A'bikaka 4 - ALLAH ANE WENW KET MEKE WAROGO WOKNINAKHIKHE WENE

Pogot oba Allah hogorakhunem ileken hasikhe wene

¹ Itithogon yoknikhunem higirik oba nen oporlik, na'bikaka baga ageikhe yigithogon lakhigi. Pogot oba thu holagape ageikhe hualek werekma, at alep pikon ane kok meke hakene baga yoknikhunem nasuk holhi meke etnogo nen yabokane men yoknekhe, “Wene ya dogoluk nen yabokane hagatlasigin meke hileken lakhanok nen iluk, yakulhisik nen, dagei me o,” iluk yoknekhe.

² Itithogon yoknekhe korlek eranogoat, Allah Agoreke noba duk i agama nileken lakhigi hak, pogot oba at kok welagarekma obolukmo werekma lakhigi. Itithogon werekma, at ebe obolukmo iti baga hurek werekma lakhigi.

³ At iti elokhoken helekit a'bi'bal weak oko kok palharek meke etaga baiduri pandan inom, delima inom, hakene meke werekma, warlopaik elokhoken kereka palek hakene meke at kok welagarekma obolukmo etnogo baga dagak-pagakhogon werekma lakhigi.

⁴ At kok welagarekma obolukmo turlem werek korlek, it aperek koktek welageikharekma inobolukmo 24 oba werekma, ap inarluetek inebe 24 oba nenat inasu kut meke ugu, nen, kare-kare emas meke mitago ap inetagapogot ugu welageikharek iti hak ugu meke, inebe inobolukmo iti baga hurek welageikha.

⁵ Itithogon werekma, at kok welagarekma obolukmo iti baga nen oyabok eran-alep yegethigik, pogot ane kok sup iluk nen ane luk-luk lageik, hagakhe korlek, at kok welagarekma obolukmo etnogo elokhoma lampu yibarlek ebe 7 baga isok tilik welaga. Iti ebe, Allah Agoreke opakiat meke, 7 thalek etnogoat o.

⁶ Nen, at kok welagarekma obolukmo etnogo elokhoma, ageikhe inamukhak elokhoken mirliak i laut yekelek hakene welaga. Itithogon werekma, at kok welagarekma obolukmo turlem werekma, abel ebelak-ebelak, it Allah nen winametdisasikhemo iniluk welageikharek meke aperek inebe 4 oba inelokhomake inoporlike inileken doalegat meke welageikha.

⁷ Itithogon welageikha iti, ageikhe helo yeke hakene etaga singa iti hakene, nen, ageikhe sapi kulok hakene, nen, ageikhe elokhoken akhuni inelokhoken hakene, nen ageikhe thue kok ko'balusa hitluk nekhe korlek lakhegarek hakene, werekma lakhigi.

⁸ It iti inebe 4 meke re, inebe tomok ina'bikha 6 oba werekma, inomak abel itikmanke inom, akmanke inom, inileken motok doalegat meke inane huk welageidek, dikene motok, hibakone motok, Allah hogorakho motok dogolik, “Ninopase Allah Etagapogot obatneakma, u a e, Haganeat karelek motok welageikhe, u a e, Yogotak karelek motok werek, u a e, Yabokane karelek motogat dogogin, u a e,” iluk hogorakho motok welageikha.

⁹ Itithogon ekhe dogolik, hibiku-yogoku at kok iluk motok welagarek meke etnogo ebe obolukmo werekma hogorakhe dogolik, “Ninopase kok welagatek meke harat heagei wathakhik, hogothakhik, kogotdageigik, hagakhe dogogun o,” isinem nen,

^10-11 it ap inarluetek inebe 24 emenogo nen, at kok iluk motok welagarek etnogo elokhoma initibagal yukukhogon hogorakhe dogolik, kare-kare inukuloakma ugu meke kirik-korokhogon, at kok welagarekma obolukmo etnogo elokhoma la'ekhe dogolik, men ekhe lageikha, “Ninopase Allah Hetagapogot, u a e, Yi meke ti meke tha'bokhogonat, u a e, Hat hakla apasigitik nen walhasiginmo, u a e, Walhasiginmo werek iti, u a e, Harat kok hobatneak halok, u a e, Hogothakhik, halon halhik, ekhe dogosak, u a e,” iluk Allah hogorakhe lageikha hisigi.