobatnerogon hagakhik, hagakhe lagagi meke iti, nabok hit hinasuk holhe lagagibat o.

¹⁴ Wene nit Yahudi meke ninopa lak nen yakulnisasukha meke etnogo hago dogolik, it an nagarlak lak ninom higit meke nen inakla puk negen hagakhe korlek, an anek, nobatnerogon hagakhe lagagi iti.

¹⁵ Itithogon mekeat he, at Allah obabut hano etnogo nen haganeat nagosa akla nen aban itaknakhidek werek korlegat, nebe wenaknakhikhe.

¹⁶ Wenaknakhikhesik nen, hano wene a'but Yesus hagakhikhe wene etnogo akhuni itikmanke meke yogeisilik nekhe dogoagaluk a'but ebe thelekma inugutneasikhemo, wene akhuni aperek inoba hinok waganhidegat o.

¹⁷ Nen, it aperek Yesus nen inayoko 'biluk la'isasikhe meke emenogo, o Yerusalem werekma inoba dageigidegat o. Meke re, o akhuni Arab meke inaila eloma lagagisik nen, yabokane napuke o Damsyik wagagi.

¹⁸ Wagagisik, 3 tahun welagagisik nen, yabokane Petrus etonogo ebe nilurogo iluk, oba o Yerusalem dageisigi. Dageisigisik nen, at aila niki 15 hari nen nipisak etoma welagagu.

¹⁹ Dogolik, it Yesus nen inayoko 'biluk la'isasikhe meke emenogo inebe aperek ninom abuk ageidek. Ninoe Etagapogot agot Yakobus etnogo anek nipisak abuk agagu.

²⁰ Wene an nen holal waganogo hinoba la'i agei iti, Allah il obaat eberogonat igi o. Nekalat igi dek o.

²¹ Etoma welagagisik nen, yabokane o Siria men, Kilikia men, wagagi iti.

²² Itinem, it Allah a'buri Kristus inom hunik dogolik, o Yudea natogosi lagoukha meke nen an nebe inokodegat welagoukha.

²³ Itithogon nebe inokodegat dogolik, it akhuni aperek nen nabok anek men isinem inasuk holhe lagoukha, “Ap alep nit yi aik ti aik hagatninakhik, hano wene degetdisoagaluk hagakhik, hagakhe lageikhe meke etnogo, yogotak akhuni hano wene etnogo eberogonat iluk waganuagaluk yogeisilik liliogo,” iluk isinem nabok inasuk holhe lagoukha.

²⁴ Itithogon holhe dogolik, an nobasik Allah hogorakhe lagoukha.