Efesus 3 - ALLAH ANE WENW KET MEKE WAROGO WOKNINAKHIKHE WENE

Wene Allah akla limago welageikhe meke Paulus nen akhuni itikmanke meke yogeisoagaluk ayoko 'bisikhe wene

¹ Iti nen, an Paulus hit akhuni itikmanke meke Kristus Yesus nen tilhinabuagaluk, at hasik niki herle warogo 'banhama welagei o.

² Akhuni nen he, “Allah obabut hano etnogo nen, it akhuni o Efesus meke hano asuagaluk, at Paulus ayoko 'bisikhemo hano wene yogeisilik liliogo,” iluk isinem hinasuk arat holhigip apigi.

³ Wene at Allah akla limago welageikhe meke iti, an pakhogon yakulnikhikhe, iluk, holal 'beroat waganogo yakulhisasigi apigi o.

⁴ Hit nen wene iti etaga thalhe dogolik, “Wene Kristus hasik limago welageikhe meke iti, at Paulus ilu agasik werek o,” iluk, ekagat hutdugun iti o.

⁵ Haganeat nen he, wene iti akhuni aperek pakhogon yogeisigidekma, inokodegat welagoukhama, yogotak Allah Agoreke nen, it ap Allah a'buri Yesus nen inayoko 'biluk la'isasikhe meke emenogo inom, Allah ane yogeisiliogei meke emenogo inom, pakhogon yakulisasikhemo inilu agoukha iti, wene ebe yigithogon.

⁶ Hano wene iti baga, it akhuni itikmanke meke inom, Yahudi meke inom, inom tak-tagat iteerek hagatlageik, Kristus ebe opakiat meke ninom tak-tagat hunogo 'binanhik, hagakhemo welago. Wene haganeat Allah nen, “Itithogon hagathinabigin,” iluk abok yoknisasikhe etnogo baga, “Akhuni itikmanke meke Kristus Yesus inom hunik werekma hano wene iti baga ninom tak-tagat hagatninabigin,” iluk, ninilu aga iti o.

⁷ An akhuni inatuaneke negen dogoli, wene iti supurisekhe dogoagaluk, Allah obabut hano nen obatnerogon hagatninakherek tak-tagat nayoko 'bisikhe iti o.

⁸ Allah a'buri meke tha'bokhogonat inetaga werek hak werek korlegat, an netaga dek, erlok dek meke, at Allah obabut hano nen, hano wene pilinerogo usak erlok dek meke, Kristus nen wogeisekherek etnogo akhuni itikmanke meke yogeisilik nekhe dogoagaluk nayoko 'biluk nayabu iti woknikhikhemo welagei.

^9-10 At Allah yi meke ti meke tha'bokhogonat winametdisikhe meke etnogo nen apekhe dogolik, Ebe itithogon hagatlasigin, iluk, wene akla limago welageikhe meke, akhuni tha'bokhogonat thelekmaat yogeisilik nekhe dogoagaluk nayoko 'bisikhe iti o. Nen, it ap malaikat pogot obake yoko nekharek meke emenogo inougi koktek inom, inane hologo welageikharek meke inom, nit Allah a'buri nen, “At Allah yi meke ti meke hasik akla motok kagalek,” iluk yogeisugunem yogotak ya inilu asuagaluk, haganeat nen wene iti Allah akla limago motok welageikhe.

¹¹ Erloma, at Allah nen yigithogon hagatninabigiluk akla apasikhe meke iti, at ninoe Etagapogot Kristus Yesus nen hagasuagaluk la'i ageikhemo, ebe hagakhikhe iti o.

¹² Nit ninetaiken at oba hakotdiluk, at ninom hunik dogolik, ninayuk dekhogon ninetaiken hapukhogon Allah oba ukusak iti o.

¹³ Iti nen he, an yogotak ya hit hinobasik weagatnabiogei iti nen hinakla puk ageidek dogogun halok, hogothinabugun iti nen, hinasuk warogo yokhisigi iti o.

At Paulus nen Allah ayoko 'bigik, ebe hogorakhik, hagakhikhe wene

¹⁴ Iti nenat, an ninopase elokhoma nitibagal yukukhogon ayoko 'bekhe lagei o.

¹⁵ It pogot oba welageikharek meke inom, nit agat oba yoma welagorek meke inom, ninopase lak tomok yogeisekhe dogolik, “Ninopase,” iluk, ogorek iti, ninopase erlo Allah meke oba lisogon ogorek iti o.

¹⁶ At Allah yi meke ti meke ilmo motok horleak iluk u hak, hogorakho welageikharek etnogo nen, Agoreke oba hinobatnerogon hinetaiken horlethinabuagaluk ayoko 'bekhe lageiat o.

¹⁷ Hinetaiken at Kristus oba hakotdumo, at ebe hinakla ai halogo werekma, yi meke ti meke ai yakhunem omaken yakhik, o herlaga obatnerogon 'bigik, hagakharek hak, hinobabut akhuni aperek inebe inakmurogon welageikharek iti meke baga hinomaken ya'iluk a'bethogon dogobageik iluk, Allah ayoko 'bekhe lageiat o.

^18-19 Akhuni nen o haluogoluk, hurli uanat meke iti baga, 'beroat meke iti baga, uroak liabugun iti baga, herlaga 'bugun iti baga, iluk walhegarek mekeat he, ninebe Kristus nen akmurogon welagarek iti meke, “Hurli iti baga,” iluk walhausak erlok dek. Kogat o. Walhausak erlok dek mekeat he, Allah a'buri tha'bokhogonat hinom mothogon hutdubageik nen, Allah nen hinetaiken horletdisinem, at ebe abit motok 'bogokhogon hinakla kerlekhogon dogoagaluk ayoko 'bekhe lageiat o.

²⁰ At Allah at hogorakhe dogouok o. At ebe ninakla dogolik obatnerogon hagatninakherek iti motok kogat iti nen, nit nen ninakla ebekhik, kino yogokhik, ogorek meke tak-takhogon hagakhidek, ageikhe inom kokhogon hagatninakherek iti.

²¹ Nit Allah a'buri natogokhorek meke tha'bokhogonat Kristus Yesus ninom hunik dogolik inebe aperek yabokane meke ket itaklarik laga korlek, Allah eberogonat hogorakho motok dogouok, iluk, “Amin,” igi iti o.