A'bikaka 19 - ALLAH ANE WENW KET MEKE WAROGO WOKNINAKHIKHE WENE

^1-2 Itithogon isinem holhirikmo nen yabokane, akhuni motok doalegat pogot oba dogolik inane kokhogon men isinem nasuk holhi, “Ninopase Allah kok hotabne horleak, u a e, Ninebe tilninakhetek, u a e, Harat hogothabusak, u a e, Hogothakhe lago u hak, u a e, ekhe lago, u a e, Hat nen ukum inoba 'bigik, kokhik, u a e, Eberogonat anek hagakhetek, u a e, Mothogon anek hagakhetek etnogo nen, u a e, Akhuni o Babel meke inobabut, u a e, He yugunisake hagarik nekherek meke hakene emenogo nen, u a e, Akhuni o yi ai ti ai welageikharek meke, u a e, Weak hagarinakharek iti nen, u a e, Ukum inoba 'begetik weagarinakhen, u a e, It nen hatuaneke meke inamep ulabogo inakhukha hasik, u a e, Inokoma inaken iti nen, u a e, Hogothakhe lago, u a e,” iluk etai wakhe lageikha.

³ Itithogon wakhasik nen, yabokane ageikhe wakhe dogolik, “Allah ninopase, u a e, Hogothakhe lago, u hak, u a e, ekhe lago, u a e, Akhuni o Babel meke inisi thode, u a e, Dek ageidek dageisi motok werek, u a e,” iluk wakhe lageikha.

⁴ Itithogon ekhe korlek, it ap inarluetek inebe 24 emenogo inom, it Allah nen winametdisasikhemo iniluk welageikharek meke inebe 4 oba eranogo inom, at Allah ebe kok welagarekma obolukmo werekma apma ukiluk, initibagal yukukhogon hogorakhe dogolik men ekhe lageikha, “Ebeat asuak,” u hak, “Amin,” igik, “Hogothakhe lago,” u hak, “Haleluya,” igik, ekhe lageikha.

Domba Eak age negen igikhe dogolik, pesta hagasugun wene

⁵ Nen, Allah kok welagarekma obolukmo etnogo nen men ekhe lageikha holhi, “Hit Allah atuaneke inetagawerek meke inom, inetaga dek meke inom, tha'bokhogonat Allah hinayukhogon welagathep meke ninopase Allah hogorakhe dogono o,” iluk ekhe lageikha holhi.

⁶ Itithogon ugunem nasuk holhirikmo nen yabokane, akhuni doalegat doalogo dogolik, inane i kok meke ane ekherek hak inom, pogot ane kok sup iluk ane luk-luk lagarek ane hakene inom, men ekhe lageikha, “Ninopase Allah hogothakhe lago, u hak, Haleluya, ekhe lago. Hat hobatne motok horleakma, yi meke ti meke hagasusak anek etnogo nen, yogotak arat hapma 'binanhetik haknisik welagan o.

⁷ Itithogon dogolik, Domba Eak age negen ikhagaluk ai arat wi agama, at age negen etnogo arat ekaerek nen tomorogo 'bakhekhesikmo nogo nen, ebe arat isigin iti nen ninakla arlekenhogon, akilukhogon, at hogorakhe dogouok o.

⁸ Age itithogon ikhagaluk, asu lenan elokhoken kut motok hano thobalek mekeat ugu dogoagaluk wogokhemo higi. Su hano iti ebe, akhuni Allah a'buri inobabut mothogon hagakharek meke itiat o,” iluk ekhe lageikha.

⁹ Itithogon isinem holhirikmo nen, at malaikat etnogo nen men yoknekhe, “It akhuni Domba Eak age negen ikhekhe dogolik, pesta isago nasuagaluk inayoko 'bega meke inakla arleken hakhoak o, iluk holal waganin o,” iluk yoknekhesik, yabokane yoknekhe dogolik, “Wene yi re, eberogonat Allah nen ekhe meke o,” iluk yoknekhe.

¹⁰ Itithogon yoknekhe lagama, an nen at malaikat etnogo apma ukiluk nitibagal yukukhogon hogorasigiluk hagakhi mekeat he, at nen yoknekhe dogolik, “Dek. Dek. Itithogon hogotnabusak dek o. An nebe hat inom, hagarlak lak inom, ninom tak-tagat o. Wene Yesus nen yoknisasikhe meke yogeisilik nekharek meke iti, at Allah Agoreke nen inakla kagalogo yogeisugunem yogeisegarek iti, wene erlo at Yesus nen yoknisasikhe itiat o. Halok he, at Allah at hogorasusak o,” iluk yoknekhe.

Ap ageikhe kuda isi kut meke baga yasukhogon werekma ileken lakhasikhe wene

¹¹ Wene itithogon yoknekhesik oba nen yabokane, pogot kagoukhogon hagatlagunem kuda isi kut meke ap ageikhe etaga, “Hupukhogon Hagakherek,” igik, “Eberogonat Ekherek,” igik, egarek meke, kuda iti apot oba yasukhogon dogolik, wim mothogon anek yakhik, ukum mothogon inoba 'bigik, kokhik, hagarik lagunem lakhigi o.

¹² Ap iti ileken hetu amulok hakene, nen ukuloak oba, kare-kare doalegat ap koktek inetagapogot i'bisegarek iti hak ugu. Nen, at etaga thalek ageikhe ninat meke ebe at obake holal waganek werekma akhuni tha'bokhogonat inokodek, at ekaerek anek ilu meke holal waganek welaga higi.

¹³ Nen, at iti asu uanat mep dabulik meke ugu, nen, etaga inilumo ekhe lageikha, “Allah Ane”.

¹⁴ Itithogon ugu nukhunem, ap ekeraguntek pogot oba meke tha'bokhogonat doalek inasu kain lenan su kut thobalek meke ugu, nen, inebe tomok inakuda isi kut meke apot oba yasukhogon dogolik, at oporlik nukhunem lageisigi.

¹⁵ At itithogon laga dogolik, akhuni inukuloak etaga tomok tha'bokhogonat inobatne degetdisagein meke, karok elaklak weak meke apema nen dukhi aga laga higi o. Itithogon inobatne degetdisilik thegerluk pisue omaken obatneak iti hak, at ane obatne baga akhuni ha'isalokma nen, opase Allah obatne motok horleakma, yi meke ti meke hagasusak anek iti nen akla aga dageiluk, ukum inoba 'bisinem anggur eken apusu keleluogoluk obolukmo thagalharek iti hak, at isok nen al debelinabigin meke higi.

¹⁶ Nen, at etaga thalek ageikhe yigithogon, “Ap koktek inetagapogot tha'bokhogonat inom, inougi koktek tha'bokhogonat inom, inoe kok Netagapogot he, anat o,” iluk asu uanat at oba inom, arlisu oba inom, holal waganek werekma higi o.

^17-18 Itithogon higirik oba nen yabokane, at malaikat ageikhe mulikin oba metek dogolik, ane kokhogon it yi thue ti thue tha'bokhogonat pogot obake turlem hitluk lagunem, men yogeisekhe laga, “Ap koktek inetagapogot inom, wim tugure inom, inagarumi wim yakharek meke inom, kuda inom, ap apot oba yasukhogon nekharek meke inom, akhuni inebe inetagawerek meke inom, inebe inetaga dek meke inom, inatuaneke meke inom, inasokneat welageikharek meke inom, tha'bokhogonat Allah nen inakhesik inino doalegat 'bisekhe meke nobageik nen hinebe natogositni o,” iluk isinem holhi o.

¹⁹ Itithogon holhirik lakhigi meke, helo yeke hakene kok etnogo agarumi koktek inetagapogot agat oba meke inom, inagarumi tentara meke inom, inom nen, at kuda apot oba yasukhogon iti inom, agarumi tentara meke inom, inom wim yabuogoluk inebe doalek werekma hisigi.

²⁰ Itithogon werekma, at ageikha haganeat wageikhesik, “An Allah ane yokhisekhe lagei,” iluk ekalat at helo yeke hakene etnogo il oba elalin meke hagakhe lageikhe etnogo nen, nukhetdisasinem eberogonat thalek, it akhuni aperek nen he, “Nit at helo yeke hakene kok meke yi agarumi,” iluk apusu sirlo hakene inobake waganhik, inetaiken kaneke at helo yeke hakene kok etnogo ebe hakene alino hagarek etnogo oba hakotdigik, hagakhe lageikha mekeat he, yogotak at helo yeke hakene etnogo ebe inom, ekalat nukhetdisekhe laga meke etnogo inom, ipisak ha'isegasik, herle warogo i laut hetu meke yekelekma hotali al hakene obasi weak meke etaga belerang inom-inom amulok nasi motok welagarekma etoma inebe inilukeke la'isekhe laga higi.

²¹ Itithogon la'isekhe dogolik, akhuni it inagarumi tha'bokhogonat here'isalok lageikha meke, at kuda apot oba yasukhogon nekhe laga etnogo apema nen karok dukhi aga dogolik inakhe laga. Itithogon inebe warogo 'bisekhemo yi thue ti thue tha'bokhogonat wageikhasik, it akhuni inino inelabut urogonat neke lageikha hisigi.