A'bikaka 13 - ALLAH ANE WENW KET MEKE WAROGO WOKNINAKHIKHE WENE

Yeke helo hakene pere koktek meke wisam agunem ileken lakhasikhe wene

¹ Itithogon lakhigirik oba nen, yabokane yeke helo hakene kok meke ageikhe aik ukuloak oba 10 ulabek, nen ukuloak 7 meke, i laut yekelekma nen dukhi agunem lakhigi. Aik 10 baga iti inebe tomok oba, kare-kare ap koktek ikharek iti hak ugu, nen ukuloak 7 baga iti, inebe tomogat oba Allah etaga weagarogo hagakharek meke holal waganek welaga lakhigi.

² At yeke helo meke kok etnogo dukhi agunem higi iti ebe, yeke negen etaga harimau hakene. Nen, isok 'bagei inum hakene kok etaga beruang iti meke isok hakene. Nen, ape, yeke helo yeke hakene etaga singa ape hakene meke itithogon winam agasikmo, at warlo kok etnogo nen, yeke helo hakene iti yogokhe dogolik, “An kok nobatneak dogolik, yi meke ti meke iteerek welagarek etnogo hak, hat an nobolukmo kok dogonogoluk meldagagi o,” iluk yogokhunem holhi.

³ Holhirik nen lakhigi meke, at helo yeke hakene kok etnogo ukuloak emenogo meke ageikhe wakhukhama, ebe watlasusak mekeat, hano dek ageikhesik o'ban anek werekma, akhuni tha'bokhogonat inileken hegasik nen hogorarik, at oporlik motok lagunem hisigi.

⁴ At warlo etnogo nen, at helo yeke hakene kok etnogo yogokhe dogolik, “Hat kok hobatne werek dogonok,” iluk meldekhe iti nen, it akhuni inetaiken warlo etnogo inom, helo yeke hakene kok etnogo inom, inoba hakotdiluk hogorinakhe dogolik men ekhe lagoukha, “Warlo kok yi inom tak-tak, tha apegep? Ipisak tak-tak ageikhe dek o. Nen, tha hak nen at ipisak wim yabusak apegep? Erlok dek o,” iluk ekhe lageikha hisigi o.

⁵ Itithogon ekhe korlek, thut 42 bulan holelik laga korlek, at helo yeke hakene kok etnogo ekaerek nen hogorakhigik, Allah etaga weagarogo 'bigik, hagakhe dogolik, akhuni apma 'bisalok hagasik dogoagaluk warlo kok meke etnogo nen iteerek 'bisekhemo lakhigi.

⁶ At itithogon dogolik, at nen Allah ebe inom, etaga inom, at aila pogot oba inom, it o pogot oba welageikharek meke inom, tha'bokhogonat inetaga weagatdekhe laga higi.

⁷ Iti hakeneat, akhuni inukuloak etaga tomok, inane tomok, inoado tomok, inai tomok, tha'bokhogonat at nen apma 'bisalok hagasik dogoagaluk meldekhemo iteerek atluk, Allah a'buri inom wim yakhe dogolik, obatne degetdisekhe laga higi.

⁸ At Allah nen pogot agat aban walhigidek dogolik, “It eta iniluk motok dogoagaluk hagarinabigin,” iluk inetaga at ADomba Eak, it inobasik wakhukha meke etnogo aruesika baga holal waganogo 'bisikhe. It inetaga itithogon holal waganogo 'bisikhe meke, helo yeke hakene kok etnogo hogorakhidek werek korlek, akhuni agat oba welageikharek meke aperek tha'bokhogonat helo yeke hakene kok etnogo inetaiken oba hakotdiluk hogorakhe lageikha hisigi.

^9-10 Iti nen he, wene yokhisagein yi, hit hinasuk werek halok he, hanorogo holini o. At ageikhe ebe herle warogo 'busak obaat, herle warogo 'bi lugun o. Nen, at ageikhe karok oba wasusak obaat, karok oba wasugunat o. Itithogon hagasugun iti nen, ebe kok he, Allah a'buri meke halok, inetaiken at oba hakotdiluk hinetaiken thebekhogon inobakhanini hapugutdiluk dogosak itiat o.

¹¹ Itithogon higirik nen, oporlik lakhigi meke, helo yeke hakene kok ninat meke ageikhe ukuloak oba domba aik hakene pere ulabek, nen ane isinem, warlo ane hakene meke, agatla nen winam agunem lakhigi o.

¹² Winam agasik, helo yeke hakene alep meke etnogo iteerek dogolik hagakhe laga meke, at helo yeke hakene yabokane meke iti iteerek agasik, at nen akhuni yogeisekhe dogolik, “Akhuni agat oba welagathep meke tha'bokhogonat, at helo yeke hakene alep meke etnogo wakhukhama ebe watlasusak meke the ageikhe meke itiat hinetaiken at oba hakotdiluk hogorasusak o,” iluk ane obatnerogon yogeisasinem holhi o.

¹³ At helo yeke hakene kok yabokane winam aga meke etnogo, akhuni nen at ebe hutduagaluk, it iniloba elalin meke hagakhe dogolik, pogot oba nen hetu usabi agunem lakhigi.

¹⁴ Itithogon ageikhe hagakhe laga iti, at helo yeke hakene kok alep meke etnogo nen, elalin meke at il oba hagakhe dogoagaluk iteerek 'bekhe meke etnogo ebe hagakhe dogolik, akhuni agat oba welageikharek meke ekalat nukhetdisekhe laga. Itithogon nukhetdisekhe dogolik, it akhuni emenogo nen, helo yeke hakene kok meke karok oba palekma ebe watlasusak meke apuke the ageikhe meke etnogo ebe hakene alino hagarogo kaneke ageikhe hagasuagaluk yogeisekhemo ebe hagakha lakhigi.

¹⁵ Itithogon hagakhama, at helo yeke hakene yabokane meke etnogo nen kaneke alino hagarek meke etnogo ilugutdekhemo ane isinem, it akhuni inetaiken kaneke etnogo oba hakotdigidek meke inebe motok inasigiluk wim yoko 'bekhemo inarik laga lageikha hisigi.

¹⁶ Itithogon inakhe korlek, at helo yeke hakene yabokane meke etnogo nen he, akhuni koktek meke inom, akhuni inetaga dek meke inom, inikierek meke inom, inerlageik meke inom, inatuan meke inom, it werlek meke inom, it tha'bokhogonat inebe tomok men yogeisekhe laga, “Helo yeke hakene kok meke etaga hinoba waganek meke yi, akhuni nen inil ekerlogo asirlo negen hinilhaoak oba a? Hiniki ebeke baga a, waganini o.

¹⁷ Hit nen, at etaga holal waganek meke a? Etaga hasik iniki wenago meke a, waganhep meke halok, yi meke ti meke oko paligik, it aperek inoba oko waganhik, hagakhe dogosak o. Itithogon mekeat he, it akhuni aperek netaga waganhidek meke halok, itithogon waganhe dogosak motok dek o,” iluk ane obatnerogon yogeisekhe laga lakhigi o.

¹⁸ Iti nen he, wene iti hasik, hinakla kagalek dek dogosak motok dek o. At he, tha nen akla kagalek halok he, helo yeke hakene iti etaga hasik, iniki 666 oba wenakha iti, ebe re, ap ageikhe etaga meke wenakhama iti nen he, hutdusak o.