A'bikaka 18 - ALLAH ANE WENW KET MEKE WAROGO WOKNINAKHIKHE WENE

O Babel wuleleken tagalinakhunem ileken lakhasikhe wene

¹ Itithogon yoknekhesik oba nen yabokane, at malaikat ninat meke ageikhe pogot oba nen usagunem lakhigi. At iti obatne horleak dogolik, isagal yago lagarek hak, a'bi'bal yago akhuni agat oba meke tha'bokhogonat inoba yibarlogo 'bekhe laga higi.

^2-3 Itithogon usa'agasik oba nen ane kokhogonat men ekhe, “Akhuni ageikhe nen anggur apusu wogeisugunem nalok hunu-hunu ageikharek iti hak, he kok yugunisake hagarik nekherek meke etnogo oba agaken dageisinem, Hagatnabini, iluk, akhuni inukuloak etaga tomok tha'bokhogonat inom, ap koktek inetagapogot agat oba meke inom, yogeisugunem, inom param hagakhe lageikha iti. Nen, at he iti oba hiakhogon dogolik, oba agaken dageisinem ha'uagaluk obabut hagakherek iti baga, akhuni agat oba meke yi meke ti meke oko hunekharek palegarek meke inikierek hagarekhe lageikhaat. Itithogon hagakhe lageikha mekeat, yogotak arat wuleleken tagalinakha yi, hein! Itithogon wuleleken tagalinakhama, Iblis agarumi inom men, mokat obabut weak meke men, Thue nausak dek iluk agorlerakharek meke tha'bokhogonat inom, it inaila hagatlaga o,” iluk yogokhikhe.

^4-5 Itithogon yogokhikhesik oba nen yabokane, pogot oba nen ageikhe ane men ekhe, “Akhuni nen, yi meke ti meke upu wema oba duk helakhogon 'bilik dagegarek hak, it akhuni nen, at he iti inom weak hagakho motok welageikharek meke iti pogot oba mot-mot dageikhemo, an Allah nakla eberek motok welagei iti nen, an nen it wene inoba 'biluk weagarinabigin. It weagarinakhe dogolik, hit an na'buri meke it hinom dogolik, it inobabut waganogo weak hagasumo hinom weagathinabunogo nen, it here'isalok lo dukhitni o.

⁶ Nen, hit nen, at he iti ukum oba 'bugun meke nen, at nen it hagarinakhe laga hagat, ukum ebe oba 'bekhe dogolik, ageikhe inomat oba dukhogon 'bino o. Nen, at nen i melageisegarek iti hak, anini inoba 'bekhe laga meke iti, oko ukum oba 'bekhe dogolik, ageikhe inom oba dukhogon 'bino o.

⁷ At he iti, ekaerek nen ekhe dogolik, An nebe he kok dogolik, akhuni napma 'bisalok hagasik welagei ha yoma re! Thoge 'banhama nen nakla weak atluk de aga dogogin nogo? Dek o, iluk yi meke ti meke oba hiakhogon dogolik ekaerek nen kokhogon hogorakhekho motok werek iti hagat, hinet kokhogon wakhe dogolik, akla weak atluk de aga dogoagaluk ukum wogotno o.

⁸ Itithogon apekherek iti nen, an Allah nobatne horleakma re, opaki hasigat hipiri no inom, u kok inom, wogotluk nen, ebe o hali 'bumo nukunem akla weak atluk de ago motok dogogin iti o,” iluk pogot oba nen isinem nasuk holhi.

⁹ At he iti itithogon ebe hali neke dogolik, isi thode dageisinem, it ap koktek inetagapogot agat oba welageikharek meke, at he iti oba agaken dageisinem, thebelu'buk param ha'uagaluk hagakhunem, hagakhe lagoukha meke emenogo nen inileken lakhalok, uak di ago de ago hagakhe lageikha.

¹⁰ Uak de itithogon aga dogolik, “At weagatdekhemo hinet wariogo iti, nit ninom weagatninakhunem hinet wasunogo,” iluk inayuk nen inebe walegat hekhogon metek dogolik, de yigithogon aga lageikha, “At Allah nen, hit akhuni o Babel meke hinobatne horleak etnogo, il opaki hasigat satu jam hakene, ukum hinoba 'biluk weagathinakhe iti, eiye, eiye,” iluk de aga lageikha hisigi.

¹¹ It itithogon de aga korlek, it akhuni yi meke ti meke oko hunekharek meke nen, men ekhe lagoukha, “Ninameke yi meke ti meke wolik lalok, it akhuni o Babel meke inoba oko palhorek meke etnogo, yabokane thani inoba oko waganhe dogogun,” iluk inuak di ago de ago hagakhe lageikhaat.

¹² Itithogon de aga dogolik, “Yi meke ti meke iti ebe oko kogat palharek meke emas inom, perak inom, helekit eken oko kogat palharek meke etaga permata inom, mutiara inom, su kain sutera inom, lenan su inom, elokhoken he, morla pimut hakene inom, ki'bi-ki'bi warek hakene inom, o obasi hano meke inom, wam hakene etaga gajah aik werek meke yi meke ti meke hagakharek meke inom, o yi meke ti meke oko kok palharek meke hagakhik, tembaga meke hagakhik, pisue meke hagakhik, helekit etaga pualam meke hagakhik, hagakharek meke inom,

¹³ obasi hano meke kami inom, hite hakene meke inom, diboka hakene meke inom, o mur apusu inom, kemenyan apusu inom, anggur eken apusu inom, o zaitun eken apusu inom, tepung wul hakene etnogo meke inom, gandum inom, sapi inom, kuda inom, domba inom, oto hakene etaga kereta inom, akhuni inatuaneke dogoagaluk inom, tha'bokhogonat wolok lalok, thani inoba oko palhe dogogun,” iluk de aga lageikha.

¹⁴ Itithogon de aga dogolik, it Babel meke men yogeisega, “Yi meke ti meke hit hinetaiken warlok meke dek ageik, yi meke ti meke oba hiakhogon dogolik, hinakla arlekenhogon welagathep meke dek ageik, hagakhemo, hit nen yabokane heago waganusak motok erlok dek aga o,” iluk ekhe lageikha.

¹⁵ Itithogon egasik, it akhuni yi meke ti meke oko tha'busogo it Babel meke inoba thaburekhe lageikha meke emenogo nen, “It akhuni o Babel meke weagarinakhe iti hak, nit itithogonat weagatninabunogo,” iluk inayuk nen inebe walegat hekhogon metek dogolik, inuak de aga dogolik, men ekhe lageikha,

^16-17 “Hit Babel meke hinasu kain lenan su meke elokhoken morla pimut hakene meke inom, ki'bi-ki'bi warek hakene meke inom i'biluk, hinobake emas meke inom, helekit eken oko kogat palharek meke etaga permata meke inom, mutiara meke inom, wagahethep etnogo, il opaki hasigat satu jam hakene arat alomatlageikha yi eiye, eiye,” iluk inuak di ago de ago hagakhe lageikha. It itithogon ekhe korlek, it akhuni ku kok meke etaga kapal wolok nekharek meke inougi ap koktek ino, inagarumi ku wakharek meke inom, it akhuni aperek wogosik lageikharek meke inom, it aperek i laut yekelekmake yi meke ti meke herarik nekharek meke inom, tha'bokhogonat, it akhuni Babel meke inebe hali nukunem inisi thode inileken lageik walegat hekhogon metek dogolik, men ekhe lageikha,

^18-19 “Eiye, nayuk o. O kota akhuni Babel meke inai ukul yi hakene, o yi ai ti ai aperek werek nogo? Motok dek o,” iluk wul meke 'bisi negen inukuloak oba yugulogo inuak de aga dogolik men ekhe lageikha, “Ihi, nakmu lak o. It akhuni o Babel meke inameke yi meke ti meke doalegatma, nit ninaku oko palogo inikierek hagatninakharek etnogo mekeat he, it opaki hasigat satu jam hakeneat alomatlageikhe yi nakmu lak o,” iluk ekhe lageikha.

²⁰ Itithogon ekhe korlek, at ageikhe nen, it Allah a'buri meke men yogeisekhe, “Allah nen he, hit hinokoma it o Babel meke ukum inoba 'biluk weagarinakhe iti nen, hit pogot oba meke tha'bokhogonat hinakla arleken akhigik, hit Yesus nen hinayoko 'biluk la'inageisikhe meke inom, hit at ane yogeisegethep meke inom, hit Allah a'buri hinom, hit tha'bokhogonat hinakla arleken akhigik, hagatni o,” iluk isinem holhi.

²¹ Itithogon isinem holhirik oba nen yabokane, at malaikat obatne horleak meke ageikhe wagasik helekit kok yi meke ti meke tamelharek meke hakene meke po wukhogon i laut yekelekma usa'i aga dogolik men ekhe, “At Allah nen hit akhuni o kota Babel meke, yigithogonat obatnerogon po usa'inagagin o. Itithogon usa'inagumo yabokane akhuni nen inileken hisagun motok dek o.

^22-23 Akhuni o yi ai ti ai oko hunekharek meke, inetaga dek hakene mekeat he, ap hit meke anek he, inetagawerek welageikha o. Nen, hit nen hinausa meke baga akhuni yi ai ti ai inukuloak etaga dopok, hinekalat nukherinakhe lagabat. Itithogon hagakhe lagap mekeat he, it gitar wakharek meke inom, akhuni etai wakharek meke inom, dokop elo horlelogo huthegarek iti hak huthegarek meke inom, pikon kok meke ane huthegarek meke inom, yabokane wakhunem ane holugun degat. Nen, ap ageikhe yi meke ti meke ikimo horleak hagakherek meke hagakhunem inileken hugun degat. Nen, inapiri gandum eken meke thagalhunem helekit ane ekherek meke iti, yabokane ane isinem inasuk holugun degat. Nen, hinageisagal amulok inileken hugun degat. Nen, ap nen humi woginakhunem inakla arlekenhogon inane egarek meke inasuk holugun degat o,” iluk isinem holhi.

²⁴ It akhuni o kota Babel meke nen, akhuni Allah ane yogeisegarek meke inom, Allah a'buri aperek inom, inamep ulabogo inakhik, it akhuni aperek agat oba inakha meke tha'bokhogonat, it nenat inakhik, inakhukhasikmo nogo nen he, inamep iniki agot oba werek iti nen, Allah nen ukum inoba 'biluk, weagarinakhe iti.