A'bikaka 11 - ALLAH ANE WENW KET MEKE WAROGO WOKNINAKHIKHE WENE

“Ap inebe pere Allah ane yogeisekho werekma inasugun,” iluk yogokhikhe wene

¹ Itithogon yoknekhesik nen yabokane, o walegeke thegerluk hakene meke woknekhesik nen, men yoknekhe, “Allah ai halek inom, at ako warogo hetu hunekharek meke obolukmo etnogo inom, o walegeke baga walhigik, akhuni Allah ai halekma at ebe hogorasi ukiliogei meke tha'bokhogonat hiki wenageinakhik, hagasi lan o.

^2-3 Itithogon hiki wenasi ligin mekeat he, o silimo Allah ai halekma abel itikmanke anek, Allah nen it akhuni at ebe inokodek meke wogeisekhemo, it nen o silimo ethoma inom, Allah ekaerek ai o kota ithi inom, inisok nen al debelhe korlek thut 42 oba, iniki 1260 oba, dogogun iti nen, hat nen walhasusak motok dek o. It itithogon werek korlek, ap inebe pere su pelabi su ikharek iti hak ugu dogolik, an nane pakhogon yogeisekhe dogoagaluk an nen la'isasigin o,” iluk yoknekhe.

⁴ It ap inebe pere iti, o zaitun pere inom, lampu yibakharek meke isok tilik pere meke inom, ninopase Etagapogot yi meke ti meke tha'bokhogonat iteerek welagarek meke etnogo elokhoma welageikharek meke emenogo, it ap inebe pere itiat o.

⁵ Nen, it akhuni nen, “It ap pere iti weagarinabuok,” iluk ugun halok he, hetu it ap pere iti inapema nen dukhi aga dogolik, it inathili meke iti inebe hali niginat o. Halok he, tha nen, it weagarinabigiluk hagasigin halok he, wasusak obaat itithogon inasugun o.

⁶ Nen, it nen Allah ane yogeisekhe dogolik, “Pogot oba nen miso usasusak dek o,” iluk erlogat tha'bit wakhik, i tha'bokhogonat mep asuagaluk erlogat hagakhik, nen inakla warlok apagun oba, “Akhuni agat oba meke yi u ti u inoba 'buok,” iluk erlogat u erlo inoba 'bisigik, hagakhe dogoagaluk, Allah nen iteerek 'bisekhemo itithogonat hagasugun hisigi o.

⁷ Wene itithogon arat yogeisega halok, helo yeke hakene kok meke ageikhe kilinmo wema eloma nen inoba dageitluk, inom yakhe dogolik, obatne degetdisalok inebe inasigin o.

⁸ Itithogon warogo 'bisalok, inebe warek, o kota holagarlemke ninoe o meldiluk wakhukhama etoma 'bisagun o. O kota iti, o Sodom inom, Mesir inom, oba likharek etnogoat o.

⁹ Itithogon 'bisaumo werekma, akhuni inukuloak etaga tomok, inane tomok, inoado tomok, inai tomok, inebe tha'bokhogonat, “Warek thalinabusak dek o,” iluk here'isalok inileken wurisalok-perisalok hagakho korlek, iniki 3 hari oba dogoluk nen ageikhe baga hurli dikene inom hisekhe dogogun o.

¹⁰ Itithogon werek korlek, akhuni agat oba meke inebe tha'bokhogonat nen ekhe dogolik he, “It ap pere wene yoknisekhe lageikha meke yi nen, yi aik ti aik doalegat ninoba 'bekhe lageikha meke etnogo inebe hanoat inakha,” iluk inakla arleken motok akhekhe dogolik, pesta hagakhik, yi meke ti meke oko dek werlegat it nen it aperek wogeisigik, wok-wok hagakhe dogogun o.

¹¹ Iniki 3 hari itithogon hagakhe dogoluk, iniki ageikhe dikene nen itithogon hagakho werekma, Allah Agoreke inilugurinakherek meke etnogo it ap pere iti inakla ukiluk, inilugurinabiluk nen meldisasinem, akhuni tha'bokhogonat inileken hisalok, inayuk motok asugun o.

¹² Itithogon inayuk atluk werek korlek, pogot oba nen ane kokhogonat it ap pere wene yogeisekhe dogogun meke emenogo men yogeisagein, “Dageitni o,” iluk yogeisugunem, it ap etnogo it inathili meke emenogo inileken lageisik werek korlek pogot oba oisa akla dageisinem lageisigi o.

¹³ Etanem, dugul kok inayuk meke ageikhe luk-lagathekhe dogolik, o kota iti ebe 10 baga mikirlogo 'biluk, kokmake here'ekhe dogolik, opakiat ageikhe motok misak dapukhogon 'bekhe dogolik, akhuni inebe 7.000 baga inakhunem, it ebetlake inakhidek meke inayuk motok kogat atluk, it nen, “Allah pogot oba meke nayuk,” iluk hogorakhunem hisigi o.

¹⁴ Itithogon hagakhunem hisigi iti, lakhani! Weagarinabigin meke etnogo, iniki pere baga arat weagarinakhasik, oporlik ageikhe ibat weagarinabigin meke weregat o.

Pikon ane ilugun oba arat huthasikhe wene

¹⁵ Itithogon hisigirik oba nen, it malaikat inebe 7 baga emenogo, inebe 6 oba inapikon arat ane huthegasik oba nen, ageikhe apikon ane huthasinem, pogot oba nen inane kogat yigithogon isinem holhi, “Alep akhuni agat oba meke nen inapma 'bisalok hagasik welagoukha meke, yogotak ninopase Etagapogot Allah nen ninoe Kristus nen tilninabuagaluk meldisikhe meke etnogo ipisak nen inapma arat 'binagasik, at Kristus nen haknisik motok-motok dogogin o,” iluk ekhe lageikha.

^16-18 Nen, it inarluetek inebe 24 oba nen Allah alilu koktek inobolukmo welageikharek meke emenogo nen inelokhe thogoum Allah apma ukegasik nen hogorakhe dogolik men ekhe lageikha, “Allah ninopase, u a e, Hat hogatne horleak, u a e, Alep welagagitik nen yogotak motogat welagatek iti baga, u a e, Yogotak hat hebe kok Hetagapogot dogolik, u a e, Akhuni tha'bokhogonat hapma arat 'bisegetik, u a e, Hagasik dogogin iti nen, u a e, Heagei wathekhe lago o, u a e, Akhuni inukuloak etaga tomok tha'bokhogonat nen, u a e, Inanini hoba 'bekhe lageikha meke, u a e, Hat nen hanini inoba arat 'bigin iti, u a e. Itithogon inoba 'bekhe dogolik, u a e, Akhuni watlagoukha meke aperek, u a e, Ukum inoba 'bekhe dogolik, u a e, It aperek ukum inoba kosigin meke, u a e, Hat hane yogeisegarek meke inom, u a e, Ha'buri kok inetagawerek meke inom, u a e, Inetaga dek meke inom tha'bokhogonat, u a e, Hat inayukhogon dogolik, u a e, Hane waganho welageikharek meke hasik, u a e, Oko arat wogeisagein iti, u a e, It aperek o agat oba weagatdisukha meke, u a e, Hat nen it arat weagarinabigin iti, u a e, Itithogon hagasigin iti nen he, u a e, Heagei wathakhe lago o, u a e,” iluk etai wakhunem holhi.

¹⁹ Itithogon wakhunem hisigirik lakhigi meke, pogot oba Allah ai halekma thu hualagunem, Allah nen wene ninasuk wakhikhe wene holal waganek peti akla ukharlek welageikhe etnogo winam aga. Itithogon winam agunem, eran-alep o yabok yibarlabethigik, pogot ane sup iluk nen ane luk-luk lageik, dugul luk-lagathigik, miso digiken kok meke debekhogon nikik, hagakhunem lakhigi o.