A'bikaka 14 - ALLAH ANE WENW KET MEKE WAROGO WOKNINAKHIKHE WENE

At Domba Eak inom, a'buri tilinakhikhe meke inom, lageisasikhe wene

¹ Itithogon lakhigirik oba nen, yabokane lakhigi meke, at Domba Eak etnogo tom Sion oba metek werekma lakhigi. Iti re, at ebe men, it akhuni inebe 144.000 nen, at Domba Eak inom, opase inom, ipisak inetaga it iti inebe tomok inilhaoak oba holal waganek meke men, inom werekma lageisigi.

² Itithogon dogolik, inane i tutunmo usekhe dogolik ane hakene igik, pogot ane kokhogon ekherek hakene igik, it akhuni gitar wakharek meke nen ebe wakhunem ane ekherek hak igik, pogot oba nen inane doalegat isinem nasuk holhi.

³ Itithogon inane doalegat ekhe dogolik, Allah ebe kok welagarekma obolukmo werek korlek, it Allah nen winametdisasikhe meke aperek inebe 4 oba emenogo inom, ap inarluetek emenogo inom, inil oba etai ket meke yakulogo it akhuni ebetlake yakulu'buk inokodek meke, it akhuni inebe 144.000 agat oba nen arat tilinakhe meke emenogo anek inilumo etai wakhe lageikha inane holhi.

^4-5 It akhuni iti inebe, karelek dogouogoluk, humi inom noge igidek dogolik, inape baga nen inekalat ageikhe egarek degat, nen, akhuni aperek nen, “It iti weak ageikhe hagakhama,” iluk wene inoba 'busak degat meke werekma, yi akhuni ti akhuni inakla nen kigilogo inoko palinakhikhemo, hipiri yukuk meke alebageik itakharek iti hak, it inebe Allah inom, Domba Eak inom, 'bisalok, Domba Eak etnogo holak komake laga halok oporlik lageikharek meke hisigi o.

Malaikat inebe 3 meke lageisasikhe wene

⁶ Itithogon higirik oba nen, yabokane at malaikat ageikhe wene hano wene motok dogogin meke akhuni agat oba meke inukuloak etaga tomok, inane tomok, inoado tomok, inaila tomok, yogeisilik pogot obake hitluk lagunem lakhigi.

⁷ Itithogon hitluk nekhe dogolik, ane kokhogon men ekhe laga, “Ninopase Allah nen ukum inoba 'bigik, kokhik, hagasigin etnogo, arat hakok i aga iti nen he, Allah pogot inom, agat inom, i laut yekelek inom, i elesi agei tha'bokhogonat inom, walhasikhe meke etnogo hinayukhogon dogolik, hinetaiken at oba hakotdiluk hogorakhe dogono o,” iluk ekhe laga lakhigi.

⁸ Itithogon ekhesikmo nen yabokane, at malaikat ageikhe wagasik, ane men isinem nasuk holhi, “Akhuni aperek nen it aperek thinuknuk atluk, inoba agaken nen param ha'isekhe dogoagaluk, anggur apusu wogeisegarek iti hak, it akhuni o kota Babel meke inoba agaken nen akhuni inukuloak etaga tomok param hagakhe dogoagaluk, inakla kagalharek meke etnogo, inebe arat wulel warogo thebelinakha, yi hein!” iluk isinem holhi.

⁹ It malaikat inebe pere etnogo egasik oba nen, inoporlik malaikat ageikhe wagasik, nen, ane kokhogon men isinem holhi, “Hit aperek helo yeke hakene kok iti inom, ebe hakene alino hagarek iti inom, hinetaiken inoba hakotdiluk hogorinakhesip, hinebe sirlorogo at etaga waganek hinilhaoak oba a? Hiniki baga a, waganhep meke,

¹⁰ akhuni nen, i inom dapukhogon dek, anggur eken apusu anek arle weak henakharek iti hak, Allah akla aga hit akmuthinakhidek, ukum obatnerogon hinoba 'bigin o. Itithogon hinoba 'biluk, nit malaikat Allah hasik welagorek meke inom, Domba Eak etnogo inom, ninil oba hinebe, hetu men, hotali al hakene obasi weak meke etaga belerang men, inom-inom nekerekma etoma la'inagoumo, hinet wakho motok dogogun o.

¹¹ Iti re, hit hinetaiken helo yeke hakene iti inom, kaneke at ebe hakene alino hagarek iti inom, inoba hakotdiluk hogorinakhesip, hinebe sirlorogo etaga waganek waganhep meke itithogon la'inagoumo, dikene hibakone motok, thet walogo hano ageikhe welageidek, hinoba hetu aik nen hinet wakho korlek, hinoado baga thode dageisi motok dogogin o,” iluk isinem holhi.

¹² Wene yi hasik kogat hagasusak he, Allah a'buri at ane hologo mothogon hagakhe dogolik, hinetaiken Yesus oba hakotdiluk welagathep meke iti, hinetaiken thebekhogon hinobakhanini hapugutdiluk dogosak o.

¹³ Wene itithogon isinem holhirik oba nen, yabokane, pogot oba nen ane men yoknikhunem nasuk holhi, “Yogotak akhuni ninoe Etagapogot inom hunik dogolik, at hasik hano hagakhunem inasugun meke, inakla motok arleken akhagun o, iluk holal waganogo 'bino o,” iluk yoknikhunem Allah Agoreke pogot oba nen ane kokhogon men yoknekhe, “Iti eberogonat o. It akhuni iti Yesus obasik thet wiik-weakhogon yabu hagakhe lageikha meke iti, ebe hagakhukha meke wolok lugun iti nen he, thet hano walugun o,” iluk yoknikhunem nasuk holhi.

“Agat oba ai yago meke eken arat horle agama palusak werek,” iluk isukha wene

¹⁴ Itithogon yoknekhesik oba nen, yabokane, oisa kut meke werekma, at ebe abat itaklasi ageikhe meke etnogo hakene meke kare-kare emas meke ukuloak oba ugu, nen, karok korlo meke elaklak weak meke ikimo wolok ebe oisa etnogo baga hurek werekma lakhigi.

¹⁵ Iti oporlik, at malaikat ageikhe Allah ai halekma nen dukhi agasik, ane kokhogon, at oisa baga hurek welaga meke etnogo men yogokhe, “Agat oba eken arat horle agama ebe palusak oba arat asi agama iti nen he, hakarok iti wolok nen, yogotak eken pali usan o,” iluk yogokhemo,

¹⁶ at oisa baga hurek welaga meke etnogo nen akarok etnogo wolok agat oba eken pali usa'aga lakhigi.

¹⁷ Itithogon higirikmo nen, yabokane, at malaikat ageikhe pogot oba Allah ai halekma nen, akarok korlo meke elaklak weak meke wolok dukhi agunem lakhigi.

¹⁸ Itithogon lakhigirikmo nen yabokane, at malaikat ageikhe hetu iteerek meke Allah ake hetu hunekharekma nen wagasik, at malaikat akarok korlo meke elaklak weak meke wolok usa'aga meke etnogo ane kokhogon men yogokhunem nasuk holhi, “Agat oba anggur eken arat horle agama palusak werek iti, hakarok iti wolok, eken pali usan o,” iluk yogokhe.

¹⁹ Itithogon yogokhemo, at etnogo akarok agat oba wolok usa'agasik, anggur eken agat oba meke eken oak oba nen palogo eken thagalharek meke oboluk kokma akla po la'isinem higi. Eken thagalharekma iti ebe, Allah nen akla aga kokhogon inoba 'bekherek itiat o.

²⁰ Nen, anggur eken palek iti ukharlek, o sili abel itikmanke thagalhunem, eken thagalharek meke iti akla nen, mep i elesi negen hunalogo hurli 2 meter kuda ape herle warek oba yekelogo dageikhesik hualogo, hurli 300 kilometer walegat lagunem lakhigi o.