A'bikaka 6 - ALLAH ANE WENW KET MEKE WAROGO WOKNINAKHIKHE WENE

Sirlo 'begarek iti hak apusu tetnekhogon 'bisukha meke Domba Eak nen 'bukalhikhe wene

¹ Itithogon higirik oba nen yabokane, sirlo 'begarek iti hak, thuesika uanat meke iki apusu ebe 7 baga tetnekhogon 'bisukha meke etnogo, Domba Eak etnogo nen ageikhe alebageik 'bukalhunem, it Allah nen winametdisasikhemo iniluk welageikharek meke inebe 4 oba emenogo meke ageikhe nen, “Eme o,” iluk ane pogot ane hakene isinem nasuk holhi o.

² Itithogon isinem, nileken lakhigi meke, ap ageikhe sikhe wolok kare-kare ap inetagapogot ikharek meke ukuloakma i'begama, kuda isi kut meke apot oba yasukhogo dogolik, o thebeligiluk thebelik lagunem lakhigi o.

³ Nen, sirlo 'begarek iti hak, thuesika uanat meke iki apusu tetnekhogon 'bisukha meke etnogo meke, at Domba Eak etnogo nen ageikhe alebageik 'bukalhesik oba nen, oporlik ageikhe 'bukalhunem, it Allah nen winametdisasikhemo iniluk welageikharek meke emenogo ageikhe alebageik ane ekhesik oba nen oporlik ageikhe nen ekhe dogolik, “Eme o,” iluk isinem holhi o.

⁴ Itithogon isinem, kuda isi morla meke lagunem lakhigi. Ap ageikhe kuda iti apot oba yasukhogon lagunem men yogokhama holhi, “Akhuni agat oba meke inoba dapukhogon dogosak dek. At he, akhuni ageikhe nen ageikhe wakhik, wat-wat hagakhe dogoagaluk, hat iteerek 'bagago,” iluk karok kok meke wogokhama kuda etnogo apot oba yasukhogon lagunem lakhigi o.

⁵ Nen, sirlo 'begarek iti hak, thuesika uanat meke iki apusu tetnekhogon 'bisukha meke etnogo, Domba Eak etnogo nen pere 'bukalhesik oba nen ageikhe 'bukalhunem, it Allah nen winametdisasikhemo iniluk welageikharek meke emenogo, inebe pere arat inane egasikmo nen, ageikhe ane ekhe dogolik, “Eme o,” iluk isinem holhirik, lakhigi meke, kuda isi mirli meke ageikhe lagunem lakhigi. Nen, ap ageikhe akin walhegarek meke ikimo wolok kuda iti apot oba yasukhogon lagunem lakhigi o.

⁶ Itithogon lagunem lakhigirik nen, nasuk holhi meke, it Allah nen winametdisasikhemo iniluk welageikharek meke inebe 4 emenogo inakla nen akhuni inane hakene meke men ekhe, “Beras hakene gandum eken iti meke akin walhegarek meke isoak opakiat 1 liter anek ukharlogo, oko yabu iniki opaki hasik hagakhunem iniki oko wogeisegarek iti hak, tha'bokhogonat 'busagat o. Nen, hupak eken hakene etaga jelai iti meke akin walhegarek meke isoak 3 liter anek ukharlogo, oko yabu iniki opaki hasik hagakhunem oko wogeisegarek iti hak tha'bokhogonat 'busagat o. Itithogon mekeat he, minyak zaitun apusu inom, anggur apusu inom, iti anek he, weagatdusak dek o,” iluk isinem holhi.

⁷ Nen, sirlo 'begarek iti hak, thuesika uanat meke baga iki apusu tetnekhogon 'bisukha meke etnogo, Domba Eak etnogo nen, 3 baga arat 'bukaldekhesik oba nen, ageikhe 'bukalhunem, it Allah nen winametdisasikhemo iniluk welageikharek meke emenogo inebe 3 baga inane arat egasik oba nen, ageikhe nen, “Eme o,” iluk isinem nasuk holhi o.

⁸ Holhirik, lakhigi meke, kuda isi akhuni watlasuogoluk inelokhoken kut atluk abel dageikherek iti hak meke lagunem lakhigi o. Nen, inebe watlageikharek iti, akhuni hakene atluk nen, kuda iti apot oba yasukhogon nekhe laga. Itithogon nukhunem, at oporlik, akhuni wema baga usegarek iti, akhuni hakene atluk nen, ipisak nukhunem lageisigi. Itithogon nekhe dogolik, akhuni agat oba meke tha'bokhogonat inebe 4 oba mikirlogo 'bisalok, 3 baga inakhidek here'isalok, ageikhe anek akhuni aperek nen karok oba inakhunem watlageik, hipiri abu nen watlageik, u erlo kok meke baga watlageik, wam helo inom, yeke helo inom nen, aik nen li'bilinakhunem watlageik, hagakhe dogoagaluk iteerek 'bisegama nukhunem lageisigi o.

⁹ Itithogon hisigirik oba nen, oporlik sirlo 'begarek iti hak, thuesika uanat meke baga iki apusu baga tetnekhogon 'bisukha meke etnogo meke, Domba Eak etnogo nen 4 oba arat 'bukalhesik oba nen, ageikhe 'bukalhunem, akhuni Allah ane a'bethogon waganhukhasik, it aperek yogeisekhe lagoukha iti hasik inakhukha meke inagoreke Allah ako warogo hetu hunekharek oba apma werekma lageisigi o.

¹⁰ It itithogon dogolik, inane kokhogon men isinem holhi, “Ninopase Allah hobatneak karelek motok dogolik, mothogon anek hagatkhetek meke ninopase. Hiki meren dogoluk nen akhuni agat oba meke nen nit ninakhukha etnogo ninokoma inoba 'biluk inasigin nogo?” iluk yogokhe lageikhama,

¹¹ at nen he, “Hinagarlak lak hinerugi ebetlake hinom an nobasik hagakhe lagagip meke, hit hinakhukha iti hak, inasugun meke aban werek iti, it therisik thet walogo il opakiat dogono,” iluk yogeisasikhesik, inebe dopok inasu kut meke i'bisugunem lageisigi o.

¹² Itithogon lageisigirik oba nen, oporlik lakhigi meke, thuesika uanat meke baga sirlo 'begarek iti hak, apusu tetnekhogon 'bisukha meke etnogo meke Domba Eak etnogo nen 5 baga arat 'bukalhesik oba nen, ageikhe 'bukalhunem, dugul kokhogonat aborlok luk-lagathigik, o mulikin elokhoken karung mirli hakene hagatlageik, thut elokhoken morla mep akhuni inamep hakene ageik,

¹³ o ara eken akutmo hisakne aninirogon hubetha agunem, ikilo'bak oba nen agat obake lologo usa'agerek hak, itithogonat husagal pogot oba nen kilelogo agat oba usa'ageik,

¹⁴ pogot iti, holal waganek meke dikilogo 'begarek iti hak, dikilogo dek ageik, tom ukul inom, i eken palekmake inom, welagarekmake dopok nen werlekmake la'igik, hagakhunem lakhigi o.

¹⁵ Itithogon hagakhunem akhuni agat oba meke, ap inetagapogot meke inom, ap koktek meke inom, ap inougi wim tugure meke inom, ap inikierek meke inom, ap inetaga werek meke inom, akhuni tha'bokhogon inebetek inom, inatuaneke inebe tha'bokhogonat inom, oilake limaklageik, tom obake helekit pun elolake limaklageik, hagakhe lageikha lageisigi o.

^16-17 Itithogon limago dogolik, tom inom, helekit inom, men yogeisekhe lageikha, “Allah anini ninoba 'bigin etnogo arat asi aga yoma, tha hak nen akla puk hapugutdiluk huk asigin apegep? Erlok dek o. Iti nen he, hit nen, at kok welagarekma obolukmo werek iti nen elokhoken aga ninakhik, Domba Eak iti akla aga ninoba 'biluk ninakhik, hagasugun yi, thogoumhogon ninebe thebeldinaniluk nen, hinakma lima'inanini o,” iluk kino yogeisugunem nasuk holhi o.