A'bikaka 12 - ALLAH ANE WENW KET MEKE WAROGO WOKNINAKHIKHE WENE

He inom, warlo inom, ileken hisasikhe wene

¹ Itithogon higirik oba nen, yabokane lakhigi meke, akhuni nen hutduagaluk pogot oba elalinat hagasusak dek meke kokhogon hagakhunem yigithogon lakhigi. He meke ageikhe thut oba isok 'biluk asu negen mulikin meke ugu, nen husagal 12 meke ukuloak oba kare-kare negen ugu meke lakhigi.

² He iti eak akma meke arat itasigiluk hinet wakhe dogolik, u nen ane ke ekhe laga.

³ Itithogon hinet wakhe korlek, akhuni nen hutduagaluk pogot oba elalinat hagasusak dek meke kokhogon hagakhunem ageikhe lakhigiat. Warlo ebe oado morla mep hakene kogat meke ukuloak 7 meke, nen, aik ukuloak oba, 10 meke ulabek, nen, kare-kare 7 meke ap koktek ikharek iti hak, ukuloak oba tomok ugu meke welaga.

⁴ Itithogon ugu dogolik, aga therle oba husagal pogot oba meke 3 mikirlogo 'biluk, pere here'iluk, ageikhe lisogo agat oba usa'isa agasik, he etnogo eak itakhasinem haumhogon nagaluk elokhoma kagalek welaga o.

⁵ Itithogon elokhoma werek korlek, ap thegerluk wolok wam hago welageikharek iti hak, at he etnogo eak thegerluk pisuemaken meke wolok akhuni inukuloak etaga tomok tha'bokhogonat, apma 'bisalok obatnerogo hagasik dogogin meke itakhekhe. Itithogon itakhe korlek eranogoat, elege itago etnogo tilogo wolok Allah kok welagarekma obolukmo etnogo elokhoma 'bi lagunem lakhigi o.

⁶ Itithogon wolok laga korlek, at he etnogo o limo akhuni dekma dogosak oba, Allah nen obolukmo ageikhe karelogo 'bisasikhe baga etoma lo lagasik werekma therogo werek korlek, iki 1.260 baga welaga lakhigi o.

⁷ Itithogon lagasik werek korlek, pogot oba wim kagalagunem lakhigi. Malaikat Mikhael agarumi inom nen warlo etnogo wasuogoluk hagakhunem, at etnogo agarumi malaikat at werekmake meke inom ageikhasik wim yakhe lageikha.

^8-9 Itithogon yakhe dogolik he, at warlo kok etnogo obatne degetdisegasik, at ebe inom, malaikat at agarumi meke inom, “O pogot oba yoma dogosak motok dek o,” iluk agat oba po hilogo usa'isa agunem hisigi. Warlo kok iti etaga, Iblis igik, Setan igik, egarek meke, muk haganeat nen akhuni tha'bokhogonat nukhetdisekherek meke etnogoat o.

¹⁰ Itithogon obatne degetdisegasik usa'isa agama, pogot oba nen inane kokhogon men isinem nasuk holhi, “At iti nen Allah il oba ekalat it ninagarlak lak ninerugi dikene hibako wene inoba 'bisi motok welagarek meke etnogo arat obatne degetdisalok ebe ula'isega iti hano! Ninopase Allah Etagapogot kok dogolik, tilninabuagaluk Kristus meldisikhe etnogo, yi meke ti meke tha'bokhogonat iteerek dogolik, ipisak inobatne ageikhasik nen tilninakhasik, inapma arat 'binanha yi o.

¹¹ It ninagarlak lak ninerugi iti inekaerek inebe inakmu ageidek, Ninakha halok he, hanoat o, iluk nukhunem inakha. It iti, Domba Eak amep ulabogo wakhukha iti baga inom, it nen Allah ane ebe wene iti pakhogon yogeisilik nekhe lageikha iti baga inom, Iblis etnogo arat obatne degetdisega iti o.

¹² Iti nen he, hit pogot oba welagathep meke tha'bokhogonat yirani! Hinakla arleken akhekhe dogono o. Hinakla arleken akhekhe korlek, hit agat oba meke inom, i laut yekelekma meke inom, anek he, Iblis etnogo hinoba usa'i agama, at iki dogogin meke hutdekhesik, at nen, Niki pererlagat anek dogogin iti nenaluk, iluk akla aga dageikhesik weagathinabigin iti nen, eiye! Nakmu lak o,” iluk isinem holhi o.

¹³ Itithogon usa'i ageikhemo dogolik, “An yigithogon agat oba usa'ani agama welagei,” iluk hutdekhesik nogo nen, he eak ap itakhekhe meke etnogo wasigiluk mutluk laga.

¹⁴ Itithogon mutluk laga iti nen, at agorlerogon o akhuni dekmaat dogoagaluk, Allah nen obolukmo karelogo 'bisasikhe baga iti hitluk loagaluk, thue ko'balusa kok meke a'bikha meke wogokhemo hitluk etoma lagasik, Allah nen therogo werek korlek, o mo dageigik, usigik, hagakhe korlek, 3 tahun setengah welaga higi.

¹⁵ Itithogon werekma, at warlo etnogo nen, at he etnogo i iduk waga dogolik nen wolok loagaluk, i apema nen elesi kok motok hirlelogo ulabogo, he etnogo ebe werekmake mot-mot la'ekhe laga.

¹⁶ Itithogon la'ekhe mekeat he, akhuni nen, he etnogo ebe tilu hak, agat ape kagoukhogon nen i etnogo akla kolakhunem, dek aga laga higi.

¹⁷ Itithogon usa'isinem, warlo etnogo akla aga he etnogo oba 'biluk, akhuni he etnogo nen itago meke ebetlake Allah nen wene ninasuk wakhikhe wene hologo mothogon hagakhik, Yesus nen hagakhikhe wene pakhogon yogeisigik, hagakharek meke inasigiluk inawim ka'beldekhesik,

¹⁸ ebe i laut yekelek aik oba etoma lagasik metek werekma lakhigi o.