Filipi 3 - ALLAH ANE WENW KET MEKE WAROGO WOKNINAKHIKHE WENE

“Alep hagakhe lagagi iti, nuk aga lagagimo, iluk, yabokane ket meke hagakhe lagei,” iluk yogeisasikhe wene

¹ Nagarlak lak nerugi. Wene ilugun oba yokhisak nen ninoe Etagapogot hinom hunik dogolik, hinakla arleken akhekhe dogono, iluk igi iti o. It aperek nen weagathinakhidek hinebe hano dogobageik iluk, wene alep holal waganogo la'i agei mekeat, nape ale ageidegat yabokane nane dagakhogon yokhisageinat o.

² It akhuni aperek inobabut yeke helo yeke obabut hakene iti nen, yi meke ti meke hasik weak hagakhe dogolik, “Hinoado aperlagap meke palogo la'isano,” iluk hinakla kagalisunogo nen hinobabut hebelogo dogono.

³ Nit he, ninoado aperlagap meke arat palek dogou hak, ebe meke hagakhe lago. Allah Agoreke nen ninakla kagalho korlek, Allah ebe hogorakhik, Kristus Yesus ninom hunik welago, iluk, hogorakhigik, hagakhe dogolik, yi wene ti wene ninoado itikmanke yi hasik hagakhorek iti baga hanotninabigin iluk apekhe lago dek o.

⁴ Ninoado itikmanke yi hasik hagakhorek iti baga hanotninabigin iluk apausak erlok dogolepma, it akhuni aperek nen erlok dek negen apekhe korlek, an anek he, kok negen apekhe dogole.

⁵ An nebe itaklagagimo iniki 7 hari welagoukhasik nen, iniki ageikhe baga noado aperlagap meke palnakhukha iti o. Nebe Israel meke, nukuloak etaga Benyamin mekeat, nagosa nopase Israel meke nogo nen, nebe Ibrani ebe Ibrani mekeat itaklagagi iti o. Wene Allah nen ninasuk wakhikhe meke etnogo hasik, ap Farisi meke nen herogo welageikharek hak, nobatnerogonat herogo welagagi meke.

⁶ Allah hasik akilukhogon hagakharek meke iti, an itithogonat hano hagakhe lagei thalek, Allah a'buri inetaiken Yesus oba hakotdisukha meke yi aik ti aik hagarinabik nekhe lagagi iti o. Itithogon hagakhe dogolik, wene Allah nen ninasuk wakhikhe wene etnogo mothogon hagakharek iti, an motok mothogonat hagakhunem, akhuni aperek nen wene noba 'busak degat karelek motok welagagi.

⁷ An alep itithogon hagakhe dogolik, “Thaburekhe lagei,” iluk apasigi mekeat he, yogotak Kristus ebe waganhirik oba nen, “Alep hagakhe lagagi iti, weat alomarogo hagakhe lagagimo higi,” iluk hutdekhe lagei o.

^8-9 Itithogon hutdekhe lagei iti anek 'buk. Noe Etagapogot Yesus Kristus nilu agagi iti hano motogat o. Yi meke ti meke ninat meke hagakhe lagagi iti, weat alomarogo hagakhe lagagimo iluk, hutdekhe lageiat o. At ebe horlalok nen, nipisak hunik motok dogouogoluk, yabu aleke karelogo ulakharek hak, yi meke ti meke alep hagakhe lagagi meke iti, “Weat meke,” iluk here'isasigi iti o. Wene Allah nen ninasuk wakhikhe wene iti baga, nekaerek nen mot hagakhe lagei 'buk. It akhuni aperek inetaiken Kristus oba hakotdisinem, wene inoba meke korogo wokhalok yabokane Allah inom hunogo 'bisekherek hak, an itithogonat netaiken at oba hakotdisigimo, wene noba welageikhe meke korogo wokhasikhe iti o.

^10-11 At Kristus yi aik ti aik hilik-hilik watlageikhe hak, nipisak tak-tagat, an itithogonat aik hilik-hilik, watlasusagat apekhe lagei. Itithogonatma re, at watlageikhesikmo, Allah obatne baga ilugutdisikhe hak, an itithogonat watlatlukmo, niligutnabigin, iluk, oba eberegat welagei o.

“An horlagaluk apigi meke iti horla lagaluk nobatnerogon laga lagei,” yogeisasikhe wene

¹² Meke re, an yogotak ya, netaiken motok hanoat ageik, ebe hano meke iti arat horligik, igi 'buk. Aban o. Hano meke iti an horloagaluk, Yesus Kristus nen nebe woknakhikhe iti nen, ebe horla lagaluk, nobatnerogon hagakhe lagei o.

¹³ Nagarlak lak nerugi. An iti ebe arat horligi iluk nakla apekhe lagei degat. Iti horla lagaluk wene opakiat meke yiat hagakhe lagei. Iti ebe, alep hagakhe lagagi meke, nobabut hebelatluk, noporlik kamotdisalok, yabokane ket meke nelokhoma werek meke iti horla lagaluk nobatnerogo mutluk laga lagei.

¹⁴ Kristus Yesus nipisak hunik werekma, at Allah nen nayoko 'bekhe dogolik, “Hano meke pogot oba meke wokhesigin,” iluk abok yoknikhikhemo, ebe horla lagaluk, tha ae 'busak tha ae 'busuk pirlirli lageikharek hak, nobatnerogon mutluk laga lagei.

¹⁵ Halok he, nit ninetaiken arat horle aga meke yi, wene iti hasik hutdekhe dogouok. Itithogonat meke re, hit hinetaiken wene werlek meke oba ebekhe lagap halok he, hutduagaluk at Allah nen hutukhogon yokhisageinat o.

¹⁶ Mekeat he, yogotak ninobabut wene iti hutdiluk hagarik waga lago hagat, itithogonat hagarik laga dogouok o.

¹⁷ Nagarlak lak nerugi. Hit hinobabut an hagakhe lagei hak, nobabut waganogo, itithogonat hagakhe dogolik, it akhuni aperek nen nit ninobabut waganogo hagariogei meke iti, hinileken woginakhe dogono.

¹⁸ An alebageik he, niki eran-alep yokhisasigi hagat, yogotak nane yabokane dagakhogon yokhisagat o. Akhuni inebe doalegat nen, “Kristus nit ninobasik o baga meldiluk wakhukha etnogo, nina'it,” iluk inom wim palek negen dogolik inobabut korlo hagariogei meke iti hasik inuak de aga dogolik yokhisekhe lagei o.

¹⁹ It iti inetaiken Allah oba hakotdiluk dogosak mekeat he, inoba agaken dageiluk hagakharek iti meke baga hakotdiluk dogolik, inekarli asusak mekeat he, hano thalek iti hasigat inekarli dek hogorakhiliogei iti o. Itithogon hagakhe dogolik, inetaiken yi warlok ti warlok, wene agat oba meke oba eberiogei iti, ilugun oba arat nuk asugun o.

²⁰ Itithogon meke re, nit ninai erlo pogot oba werek o. Ninai erloma etoma nen, ninoe Etagapogot Yesus Kristus yabokane tilninabisigin iti therogo welago.

²¹ At ebe witluk nen, ninebe ninekarli negen welago yi, at obatne baga yi meke ti meke tha'bokhogonat, at apma 'bisagein iti nen, at ebe hogorakharek hagat, nit ninebe hogotninabusak mekeat hagarogo 'binanigin o.