A'bikaka 16 - ALLAH ANE WENW KET MEKE WAROGO WOKNINAKHIKHE WENE

Allah nen akla aga inoba 'biluk weagarinakhunem lakhasikhe wene

¹ Itithogon lakhigirik oba nen, yabokane, Allah ai halekma etnogo nen, t ane kokhogon it malaikat inebe 7 baga emenogo men yogeisugunem nasuk holhi, “An Allah nakla aga i henago negen isoak ebe 7 baga henago meke ithi tialogo akhuni agat oba meke inoba usa'i lani o,” iluk yogeisekhe.

² Yogeisekhemo, it malaikat inebe 7 emenogo meke ageikhe alebageik Allah akla aga i henago negen etnogo meke ageikhe tialogo akhuni agat oba meke inoba arat usa'i agunem, it akhuni ebetlake aperek tha'bokhogonat inetai ekerlogo, helo yeke kok etnogo etaga holal waganek etnogo waganhik, inetaiken akaneke ebe at hakene alino hagarek etnogo oba hakotdigik, hagakha meke, pot weak meke inobake dukhi aga laga lakhigi.

³ Itithogon higirikmo nen, yabokane it malaikat inebe 7 emenogo meke opakiat nen itithogon arat usa'i agasik oba nen, ageikhe nen Allah akla aga i henago negen etnogo meke ageikhe tialogo i laut yekelek oba usa'i agunem, i elokhoken akhuni inakhunem inamep hakene hagatlaga dogolik, yi meke ti meke i laut yekelek akla iluk welagarek meke tha'bokhogonat watlarik laga laga lakhigi.

⁴ Itithogon higirik oba nen, yabokane, it malaikat emenogo meke inebe pere nen itithogon usabi ageikhasik oba nen, ageikhe nen Allah akla aga i henago negen etnogo meke ageikhe tialogo i elesimoke inom, nen i ebe kok asi agarekmake inom, obake usabi agunem, i tha'bokhogonat elokhoken mep aga laga lakhigi.

⁵ Itithogon hagatlagunem, at malaikat i iteerek meke nen Allah men yogokhe, “Allah hebe alebat welagagitik, yogotak hikhok motogat dogolik, karelek motok welagatek meke nen, wene mothogonat inoba 'begen o.

⁶ Nen, it ap iti nen, hat ha'buri inom, hat hane yogeisegarek meke inom, inamep ulabogo inakhukhasikmo, mep noagaluk wogeisegen iti, inobabut oba mothogonat wogeisegen o, nopase,” iluk yogokhe laga nasuk holhi.

⁷ Itithogon yogokhesik oba nen yabokane, Allah ake hetu hunekharekma nen ane ageikhe men isinem holhi, “Allah hobatne horleak, yi meke ti meke hagasusak erlok motok anek dogolik, ukum inoba 'bigik, kokhik, eberogonat mothogonat egetek etnogo nen, itithogon hagakhen o, nopase,” iluk ekhe laga holhi.

⁸ It malaikat emenogo meke inebe henagan oba nen arat itithogon usabi ageikhasik oba nen, ageikhe nen Allah akla aga i henago negen etnogo meke ageikhe tialogo mulikin oba usakhunem, mulikin aik nen akhuni inoba hali yagalinakhe dogoagaluk, mulikin aik weak hagarogo 'bekhemo, akhuni inoba hali yagalinakhe laga lakhigi.

⁹ Itithogon aik nen hali yagalinakhemo inoba kokhogon nasinem hinet wakhe dogolik, Allah akla aga inoba 'biluk weagarinabusak tak-tagat weagarinakhe laga mekeat he, at ebe hogorasuogoluk weak hagakhe lageikha meke thogotdisalok, inobabut hebelageidek dogolik, it nen, “Allah ebe nikitlatlep e,” iluk Allah etaga motok weagatdekhe lageikha hisigi.

¹⁰ It malaikat emenogo meke inebe 4 nen arat itithogon usabi ageikhasik oba nen, ageikhe nen Allah akla aga i henago negen etnogo meke ageikhe tialogo helo yeke hakene kok etnogo kok meke welagarekma obolukmo usabi agunem, o at kok dogolik hagasik welagarekma tha'bokhogonat mum aga laga. Itithogon mum agunem, it akhuni hinet wakhe dogolik, ina'bi inaik nen hundiluk, men ekhe lageikha, “Ninagalumo u weak yoma nina'it o,” iluk

¹¹ inobabut inikhogat dogolik weak hagakhe lageikha meke here'isalok, inobabut hebelageidek dogolik, it nen he, “Allah ebe nikitlatlep e,” iluk Allah kok pogot oba meke etaga motok weagatdekhoat welageikha hisigi.

¹² Itithogon werek korlek, it malaikat emenogo meke inebe 5 nen itithogon arat hagakhasikmo nen, malaikat ageikhe nen, Allah akla aga i henago negen etnogo meke ageikhe tialogo, it ap inetagapogot o mulikin dagei agarekma timur meke wisuagaluk, i kok etaga Efrat oba usabi agunem, it wisugunke i ebe 'berok ekhe laga.

¹³ Itithogon 'berok ekhesikmo nen, yabokane, warlo etnogo inom, helo yeke hakene kok etnogo inom, Allah ane yogeisekherek meke thalek ekalat ekherek meke etnogo inom, inapema nen mokat inobabut weak meke inebe 3 oba nen hurlukhak hakene meke dukhi aga laga.

¹⁴ Mokat iti inebe Iblis agarumi meke akhuni inoba duk i agunem hagasusak dek meke elalinat hagakharek meke etnogoat o. It itithogon dukhi ageikhasik nen, Allah obatne horleakma yi meke ti meke hagasusak erlok anek etnogo ai wi asigin iti baga wim inom yabuogoluk, ap inetagapogot o yi ai ti ai natogorinabuogoluk, wim yoko laga lageikha hisigi.

¹⁵ Itithogon lageikhasikmo nen, at Yesus nen men yoknekhe, “Hasuk holin o. Akhuni inilarlurlu waganuogoluk limago wageikharek iti hak, an itithogonat wisigin o. Itithogonat wagunem, akhuni inal palek werekma inekarli agarek iti hak, hit itithogonat hinekarli asunogo iluk hinasu ibat ikhauwogoluk karelogo 'biluk dogogun halok he, Allah nen hanothinakhunem hinakla arleken asugun o,” iluk yoknikhunem holhi.

¹⁶ Nen, it Iblis agarumi inobabut weak meke emenogo nen, it ap koktek emenogo o it akhuni Ibrani meke inane baga etaga Harmagedon egarek oba iti natogorlogo 'bisugunem lageisigi.

¹⁷ Itithogon higirik oba nen, yabokane, it malaikat emenogo meke inebe 6 oba itithogon arat hagakhasik oba nen, at ageikhe nen, Allah akla aga i henago negen etnogo meke ageikhe tialogo pogot abelmake oisa werekmake usabi agunem, Allah ai halekma at kok welagarekma obolukmo nen ane ageikhe kokhogon men ekhe, “Arat ilugun warogo hagatlaga o,” iluk ekhe.

¹⁸ Itithogon isinem, o yabok eran-alep yegethigik, pogot ane sup iluk nen ane luk-luk lageik, dugul kok inayuk meke akhuni Allah nen winametdisasikhe nen hurli yogotak hurli, dugul iti hakene ageikhe aborlok luk-lagat higidek meke itiat aborlok luk-lagathigik, hagakhe laga lakhigi.

¹⁹ Itithogon hagakhunem, o ukul kok etnogo agat pakhogon henagan mogoulogo hagatlageik, akhuni inukuloak etaga tomok Allah ebe inokodek meke inai ukul tomok tha'bokhogonat tuguk-tagakhogon wuleleken tagalageik, hagatlagunem, Allah nen, “An nakla aga apik anggur apusu henago negen etnogo, at o Babel kok etnogo wogosigin,” iluk abok yogokhikhe meke iti Allah akla ebekhesik nen, wogokhe laga higi.

²⁰ Nen, i eken palekmake tha'bokhogonat inom, tom tha'bokhogonat inom, dek ageik,

²¹ pogot oba nen miso digiken kok meke ebe tomok akin he, 50 kilo meke usa'aga dogolik, akhuni inebe inakhik, hagakhe laga. Itithogon inakhunem, it nen ekhe dogolik, “Miso digiken weak ninariogo yi, Allah ebe nikitlatlep e,” iluk etaga weagatdekhe lageikha lageisigi.