2 Timotius 2 - ALLAH ANE WENW KET MEKE WAROGO WOKNINAKHIKHE WENE

Timotius ebe Yesus oba dopokhogon dogoagaluk, asuk wakhikhe wene

¹ Timotius na'but o. Nit Kristus Yesus ninom hunik werekma, Allah obabut hano nen woknisekherek meke iti baga hetaiken horlerogon dogono.

² An nen wene akhuni doalegat inil oba yakulhikhigimo waganhigin meke etnogo, hat nen it akhuni aperek inobabut hupunhek meke nen it aperek yakulisekhe dogoagaluk, inoba 'bin o.

³ Ap ekeraguntek meke inougi inane hologo wim yakhe dogolik, yi aik ti aik hilik-hilik yakharek hak, hat nen Yesus Kristus ane hologo, yi aik ti aik hekhe dogolik, hobakhanini hapugutdiluk hagakhe dogono.

⁴ It ap ekeraguntek iti, inougi koktek inakla arleken akhoagaluk, wim yakhe dogolik, yi meke ti meke uma werek meke oba ebekhidegat yakharek iti o.

⁵ Nen ageikhe, tha ae 'busuk tha ae 'busuk werek laga dogolik, ap inayoko 'bekherek meke nen, “Yigithogon hagasusak,” iluk ekherek meke ane hologo lageidek halok, “Ae 'busuk aga meke, ap yiat,” iluk, oko kare-kare negen i'bisegarek meke iti i'bisausak erlok dek o. Ane hologo lago halogat i'bisausak o.

⁶ Nen, ageikhe, akhuni aperek inayabu horlalok nen, ai yago thereak-moreak hagariogei meke iti, ebe horle agunem, inekaerek nenat tak nekarek iti o.

⁷ Wene an nen yokhigi meke iti, hakla ebekhe dogoumo, ninoe Etagapogot nen tha'bokhogonat hutukhogon yokhisusak werek iti nen, oba ebekhe dogono o.

⁸ An hano wene yogeisilik nekherek iti, Yesus Kristus, at Daud opa itago mekeat ebe wakhukhama, Allah nen ilugutdisikhe wene iti, hakla eberek motok dogono.

⁹ An hano wene itithogon yogeisilik nukhunem, it akhuni aperek nen, it aperek weak hagariogei meke hagarinabu hak, an yi aik ti aik hagatnakhik, niki herle wakhik, hagariogei mekeat he, Allah ane iti herle wasusak erlok dek o. Herle hisalegat werek o.

¹⁰ Iti nen he, it akhuni aperek Allah nen wenageinakhikhe meke Kristus Yesus inom hunisumo, inebe tilinakhik, iniluk hano motok dogoagaluk, hanorinakhik, hagasuagaluk, an itithogon weagatnakho korlegat, nobakhanini hapugutdiluk welagarek iti o.

¹¹ Wene men iluk egarek yi eberogonat o, Nit at ninom watlago meke halok, at ninom niniluk motok dogogunat o.

¹² Nit ninobakhanini hapugutdiluk dogogun halok he, akhuni at apma ukiluk dogogun meke iti, nit ninom nenat hagasik dogogun o. Nit nen he, “Yesus ninoe dek o,” iluk, at ebe motok here'isogo halok, at nen he, “It an nagarumi degat o,” iluk, heredinaniginat o.

¹³ Meke re, at ekaerek nen, “An nobabut alep welagei meke iti dek o, iluk ninat hagatlagarek dek iti nen, nit at oba dopokhogon dogogun dek halok, at nen nit ninoba dopokhogon motogat welagarek o,” iluk, egarek iti eberogonat o.

“Weat wene meke here'isalok, ebe wene itiat inasuk wakhe dogono,” iluk, yogokhikhe wene

¹⁴ Wene yokhigi meke iti tha'bokhogonat it aperek inakla eberogo yogeisekhe dogono. Yogeisekhe dogolik, weat, inane meke hasigat wenemuk yabiogei iti Allah il oba inasuk hanorogon wakhe dogono. Itithogon wenemuk yabiogei iti baga, hano hagatlasigin dek o. It aperek inasuk holiluk, weak asugunat o.

¹⁵ Allah nen he, “Hat an nobasik hano hagakhe lagan,” iluk, yokhisuak nen he, hobatnerogonat hagakhe dogono. It aperek yi meke ti meke hagasuagaluk inayoko 'bisinem nen, hanorogon hagakhe dogolik, inekarli dekhogonat hagakharek iti hak, hat nen ebe wene itiat mothogon yakulisekhe dogono.

¹⁶ Meke re, it akhuni aperek nen ebe wene iti dekma, yugunat, dek asigin meke iliogei iti, here'isalok mirlokhogon laga dogono. It iti itithogonat ekhe dogolik, Allah ebe here'isalok hikhogon-hekhogon horla dukhiliogei iti o.

¹⁷ Wene ebe wene dekmaat yakulisiliogei meke iti, akhuni inagalumo aikharlu palinakhunem, ibikakal-ebekakalat kok agarek hak, it iti inane itithogonat iliogei iti baga it aperek kogat weagarinabiogei iti o. Ap Himeneus Filetus ipisak itithogon hagakhe dogolik,

¹⁸ ebe wene here'isalok mirlokhogon dukhisukhasik, it nen he, “Allah nen akhuni warek meke inilugurinabigin iluk abok isikhe etnogo arat hagatlagama yi,” iluk, it aperek yogeisugunem, inetaiken Allah oba hakotdiluk werek meke weagarinabiogei iti o.

¹⁹ Meke re, Allah nen o herlaga negen 'bisikhe meke obatneak motogat dogogin iti baga holal men iluk waganek werek iti o, “Ninoe Etagapogot ekaerek a'buri wenageinakhikhe meke iti inebe ilu o,” iluk isikhe. Nen, wene ageikhe, “It aperek nen, An nebe ninoe Etagapogot a'burat o, iluk, iliogei meke, Weak hagasusak nina'it o, iluk here'isalok mirlokhogon lo laga dogoak o,” iluk, isikhemo holal waganek werek iti o.

²⁰ O kok halekma akla, yi meke ti meke emas meke inom, perak meke inom, hagarek meke oko kok iti meke anek welagarek 'buk o. O meke inom, agat meke inom, hagarek meke welagaregat iti o. Hano meke hagasuogoluk halok, hano mekeat waganhik, yugunat meke hagasuogoluk halok, yugunat meke waganhik, hagakharek iti o.

²¹ Iti hagat, tha nen ekaerek nen weak hagakherek meke iti horogo here'isalok, ebe Allah hasik 'bisalok werekma, at nenat yi meke ti meke hano meke hagasigiluk, “Arat hano,” iluk ayoko 'bigin iti.

²² Iti nen hat he, it ap elege meke nen inoba agaken dageiluk weak hagariogei meke iti here'isalok, lo laga dogono. It akhuni aperek inetaiken hano opakiat dogolik ninoe Etagapogot nen yomageisoagaluk ayoko 'biliogei meke iti hinom dapukhogon dogono. Hinomat mothogon hagakhik, Allah oba dopokhogon welageik, akhuni inebe inakmurogon welageik, akhuni inom hanorogon welageik, hagakharek iti mekeat mutluk laga dogono.

²³ Itithogon hagakhe dogolik, it akhuni aperek inetaiken abisake meke nen wene inokodek dogoligat, wenemuk yabiogei iti ilugun oba, it-it inom wim negen yabiogei iti, hinom hagakhidek here'isekhe dogono.

²⁴ At tha nen ninoe Etagapogot atuaneke hagakhe dogolik, itithogon hagasusak dek. Akhuni tha'bokhogonat inobabut liokhogon hanorogon inom dogosak o. Obabut obakhanini hapugutdiluk dogolik, akhuni wene hanorogon yakulisekhe dogosak o.

²⁵ Itithogon yakulisugunem, it akhuni aperek nen at ane thagaluogoluk hagakhunem, at nen ane liokhogonat inasuk wakhe dogosak o. Itithogonat inasuk wakhunem, it weak hagakharek meke here'isalok, ebe wene iti waganuagaluk, Allah nen inakla kagaliginat a? iluk inasuk wakhe dogosak.

²⁶ Itithogon inasuk wakhunem, it inobabut hebelatluk, at Iblis akla apekherek meke hagakhe dogoagaluk inebe 'bagei herle nen hageinakherek hak hageinakhe mekeat he, Allah nen herle etnogo hisalogo 'biluk ula'isageinat o.