Filipi 4 - ALLAH ANE WENW KET MEKE WAROGO WOKNINAKHIKHE WENE

Ilugun oba arat inasuk wakhikhe wene

¹ Iti nenat, nagarlak lak nerugi. Hinebe nakmu o. Ninoe Etagapogot hinom hunik hinobatnerogon dogono. Hit hinobabut hagakhe lagap oba an nakla arleken akhigik, hogorakhigik, hagakhe dogolik, hinoba witluk nebe ninom dogolo o, iluk, apekhe lagei.

² Euodia, Sintike, nerugi o. Hipisagat ninoe Etagapogot hinom hunik dogolik, hinetaiken opakiat meke ebekhe dogobageik iluk nane nobatnerogon yokhisigi iti o.

³ Nen, hat nagarlak ageikhe Allah ayabu nipisak hunik motok hagakhe lago etnogo, it humi inebe pere iti yomageisanogoluk yokhikhi iti o. It humi iti inom, ap Klemen etnogo inom, it ato an ninom Allah ayabu opakiat hagakhe lago meke emenogo inom, hano wene ninobatnerogon ninom yogeisilik nekhe lago meke ninetaga tomok, at Allah aruesika baga naburlal-haburlal hagarinabigin meke inetaga holal waganogo 'bekherek etnogo baga, waganek werek.

⁴ Halok he, nagarlak lak nerugi. Hit ninoe Etagapogot hinom hunik dogolik, hibiku-yogokuat hinakla arleken akhasi motok dogono. Yabokane nane ageikhe dagakhogon yokhisagat, Hinakla arleken akhasi motogat dogono.

⁵ Ninoe Etagapogot etnogo ibat wisigin iti, akhuni tha'bokhogonat nen hit hutdinagouagaluk, hinobabut yamukhogon hagakhe dogono.

⁶ Yi meke ti meke hasik wene munini uan 'bero ebekhidek, tha'bokhogonat hasik Allah ayoko 'bekhe dogolik heagei warogo kino yogokhe dogono.

⁷ Itithogon yogokhe dogogun halok, Kristus Yesus hinom hunik welagathep iti nen, at Allah nen akhuni nen hutdusak dek meke elalinat hinetaiken hapugutdinagagik, wene munini ebekhe lagap meke iti, at nenat thebelogo hakhisik dogogin o.

⁸ Nagarlak lak nerugi. Wene ilugun oba yi ageikhe yokhisak. Hinakla ebekhe dogolik, hanorogon hagakhik, hogorinabusak meke hagakhik, hagariogei meke oba ebekhe dogono. Iti ebe re, wene eberogonat meke oba ebekhik, hogorasusak meke oba ebekhik, mothogon hagakharek meke oba ebekhik, weak meke thogotdiluk hano anek hagakharek meke oba ebekhik, inobabut heanerogon hagakharek meke oba ebekhik, inoba la'buk usak meke oba ebekhik, ebekho motogat dogono.

⁹ Wene an nen yokhisugunem hinasuk holhik, an hagakhunem hinileken niigik, hagakhe dogolik, wene waganhigisip nen yakulhigip meke etnogo mothogonat hagakhe dogono. Itithogon hagakhunem, Allah ninetaiken hapugutdinanherek meke etnogo nen hakhisik dogogin o.

Allah a'buri o Filipi meke nen Paulus yomakhasukhama heagei warinakhikhe wene

¹⁰ Hit alebageik, an noba ebetdiluk yomakneasigisip nen, yabokane noba eberek welagap mekeat he, nikithogon yomakneau heat welagagisip nen yogotak yomakneegep iti nen ninoe Etagapogot nipisak hunik dogolik nakla arleken motok akhekhe lagei.

¹¹ An yi meke ti meke dek halok, werek halok, nakla hano anek dogosak iluk arat yakulasigi iti nen, yi meke ti meke warlok nen kino yokhisigi 'buk.

¹² An he, inerlageik welageikharek iti niluat, inameke doalegat welageikharek iti niluat. Hipiri abu baga inom, na'itmo inom, yi meke ti meke doalegat werekma, dekma, iti an walhasigisikmo nogo nen tha'bokhogonat hano anek apegerek o.

¹³ At Kristus nobatnetnakhe korlek nogo nen, yi meke ti meke weak agunem inom, hano agunem inom, erlok hagakhe dogosak anek.

¹⁴ Erlok hagakhe dogosak meke re, an nerlageik werekma, hit nen yomakneegethep iti hano motok o.

¹⁵ Hit Allah a'buri o Filipi meke nagarlak lak nerugi. Ebekeram, an hano wene yogeisilik nekhe dogeigiluk, o Makedonia nen wagunem, Allah a'buri o hetlake nen yomakneekhe lagoukha degat meke re, hit anek ninom hunik dogolik, yomakneugunem horlekhe lagagi iti hiniluat o.

¹⁶ An o Tesalonika eloma yi meke ti meke degat werekma, alebageik ageikhe laknisi agagisip nen, yabokane ageikhe laknisi agagip iti.

¹⁷ Meke re, itithogon yomakneekhe lagap mekeat he, laknisi agunem waganhe dogosak iti hasik kogotdekhe lagei 'buk. Hit oko horlau hak, Allah nen ebe hano meke wokhisugunem hit ite asubageik iluk kogotdekhe lagei o.

¹⁸ Yogotakne, hit nen yomakneegepma, horligirik, an tha'bokhogonat warlok apekhe lagei meke erlok agasik ato titu agaat. Ap Epafroditus oba 'begepma woknisi agama nen, nameke werek aga o. Hit nen an yomakneegep iti, domba Allah hasik warogo hetu hunekhe dogolik obasi hano meke liakhunem, at akla hano agarek hak, itithogon yomakneegepma, at Allah akla hano aga o.

¹⁹ Nen, hit yi meke ti meke hinerlageik werekma, an nopase Allah hogorakherek meke Kristus Yesus ipisak hunik dogolik inilmo horleak nen hogorakharek meke etnogo nen, wokhisugunem hinilmo horleak asugunat o.

²⁰ Halok he, ninopase Allah hogorakho motok dogouok o, iluk “Amin,” igi iti.

Paulus nen wene ilugun oba arat heagei warinakhikhe wene

²¹ Hit Allah a'buri Kristus Yesus hinom hunik welagathep meke hinebe tomok tha'bokhogonat heagei wathinakhi o. Halok he, it aperek yogeisano. Iti hak, an nagarlak lak nerugi Allah a'buri ninom welago meke yoma aperek nen heagei wathinakhaat o.

²² It Allah a'buri o yoma welago meke tha'bokhogonat dapukhogon nen heagei wathinakhaat o. Heagei itithogon wathinakhe dogolik, ebe kok hakene, it at kok Kaisar inom welageikharek meke nen heagei wathinakhaat o.

²³ Halok he, nagarlak lak nerugi. Ninoe Etagapogot Yesus Kristus obabut hano meke etnogo nen hinetaikenma dogolik thethisik dogoak o.