A'bikaka 3 - ALLAH ANE WENW KET MEKE WAROGO WOKNINAKHIKHE WENE

Wene Allah a'buri o Sardis meke inobasik yogokhikhe wene

¹ Itithogon yoknekhesik yabokane yoknekhe dogolik, “Allah Agoreke ebe opakiat meke re, 7 thalek etnogo ite welageik, husagal ebe 7 nenat etnogo nikimo herogo welageik, hagakherek meke etnogo nen wene yi yokhisik, At malaikat Allah a'buri o Sardis natogokharek meke therisik welagarek meke etnogo, wene an nen yogosigin meke yi, hat holal waganogo oba la'in o, Hit o Sardis meke akhuni nen hinabok ekhe dogolik, It iniluk werek, iluk iliogei meke re, hinebe warek hakene dogolik hinobabut hagakhe lagap meke iti an nilu o.

² An nen hit hinobabut palhe lagei, nopase Allah iloba hano motok 'bogokhogon hagakhe lagap dek. Meke re, watlasusak horogat hinetaiken pasarluk welagap eta bagaat, metokhogon melatluk hiniki hinisok hapugutdakhalok, hinobatne atni o.

³ Hit itithogon metokhogon melatluk hinobatne ageidek halok he, akhuni inilarlurlu waganuogoluk limago wageikharek iti hak, an itithogonat, hit nen, At itinem wisigin, iluk hinokodek werekma wisunogo nen, wene ebekeram yakulhisasukhama hinasuk holhigip meke hinakla ebetdiluk nen, weak hagakhe lagap meke 'bualogo thogotdisalok hinobabut hebelatluk, wene itiat hiniki a'bethogon hago dogono o.

⁴ Itithogon mekeat he, hit akhuni o Sardis eke hinebe pererlagat aperek, akhuni nen inasu thobalek meke mirli meke oba dabulasunogo iluk karelogo welageikharek iti hak, weak ageikhe hagakhidek werek iti, inasu kut meke isusak obaat ikhogo nen an ninom nekhe dogogun o.

⁵ Tha nen obatne asigin halok he, su kut meke i'bigin o. Nen, an it akhuni inilugurinakherek meke inetaga thuesika baga holal waganek meke horogo la'isagein dek o. An nopase inom, malaikat yoko la'isa agarek meke inom, inil oba, Yi an na'buri o, iluk inetaga pakhogon yogeisagein o,

⁶ iluk, igi meke iti, Allah Agoreke nen Allah a'buri o yi ai ti ai natogokharek meke yogeisiliogo meke iti, hinasuk holusak halok, hanorogon holino o, iluk yogeisigi meke iti, wene holal waganogo inoba la'ino,” iluk yoknekhe.

Wene Allah a'buri o Filadelfia meke inobasik yogokhikhe wene

⁷ Itithogon yoknekhesik ne, yabokane ageikhe yoknekhe dogolik, “An weak hagakhidek nobabut karelogo dogolik, nane eberogonat anek egerek meke nen thu kunci Daud meke wolok thu hualhi halok, akhuni aperek nen lasusak erlok dek o. Nen, thu ladigi halok, akhuni aperek nen hualusak erlok degat meke etnogo nen wene yi yokhesik, At malaikat Allah a'buri o Filadelfia natogokharek meke therisik welagarek meke etnogo wene an nen yogosigin meke yi, hat holal waganogo oba la'in o,

⁸ Lakhani! Hit hinobabut hagakhethep he, hinobatne motok herlekha'bugat mekeat he, an nane hologo mothogon hagakhik, nabok la'belhidek pakhogon yogeisigik, hagakhethep iti an nilumo, hit hinobasik, thu arat hualogo 'binagagi meke akhuni aperek nen lasusak motok erlok dek o.

⁹ Lakhani! It akhuni Iblis a'buri natogokharek meke inebe Yahudi meke dek mekeat he, inekalat, Nit ninebe Yahudi meke, iluk egarek meke iti, hit hinapma ukitluk nen, an hit netaiken hunik welagei iti inilu asuagaluk, it inebe hit hinoba 'bisasigin o, iluk eberogonat yokhisigi o.

¹⁰ Itithogon 'bisasigin iti, an nen, Hinobakhanini hapugutdiluk dogono, iluk yokhisasigi meke iti, nane hologo mothogon hagakhe lagap iti nen, o yabokane akhuni agat oba yoma welageikharek meke tha'bokhogonat inabut paligiluk, yi aik ti aik inoba 'bisagein iti hekhe korlek, hit anek he, an nen napma hano hakhisik dogogin o.

¹¹ An ibat-ibarat wisigin o. Itithogon witluk nen, tha ae a'busuk tha ae a'busuk lagunem, inobatne asugun meke oko kare-kare mitago i'bisegarek iti hak, oko hit wokhisausak meke, it akhuni aperek nen tilogo horlaunogo iluk, hit ebe waganhigip meke iti, hiniki a'bethogon hago dogono o.

¹² Nen, tha nen obatne asigin meke halok, o hiseke usakharek iti hak, at itithogonat Allah ekaerek ai halekma meldiluk, nopase Allah etaga inom, ai kota yerusalem ket meke at nenat pogot oba nen usa'isigin iti etaga inom, an netaga ket meke inom, an nen, at iti oba holal waganogo 'bumo, at ebe o etoma nen dukhisigin motok dek o,

¹³ iluk igi meke iti, Allah Agoreke nen Allah a'buri o yi ai ti ai natogokharek meke yogeisiliogo meke iti, hit hinasuk holusak halok he, hanorogon holino o, iluk yogeisigi meke iti, wene holal waganogo inoba la'ino,” iluk yoknekhe.

Wene Allah a'buri o Laodikia meke inobasik yogokhikhe wene

¹⁴ Itithogon yoknekhesik nen, yabokane ageikhe yoknekhe dogolik, “Erloma yi meke ti meke erlo anat werekma, Allah nen walhasikhe meke iti, at abok nobabut hupukhogon eberogonat anek pakhogon egerek meke, netaga ebeat asuak u hak, Amin etnogo nen wene yi yokhesik, At malaikat Allah a'buri o Laodikia natogokharek meke therisik welagarek meke etnogo wene an nen yogosigin meke yi, hat holal waganogo oba la'in o.

¹⁵ Hit hagakhe lagap meke iti tha'bokhogonat hinobabut an nilu o. Hit hinetaiken ko'bot welagap degat, nen agaken akilukhogon hagakhe lagap degat, hinetaiken ko'borat hinobakhanini dogosak halok, itithogonat dogosak o. Nen agaken akilukhogon hagakhe dogosak halok, itithogonat hagakhe dogosak o.

¹⁶ Mekeat he, hinetaiken ko'bot degat, agaken degat, ko'bot a, agaken a, agaken hemurlugat anek welagap iti nen, i theram agunem inapema nen hirlelogo ula'isegarek hak, an nen hinebe ula'inagagin o.

¹⁷ Hit he, hinerlageigat hinileken pugat, hinalpalegat dogolik, Nit ninebe inakmu negen motok weagat welago, iluk hutdigidek, hit nen ekhe dogolik, Nit he, ninebe ninekaerek nen kogorakhogosik, yi meke ti meke ninerlageik ageidek, ninikieregat welago, iluk ekhe lagap iti.

¹⁸ Itithogon welagap iti nen, hit koktek hinikierek asubageik nen, emas hetu werago hano hagakharek meke noba oko paligik, hinalpalegat welagap meke iti, hinekarli asunogo nen, ikhauwogoluk su kut meke noba oko paligik, hinileken puk meke iti, hano agunem yi meke ti meke lakhekhe dogouogoluk, apusu hinileken obake wasubageik nen noba oko paligik, hagasubageik nen iluk hinasuk wakhe lagei o.

¹⁹ Itithogon hinasuk wakhe lagei iti, it akhuni an netaiken hunik meke, inebe dopok inasuk warogo tugi inakherek anek iti nen, hit weak hagakhe lagap meke iti thogotdisalok hinobabut hebelatluk nen, akilukhogon hagakhe dogono o.

²⁰ Lakhani! An nebe holagapema metek dogolik, thu ane puputhekhe lagei o. Itithogon puputhasinem, tha nen nane asuk holiluk nen, thu hualneagein halok, an at oba 'bikha ukiluk nen, nipisak hipiri nasi nagarlak-hagarlagat dogogun o.

²¹ An arat nobatne agagimo, nopase kok welagarekma obolukmo nipisak welago yi hak, tha nen obatne asigin halok, an kok welagarekma nobolukmo nipisak dogouogoluk meldigin o,

²² iluk wene igi meke iti Allah Agoreke nen Allah a'buri o yi ai ti ai natogokharek meke yogeisiliogo meke iti, hinasuk holusak halok he, hanorogon holino o, iluk yogeisigi meke iti, wene holal waganogo inoba la'ino,” iluk yoknekhe.