Efesus 6 - ALLAH ANE WENW KET MEKE WAROGO WOKNINAKHIKHE WENE

Yekerugi inagosa inopase lak inom dogolik inobabut hagakhe dogosak wene

¹ Hit yekerugi hinobabut he, ninoe Etagapogot hinom hunik dogolik, hinagosa hinopase lak, inane hologo hagakhe dogosak iti nen, itithogonat hagakhe dogono o.

² Wene Allah nen ninasuk wakhikhe etnogo baga, wene alebageik ninasuk wakhe dogolik, “Hit nen yigithogon hagasusak, tigithogon hagasusak,” iluk ekhe dogolik, “Yabokane hanothinabigin,” iluk, alebageik abok ageikhe inom igidek. We, “Hinagosa hinopase lak inalonerinakhe dogono,” iluk isikhesik nen,

³ abok men yogeisasikhe, “Itithogon hagakhe dogoumo, hinebe hano welageik, agat oba yoma hiniluk ageikhe inomhogo welageik, dogogun o,” iluk, yogeisasikhe itiat o.

⁴ Nen, hit inopase lak nen meneke, yi meke ti meke hina'buri inakla aga dagousak meke hagakhup o. At he, ninoe Etagapogot nen ninasuk wakhik, ninetaiken thebelhik, hagakherek hak, hit nen hina'buri itithogonat hagarogo inebe kogorinakhe dogono o.

Inatuaneke meke inopase lak inom nen, inobabut hagakhe dogosak wene

⁵ Hit akhuni inatuaneke meke nen he, Kristus ane hologo hinetaiken opakiat hinayukhogon dogolik hagakhethep hak, hinopase lak koktek inane hologo inalonhogo hagarinakhe dogono.

⁶ It nen thethisik werek korlek anek akhuni meke inakla hanorogon hagakhe dogogup. Hinakla nen he, “Kristus atuaneke dogolik, Allah akla warlok apekherek meke itiat hagakhe dogouok,” iluk, hinakla ebetdiluk nen hagakhe dogono.

⁷ Hinakla nen, “An akhuni meke anek inapma welagei 'buk. Ninoe Etagapogot apma welagei,” iluk, hinakla arlekenhogo hagakhe dogono o.

⁸ Hinobabut hano hagakhe dogogun halok, ninoe Etagapogot nen, hit inatuaneke meke, hinasokneat welagap meke hinomat, hinebe tomok oko wokhisagein o.

⁹ Nen, hit inopase lak koktek meneke, hinatuan meke hasik, itithogonat hagakhe dogono. “Hasigin,” iluk papagathekhe dogogup. Hinakla nen he, “An natuaneke meke ninomat, ninoe Etagapogot pogot oba werek meke etnogo nen, nit ninobasik, At iti kok. Nen, at iti kepu, iluk, ekherek dek. Ninom tak-tagat hagatninakherek,” iluk, hinakla eberek dogono o.

At Iblis ninom wim yakhe dogouok nen iluk yi meke ti meke ninoado labesusak wene

¹⁰ Ilugun oba wene yi yokhisak. Ninoe Etagapogot hinom hunik dogolik, at obatne motok horleak etnogo baga, hinobatne hagatlarik dogono o.

¹¹ At Iblis obabut kauk meke etnogo nen weagathinabigiluk wagunem, wim yabuogoluk thin ikharek hak, hit hinebe metegat dogouogoluk, at Allah nen yi meke ti meke woknisekherek meke iti tha'bokhogonat hinoado laberogo dogono o.

¹² Nit wim negen yakhe lago iti, akhuni meke ninom yakhe lago 'buk. Dek o. At he, kok meke, inane werek meke, o mummo agat oba yoma hagasik welageikharek meke, mokat inobabut weak meke pogot oba hogolkerlek agat oba hogolkerlek werekma ninom yakhe lago.

¹³ Halok he, weak meke nen weagathinabi agunem wim hinilhaoak a'bet weak metegat dogoluk, arat yabiluk nen metek dogouogoluk, thin ikharek hak, Allah nen yi meke ti meke woknisekherek iti meke itno.

¹⁴ Wim hinom yabubageik nen i'biluk metek dogosak he, ebe yi. Therlok isu hak, wene ebe wene itiat ikhik, hinamik oak oba isu hak, Allah akla warlok meke anek mothogon hagakharek iti meke ikhik,

¹⁵ hinisok sepatu isu hak, Allah nen ninebe dapukhogon 'binanherek iluk, hano wene iti wolok luogoluk, inobabut, “I o. An ligin,” iluk egarek iti meke ikhik, itno.

¹⁶ Marle pisinerisugunem piokhogon loagaluk, o tha'belek inikimo wolok lageikharek hak, inetaiken Allah oba hakotdiluk welageikharek iti meke hibiku-yogokuat wolok nekhe dogono. Wolok lagunem, Iblis obabut weak meke etnogo nen hetu marle ilugun oba hunogo pisinethisugunem, hinetaiken Allah oba hakotdiluk dogogun iti baga erlok nagulhe dogosagat o.

¹⁷ Inukuloakma inasunogo iluk, inukulasu a'bet meke thalharek hak, Allah nen tilninakherek iti mekeat waganiluk thalino. Itithogon thaldiluk nen, wim yabuogoluk karok inikimo wolok lageiharek hak, Allah ane, Agoreke nen woknisekherek iti meke wolok laga dogono o.

¹⁸ Itithogon tha'bokhogonat hagakhe dogolik, Allah nen yomakhisoagaluk sembayan ekhe dogono. At Agoreke hinakla dogolik hinakla kagaligin hagat, hibiku-yogoku sembayan Allah ayoko 'bigik, kino yogokhik, isi motogat dogono. Itithogon ekhe dogolik, hinakla puk ageidek, hinobabut hebelek motok dogono. Itithogon dogolik, Allah a'buri tha'bokhogonat inobasik sembayan Allah ayoko 'bekhe dogonoat o.

¹⁹ Itithogon ayoko 'bekhe dogolik, an nen hano wene Allah akla limago welageikhe meke iti, at nen yakulnekho korlek, nane pakhogon yogeisekhe dogeik nen he, hit nen Allah ayoko 'bekhe dogonoat o.

²⁰ Wene iti yogeisekhe dogoagaluk at Kristus nen nayoko 'biluk la'ani ageikhemo an witluk yogeisekhe lagei iti hasik niki herle warogo 'banhama welagei. Itithogon dogolik, an nayuk dekhogon hano wene iti yogeisekhe dogosak tak-tagat yogeisekhe dogeik nen, sembayan an nobasik ekhe dogonoat o.

Wene ilugun oba arat heagei warinakhikhe wene

²¹ Wene an nebe yoma welagei meke inom, hagakhe lagei meke inom, hit hinilurogon, ninagarlak Tikhikus nakmu meke, ninoe Etagapogot hasik etaiken hupukhogon hagakho welagarek meke etnogo nen wene tha'bokhogonat yokhisa isigin iti o.

²² Nit ya dogolik hagakhe lago meke hinilu atluk nen, hinetaiken thebelogo dogobageik iluk hinoba la'i agei iti o.

²³ Ninopase Allah inom, ninoe Etagapogot Yesus Kristus inom, ipisak nenat, hit nagarlak lak nerugi Allah a'buri tha'bokhogonat hano dapukhogon 'binageigik, akhuni inakmurogon welageikharek meke iti wokhisigik, inetaiken at oba hakotdiluk welageikharek meke iti inomat wokhisigik, hagasuak o.

²⁴ Hit ninoe Etagapogot Yesus Kristus kolelogo here'igidek, hinakmu motok dogogun meke tha'bokhogonat, Allah obabut hano etnogo nen hakhisik dogoak o.