A'bikaka 2 - ALLAH ANE WENW KET MEKE WAROGO WOKNINAKHIKHE WENE

Wene it Allah a'buri o Efesus meke inobasik yogokhikhe wene

¹ Itithogon yoknekhesik nen yabokane men yoknekhe, “An niki ebeke husagal ebe 7 meke hago dogolik, lampu yibakharek meke ebe 7 meke isok tilik emas meke hagarek etnogo aklake nekherek meke etnogo nen wene yi yokhisik, At malaikat Allah a'buri o Efesus natogokharek meke therisik welagarek meke etnogo wene an nen yogosigin meke yi, hat nen holal waganogo oba la'in o,

² Hit nen an nobasik hinobakhanini hapugutdiluk hinobatnerogonat hagakhe dogolik, it aperek weak hagakhunem he, Inoba dopok, iluk, inasuk wakhidek here'isegep dek. Nen, it aperek Yesus nen la'isa agama negen hagarogo witluk ugunem, hit nen, Inekalat iliogei, iluk inobabut ekagat palhethebat. Hinobabut itithogon hagakhethep iti an nilu o.

³ Nen, akhuni nen an nobasik yi aik ti aik hagathinakho korlegat, hit nen, At nina'it, iluk, here'anhidek hinobakhanini hapugutdiluk hagakhethep iti an nilu o.

⁴ Itithogon mekeat he, ebekeram hinetaiken an noba hunik welagagip tak-tagat, yogotak itithogon welagap dek iti anek he, Weak hagakhe lagap, iluk hinobabut palhe lagei o.

⁵ Iti halok he, hit 'bogokhogon motogat usa'agasip welagap iti, hinakla ebetdiluk, hinobabut hebelatluk nen, alebageik hagakhe lagagip meke iti hagat, hagakhe dogono o. Itithogon hagakhidek halok he, an nebe witluk nen, hinalampu yibarlek iti obolukmo nen kigilogo wokhagein o.

⁶ Itithogon mekeat he, it aperek ap Nikolaus obabut waganogo hagakhunem, an na'it motok hisegerek hagat, hit hina'it motok hisekhe lagap iti anek he, hano o.

⁷ Nen, wene igi meke iti, at Allah Agoreke nen Allah a'buri o yi ai ti ai natogokharek meke yogeisiliogo iti, hinasuk holusak halok he, hanorogo holino o. At tha nen obatne asigin halok he, Allah ayabumo o eken inilugurinakherek meke iti noagaluk melageisigin o, iluk wene tha'bokhogonat yogeisigi meke iti, holal waganogo inoba la'ino,” iluk yoknekhe.

Wene Allah a'buri o Smirna meke inobasik yogokhikhe wene

⁸ Itithogon yoknekhesik nen, yabokane yoknekhe dogolik, “An he, erloma nen logat ekapul oba motogat dogogin meke etnogo arat watlagagisik nen yabokane niluk agagisik welagarek meke etnogo nen, wene yi yokhisik, At malaikat Allah a'buri o Smirna natogokharek meke therisik welagarek meke etnogo, wene an nen yogosigin meke yi, hat nen holal waganogo oba la'in o,

⁹ Hit ebe meke hasik hinebe kok hinikierek mekeat he, it akhuni Iblis a'buri mekeat he, inekalat, Nit ninebe Yahudi meke, iluk ekhe dogolik, hit hinetaga weak hagarogo weak hagathinakhunem, hinebe hinerlageik weak welagap iti, an niluat o.

¹⁰ At Iblis nen hit hinakla kagaluagaluk, ap hit meke ebetlake iniki herle warogo 'bisamo, iniki 10 baga nen yi aik ti aik hekhe dogogun iti re, hinayuk agup o. Yi aik ti aik itithogon hagathinakho korlek, hinetaiken an noba hakotdiluk, an ninom hunik werekma watlasugun halok he, tha nen ae a'busuk weak tha nen ae a'busuk weak lagunem, it inobatne ageikharek meke oko kare-kare mitago wogeisegarek iti hak, oko naburlal-haburlal hagathinabigin o.

¹¹ Nen, wene yogeisigi iti Allah Agoreke ne, Allah a'buri o yi ai ti ai natogokharek meke yakulisiliogoat iti, hinasuk holusak halok he, hanorogo holino o. Tha nen obatne asigin meke halok he, it aperek watlatluk yabokane motok-motok watlasugun iti, inom weagarinabigin dek o, iluk wene tha'bokhogonat yogeisigi meke iti holal waganogo inoba la'ino,” iluk yoknekhe.

Wene Allah a'buri o Pergamus meke inobasik yogokhikhe wene

¹² Wene itithogon yoknekhesik nen, yabokane yoknekhe dogolik, “An karok elak ebelak-ebelak mago meke nikimo hago welagei meke etnogo nen wene yi yokhisik, At malaikat Allah a'buri o Pergamus natogokharek meke emenogo therisik welagarek meke etnogo, wene an nen yogosigin meke yi, hat holal waganogo oba la'in o,

¹³ Hit he, Iblis ebe kok dogolik, akhuni aperek apma hagasik welagarekma welagathep me iti an nilu o. Itithogonat Iblis ailaat dogolik, an na'but Antipas nen nabok a'it ageidek, obabut hupukhogon dogolik yogeisilik nukhunem, it aperek nen ebe hinakla nen wakhunem, hit nen, Nit ninetaiken Yesus oba hakotdiluk welagorek iti dek, nina'it, iluk kolelogo here'anhidek, ninom hunik motok welagathep iti, hinobabut an nilu o.

¹⁴ Itithogonat meke re, wene 'bugurlagat ageikhe an na'it meke hagakhe lagap meke iti yokhisak o. Haganeat akhuni israel meke inebe weak asuagaluk, wam kaneke ako warek meke karlelek nikik, param hagakhik, hagasuagaluk, ap Bileam nen ap Balak yakulikhikhemo, at nen inakla kagalhe lageikhe meke iti, hit aperek nen at awene iti hago welagap hisigi o.

¹⁵ Nen, hit aperek nen, wene ap Nikolaus nen yakulisasikhe meke awene iti wagaogo hago welagathebat iti. Itithogon hagakhethep iti, an na'it motok apekhe lagei o.

¹⁶ Na'it apekhe lagei iti nen, hit weak hagakhe lagap meke iti here'isalok hinobabut hebelatni o. Itithogon hinobabut hebelageidek halok he, hit an karok napema meke baga hinasigiluk ibat-ibat wisigin o.

¹⁷ Nen, wene yogeisigi iti, Allah Agoreke nen it Allah a'buri o yi ai ti ai natogokharek meke yogeisiliogo iti, hinasuk holusak halok he, hanorogon holino o. Tha nen obatne asigin meke halok he, hipri etaga manna aburarek meke melagakhik, etaga ket meke thalogo helekit kut meke baga holal waganogo wogokhik, hagasigin o. Etaga waganek iti it aperek inokodek. At etaga holal waganek horlagein meke iti anek ilu asigin meke wogosigin, iluk tha'bokhogonat yogeisigi meke iti, holal waganogo inoba la'ino,” iluk yoknekhe.

Wene Allah a'buri o Tiatira meke inobasik yogokhikhe wene

¹⁸ Itithogon yoknekhesik nen, yabokane men yoknekhe, “An Allah a'but nileken hetu amulok hakene, nen, nisok tembaga hetu weraklatluk a'bi'bal here-here hagakherek iti hak etnogo nen wene yi yokhisik, At malaikat Allah a'buri o Tiatira natogokharek meke therisik welagarek etnogo, wene an nen yogosigin meke yi, hat holal waganogo oba la'in o,

¹⁹ Hit hinobabut hagakhethep meke iti an nilu o. It akhuni aperek hinakmurogon welagathep iti inom, hina'it ageidek hinobabut hupukhogon welagathep iti inom, it aperek yomageisegethep iti inom, it aperek nen yi aik ti aik hinoba 'bisi korlegat, hinobakhanini hapugutdiluk welagthep iti inom, tha'bokhogonat an nilu o. Nen, alebageik pererlagat negen hagakhe lagagip mekeat he, yogotak motok doalegat hagakhe lagap iti, an niluat o.

²⁰ Itithogon mekeat he, at he Izebel etnogo nen ekalat, An nebe Allah ane yogeisegerek mekeat o, iluk akhuni an natuaneke meke inebe doalegat param hagakhe dogoagaluk yakulisigik, wam kaneke ako wakharek meke karlelek neke dogoagaluk yakulisigik, yakulisekho korlek, hit nen wenagakhidek, At oba dopok, iluk, here'isekhe lagap iti anek, Hit weak hagakhe lagap, iluk hinobabut palhe lagei o.

²¹ At he iti, param ha'uagaluk hagariogo meke iti here'isalok obabut hebelasuagaluk therogo welagei meke re, at param hagariogo meke iti, here'isalok obabut hebelasusak a'it o.

²² Wene yi hinakla eberek dogono, It ap he iti inom param hagakharek meke here'isalok, inobabut hebelageidek halok he, it hinet wasuagaluk, he iti noge ekherekma po hilogo la'igin o.

²³ Itithogon hagakhunem, it Allah a'buri o yi ai ti ai natogokharek meke tha'bokhogonat inileken halok nen, it nen, At Allah akhuni inakla ebekharek meke iti inom, inetaiken nen kagalharek meke iti inom, ilumo, akhuni ninebe tomok ninobabut hagakhorek meke tak-tagat wene ninoba 'bigik, oko woknisigik, hagasigin o, iluk, an hutdanuagaluk, it akhuni at he iti ane waganharek meke inebe inasiginat o.

²⁴ Itithogon mekeat he, akhuni aperek nen, He iti awene, Iblis awene akla meke yakulisekherek, iluk egarek meke iti, hit akhuni o Tiatira meke ebetlake nen, wene iti yakulhik, hinilu ageik, waganhidek iti nen he, hit nen wene akin meke ageikhe hagasubageik nen iluk yokhisagein dek o.

²⁵ Meke re, an wisigin iti aban wageidek werek korlek, wene waganhigip meke itiat hiniki a'bethogon hago dogono o, iluk yokhisigi iti o.

^26-27 Tha nen an warlok meke hagakho motogat hurli o ilugun oba obatne asi ligin halok he, an nopase nen akhuni inukuloak etaga dopok, an nen hagasik dogoagaluk meldaniluk ite danhikhe iti hak, at obatne asi ligin meke iti itithogonat hagasik dogoagaluk meldiluk iteerek 'bumo, akhuni nen thegerluk pisue omaken meke baga isoak agat a'bet weak meke tamuk-tamakhogon hagakharek iti hak, at ane obatne baga yogeisekhe dogolik, hagasik dogogin o.

²⁸ Nen, husagal wap mulikin dagei agarekma mot-mot lia'i agarek meke etnogo wogeisiginat o, iluk yokhisigi iti,

²⁹ Allah Agoreke nen it Allah a'buri o yi ai ti ai natogokharek meke yogeisiliogo meke iti, hinasuk holusak halok he, hanorogon holino o, iluk yogeisigi meke iti, holal waganogo inoba la'ino,” iluk yoknekhe.