A'bikaka 7 - ALLAH ANE WENW KET MEKE WAROGO WOKNINAKHIKHE WENE

Akhuni Israel meke hinukuloak etaga dopok sirlo negen inilhaoak oba 'bisasukha wene

¹ Itithogon nileken hisigirik oba nen, oporlik he, ap malaikat inebe 4 oba pogot erlomake-erlomake upuke-wemake ilike-yike hisakne hubetha wagarekmake, ilugun thebelek metek dogolik, hisakne 4 nenat agat obake hubetha waga dogolik oka aborlogotdigik, i laut yekelekmake hubetha ageik, hagasunogo iluk iniki hago werekma lageisigi o.

² It itithogon werek korlek, malaikat ninat ageikhe o mulikin dagei agarekma eloma nen Allah iluk motok welagarek meke asirlo wolok dukhi agasik, Allah nen it malaikat inebe 4 oba agat inom, i laut yekelek inom, weagatduagaluk iteerek 'bisasikhe meke emenogo men yogeisugunem holhi,

³ “Nit nen, it ninopase Allah atuaneke meke ninetai ekerlogo Allah asirlo negen inilhaoak oba aban 'bisigidek welago iti, agat inom, i laut yekelek inom, o koktek inom, weagatdusak dek o,” iluk yogokhikhe.

⁴ Itithogon yogokhikhesik nen, akhuni Israel nen itago meke inukuloak etaga dopok tha'bokhogonat inetai ekerlogo Allah asirlo negen inilhaoak oba 'bisilik lageikhesik, “Inebe hurli 144.000 oba nen sirlo negen 'bisilik lagoma,” iluk isinem holhi o.

^5-8 Nen, it inilhaoak oba sirlo negen 'bisega iti inebe, it akhuni inukuloak etaga Yehuda meke 12.000 oba, nen, it akhuni inukuloak etaga Ruben meke 12.000 oba, nen, it akhuni inukuloak etaga Gad meke 12.000 oba, nen, it akhuni inukuloak etaga Asyer meke 12.000 oba, nen, it akhuni inukuloak etaga Naftali meke 12.000 oba, nen, it akhuni inukuloak etaga Manasye meke 12.000 oba, nen, it akhuni inukuloak etaga Simeon meke 12.000 oba, nen, it akhuni inukuloak etaga Lewi meke 12.000 oba, nen, it akhuni inukuloak etaga Isakhar meke 12.000 oba, nen, it akhuni inukuloak etaga Zebulon meke 12.000 oba, nen, it akhuni inukuloak etaga Yusuf meke 12.000 oba, nen, it akhuni inukuloak etaga Benyamin meke 12.000 oba, nen, Allah asirlo negen inebe dopok itithogon inilhaoak oba 'bisegasik nen, “Hurli iti hurli nen 'bisogoma werek,” iluk isinem holhi o.

Akhuni inebe doalegat iniki wenasusak erlok dek natogorlek werekma ileken hisasikhe wene

^9-10 Itithogon higirik oba nen, oporlik nileken hisigirik nen, yi akhuni ti akhuni inukuloak etaga tomok, inoado tomok, inai tomok, inane tomok, inasu kut uatek ugu meke, akhuni nen etai wakhe dogolik, ya'beka thoporlogo inikimoke waganharek iti hak, oka meke inikimoke wolok, Allah kok welagarekma obolukmo etoma Domba Eak ipisak welageikharekma iniloba natogorlek inebe hurli yi baga iluk, iniki wenasusak motok erlok dek dogolik, inane kokhogon men ekhe lageikha, “Ninopase Allah kok hobolukmo welagatek meke, u a e, Eak hipisak, u a e, Tilninakherek erlo, u a e, Hirat welagathep, u a e,” iluk etai wakhe lageikha hisigi o.

¹¹ Iti hagat, Allah kok welagarekma obolukmo ebe turlem werek korlek, it ap inarluetek emenogo inom, it Allah nen winametdisasikhemo iniluk welageikharek meke aperek inebe 4 emenogo inom, aliluke dagakhogon werek korlek, it malaikat inebe tha'bokhogonat inabel itikmanke dagakhogon dogolik, inelokhe thogoum Allah apma ukiluk hogorakhe lageikha.

¹² Itithogon hogorakhe dogolik, men ekhe lageikha, “Ebeat asuak u hak, Amin, u a e, Ninopase Allah harligat kok, u a e, Yi wene ti wene hilu motok dogolik, u a e, Hat hobatne baga haknisik welaganma, u a e, Heagei wathakhik, hogothakhik, u a e, Halon halhik, kogotdageigik, u a e, Hagakho motok dogogun iti, u a e, Ebeat asuak u hak, Amin, u a e,” iluk ekhe lageikha hisigi.

¹³ Itithogon ekhe korlek, it ap inarluetek emenogo meke ageikhe nen nitema waganhe dogolik, “It akhuni inasu kut uatek meke ugu yoma thani? Nen, o koma nen wageikha?” iluk nitema waganhe.

¹⁴ Nitema itithogon waganhunem nen, an nen he, “Noe, an nokodek. Hat anek hilu welagan o,” iluk yogokhunem, at nen he, men yoknekhe, “It akhuni yoma agat oba werekma akhuni aperek nen yi aik ti aik doalegat hagarinakhunem, Allah nen tilinakhikhemo, inasu Domba Eak amep oba arat kut motok thobalega meke o.

¹⁵ It itithogon hagakhasikmo nogo nen, Allah kok welagarekma obolukmo ebe werekma il oba metek dogolik, at ai halekma at hasik dikene hibakone hagakho motok werekma, at kok welagarekma obolukmo werek etnogo nen, akhuni mo aik nen inasunogo iluk, o halharek iti hak, at ebe nen it thalogo hagasik dogogin o.

^16-17 Itithogon 'bisamo werekma, Domba Eak etnogo Allah kok welagarekma obolukmo ebe tumo dogolik, akhuni nen wam konharek iti hak, it therisik motok dogolik, i akhuni inebe inilugurinakherek meke noagaluk, i elesimo wogosik lageik, Allah nen inil apusu hokhik, hagakhe dogogin iti nen, hipiri inom, i inom, abu aga dogogun motok dek o. Nen, mo inom, hetu inom, aik nen yagalinakhe dogogin motok degat o,” iluk yoknekhe.