A'bikaka 20 - ALLAH ANE WENW KET MEKE WAROGO WOKNINAKHIKHE WENE

Mulikin dageigik usigik hagakhe korlek 1.000 tahun dogogun wene

¹ Itithogon hisigirik oba nen, yabokane, at malaikat ageikhe pogot oba nen thu kunci wema baga kilinmo eloma meke inom, herle kupi pisue omaken akineak meke inom, ikimo wolok usa'agunem lakhigi.

^2-3 Itithogon wolok usa'agasik, at warlo hakene kok muk haganeat nen welageikhe meke etaga Iblis igik, Setan igik, egarek meke etnogo, ebe iki herle warogo yi akhuni ti akhuni nukhetdisekherek iti hak nukhetdisigidek 1.000 tahun iki herle warek wema baga kilinmo eloma dogoagaluk usakhesik, thu kunci larogo 'bisinem higi o. Etoma dogoluk nen, hisalogo lia'isusak obaat il opaki hasik hisalek dogoagaluk hisalogo lia'isigin.

⁴ Itithogon higirik oba nen yabokane, ap koktek inobolukmo doalegat werekma etoma inebe doalegat kok dogolik, akhuni aperek inapma 'bisalok hagasik dogolik ukum inoba 'bigik, kokhik, hagakhe dogoagaluk iteerek 'bisegama hisigi. Nen, ageikhe higiat. It akhuni helo yeke hakene kok meke etnogo inom, akaneke at ebe hakene alino hagarek etnogo inom, hogorinakhidek etaga thalek holal waganek etnogo inetai ekerlogo inilhaoak oba a? Iniki baga a, waganhidek here'isalok, Yesus hagakhe lageikhe meke yogeisilik nekharek hasik inom, Allah ane hasik inom, inarlokop ade 'bogokhogon palogo inakhukha meke emenogo arat inapuke inilugurinabiluk, meldisekhesik nen welageikha hisigi. Nen, it at Kristus inom akhuni aperek inapma 'bisalok hagasik, mulikin dageigik usigik hagakhe korlek, 1.000 tahun welageikha hisigi.

⁵ It akhuni watlagoukha meke alebageik itiat inilugurinakhesik meldisekhe hisigi. Itithogon mekeat he, it akhuni watlagoukha meke ebetlake anek he, o mulikin dageigik, usigik, hagakhe korlek, inapuke inilugurinakhidek 1.000 tahun hagasuagaluk 'bisekhemo werekma hisigi.

⁶ It akhuni alebageik watlagoukha meke yabokane warek motok dogoagaluk ukum inoba 'biluk inasumo watlasugun. Mekeat he, it aperek alebageik inapuke inilugurinabiluk nen, inebe Allah hasik 'bisagein meke iti anek he, inakla arleken motok akhagun o. It iti yabokane watlageidek dogolik, inebe Allah inom, Kristus inom, ipisak iteerek atluk, o mo dageigik, usigik, hagakhe korlek, 1.000 tahun oba, it Kristus inom akhuni inapma 'bisalok hagasik dogogun hisigi.

Iblis obatne degetdiluk hetu aikmo la'igin wene

⁷ Itithogon hisigirik oba nen, yabokane, o mulikin dageigik, usigik, hagakhe korlek, 1.000 tahun arat dogoluk nen, ilugun kobokhogon Iblis iki herle warek etnogo herle hisalogo lia'isigin.

⁸ Itithogon lia'i agunem, wim yabuogoluk, akhuni inukuloak etaga tomok pogot erlomake-erlomake 4 oba upuke, wemake, ilike, yike welageikharek meke nukherinabigiluk inakla kagalik laga laga higi. Iti, o etaga Gog meke inom, Magog meke inom, inoba wim yoko lagasik, inebe motok doalegat lelaga i laut yekelek yipitlake welagarek iti hakene doalogo 'bisekhemo welageikha hisigi.

⁹ Itithogon doaldiluk, akhuni Allah a'buri o kota Allah ai ukul etaiken hunik meke etnogo doaldiluk werekma, o tan thebelogo inasuogoluk kerlekhogon uki ageikha meke re, hetu pogot oba nen usa'aga dogolik, inebe tha'bokhogonat hali neke laga hisigi.

¹⁰ Itithogon hali nasi korlek, at helo yeke hakene etnogo inom, at ageikhe nen, “An Allah ane yogeisekhe lagei,” iluk ekalat nukhetdisekherek meke etnogo inom, i laut hetu meke yekelekma hotali al hakene obasi weak meke etaga belerang inom-inom amulok nasi motok welagarekma etoma po wukhogon usa'isekhe. Usa'isekhemo etoma werekma, Iblis etnogo yabokane inoba po wukhogon usa'isekhemo inom etoma dogolik, dikene hibakone hinet wakho motok-motok dogogun hisigi.

O ilugun oba ukum inoba 'bigik, kokhik, hagasigin wene

¹¹ Itithogon higirik oba nen, yabokane, ap koktek welagarekma inobolukmo kok kut meke werekma, at ebe etoma kok welaga higi. Itithogon werekma pogot, agat, tha'bokhogonat, at agorlerogon dek atlukmo nogo nen he, yabokane inileken hausak degat aga laga higi.

¹² Itithogon dek aga korlek, akhuni watlagoukha meke inetagawerek meke inom, inetaga dek meke inom, at kok obolukmo werek etnogo elokhoma metek werekma hisigi. Itithogon werek korlek, thuesika tha'bokhogonat 'bukalhigik, thuesika ageikhe akhuni inniluk motok dogoagaluk hanorinabigin meke inetaga holal waganek meke 'bukalhigik, hagakhe laga. Itithogon 'bukaldiluk, it akhuni watlagoukha meke inobabut hagakhe lagoukha meke thuesika etoma baga holal waganek meke tak-tagat ukum inoba 'bigik, kokhik, hagakhe laga higi.

¹³ Iti hagat, akhuni ebetlake watlagoukhasik, i laut yekelekma welageikharek meke, i laut nen hokologo ula'isa ageik, akhuni watlatluk wema baga usagoukha meke, at watlariogei erlo inom, wema baga inom, iteerek welagarek meke etnogo nen lia'isa ageik, hagakhunem, at Allah nen it inebe tomok inobabut hagakhe lagoukha tak-tagat wene inoba 'bigik, kokhik, hagakhe laga higi.

^14-15 Ukum itithogon inoba 'bigin iti, thuesika it akhuni inebe tomok iniluk motok dogoagaluk hanorinabigin meke, inetaga holal waganek etnogo baga waganhidek meke halok, itithogon i laut hetu meke yekelek iti baga po wukhogon usa'isekhe dogolik, wema baga inom, watlariogei erlo inom, inomat po wukhogon etomaat usa'isekhe laga higi. Itithogon usa'isekhe laga iti, alebageik elanma hasik watlatlukmo nen, yabokane motok-motok watlasugun meke i hetu meke yekelekma usa'isagein itiat o.