2 Petrus 1 - ALLAH ANE WENW KET MEKE WAROGO WOKNINAKHIKHE WENE

Heagei warinakhikhe wene

¹ Nagarlak lak nerugi. An Simon Petrus Yesus Kristus nen, at atuaneke dogoagaluk nayoko 'biluk la'ani ageikhemo wagagi. Iti, at ebe Allah at dogolik, obabut mothogon anek hagakherek etnogo nen, hit ninom tak-tagat ninetaiken at oba hakotdugunem tilninabiogo meke, wene yi holal waganogo hinoba la'i agei iti.

² Hit nen Allah inom, ninoe Etagapogot Yesus inom, ipisak inebe thekekhogon hiniluat welagap iti nen, it inobabut hano etnogo nen hano meke wokhisigik, hinetaiken hapugutdinagagik, kokhogon hagakho motogat dogoak o.

“Nit ninopase Allah nen wenakninakhikhesik ninayoko 'bisikhe,” iluk yogeisasikhe wene

³ At Allah ikhok motogat dogolik, yi meke ti meke elalinat hagakhunem hogorakho motok welageikharek meke etnogo nen ninayoko 'bisikhe iti. Halok he, nit nen at ebe thekekhogon ninilu atluk, nit ninebe niniluk dogolik, at hasik mothogon hagakhe dogoagaluk, at ekaerek obatne baga yi meke ti meke woknisasikhemo ite agosik welago.

⁴ It akhuni agat oba yoma yi meke ti meke warlok nen, inetaiken nen nukunem inobabut weak hagatlatluk weak apegarek meke iti here'isalok lo dukhitluk, Allah obabut waganuagaluk, hano meke woknisiliogo iti. At nen elalinat hagakhunem hogorakho motok welageikharek meke etnogo nen, “Yi meke ti meke oko baga waganusak erlok dek. Hano motok kok meke, wokhisagein werek o,” iluk abok yoknisasikhe iti, ebe woknisiliogo.

⁵ Iti nen, hit iti meke ite asubageik nen, akilukhogon hagakhe dogono. Hinetaiken Kristus oba hakotdiluk welagap meke iti oba dukhogon, inobabut mothogon hagakharek iti meke ite atluk hagakhe dogono. Mothogon hagakhe dogolik, iti meke oba dukhogon, Allah ebe inilu ageikharek iti meke ite atno.

⁶ Allah ebe hinilu dogolik, iti meke oba dukhogon, inetaiken thebekhogon welageikharek meke iti, ite atno. Hinetaiken thebekhogon dogolik, iti meke oba dukhogon, yi hasik ti hasik hagakhe dogolik, inobakhanini hapugutdiluk welageikharek iti meke, ite atno. Hinobakhanini hapugutdiluk dogolik, iti meke oba dukhogon, Allah apma dogolik, at akla warlok apekherek mothogon hagakharek meke, ite atno.

⁷ Allah akla warlok apekherek mothogon hagakhe dogolik, iti meke oba dukhogon, inagarlak lak inerugi inakmurogo welageikharek iti meke, ite atno. Hinagarlak lak hinerugi hinakmurogo dogolik, iti meke oba dukhogon, akhuni inebe tha'bokhogonat inetaiken hunik welageikharek iti meke, ite atno.

⁸ Hit he, hinobabut iti meke tha'bokhogonat ite atluk, eran-alep kokhogon ite atluk dogogun iti nen, we yugunat alomarogo welageidek, ninoe Etagapogot Yesus Kristus thekekhogon hinilu asugun o.

⁹ Itithogon mekeat he, it hit meke aperek nen inobabut iti meke ite ageidek dogogun halok he, inileken agot atluk thalek werek. Itithogon dogolik, it nen, “Weak hagakhe lagagu meke, Allah nen thobalninakhikhe,” iluk usak mekeat he, at obarlikmatdiluk werek iti.

¹⁰ Iti nen, nagarlak lak nerugi. Hinebe Allah nen wenakhinakhikhesik hinayoko 'bisikhe iti, eberogonat hagatlasuagaluk, hit nen hinobatnerogo hagakhe dogono. Itithogon hagakhe dogogun halok, hinetaiken Allah baga hakotdiluk welagap meke here'isalok dukhugun dek o.

¹¹ Ninoe Etagapogot Yesus Kristus tilninabiogo meke etnogo, kok motogat dogoginmo etoma 'binagei ukekhe dogolik, at nen, “Hit hinebe iteerek o,” iluk, heagei warogo hanorogo wokhisik ukigin o.

¹² Iti nen, wene ebe wene hinilu agagisip hinetaiken horlerogon hago welagathep mekeat he, an nen wene igi iti hasik hibiku-yogoku hinakla ebetdisekho motok dogogin o.

^13-14 At ninoe Etagapogot Yesus Kristus nen yoknikhikhe hagat, an nebe naburlal meke elanma hasik welagei yi, nokorlogo here'isalok ibat ligin horogat welagei, iluk an nilu welagei iti nen, yogotak nebe niluk welagei ya baga, wene iti hasik hinakla eberogo yokhisekho motok dogosak apekhe lagei o.

¹⁵ Yabokane nebe watlagei halok, wene iti hit hinakla eberek motok dogobageik nen iluk, hanorogon yokhisekhe dogogin o.

“Yesus ebe hogorakharek meke yigithogon ninileken hasugu,” iluk yogeisasikhe wene

¹⁶ Ninoe Etagapogot Yesus Kristus obatneak etnogo ebe wageikhe meke hasik hinilurogo yokhisekhe lago iti, wene suakane akhuni inakla kagalogo pilinekharek meke iti baga lisogon yokhisekhe lago dek o. At ebe Etagapogot meke wageikhemo, ninekaerek ninileken tomok hasugu meke nen yokhisekhe lago o.

¹⁷ Nit o etoma werekma, ninopase Allah nen, at Yesus ebe hogorakhik, heagei wakhik, hagakhunem nit ninasuk holhugu. At Allah ebe kogat hogorakho motok welageikharek meke etnogo nen, “An na'but netaiken hunik meke noba hotok egerek ebe itiat,”

¹⁸ iluk, ane pogot oba nen usa'i agunem, nit Yesus ninom tom Allah ekaerek atom ukul iti baga dogolik ninasuk tomok holhugu.

¹⁹ Itithogon holhugu iti nenat, ninakla nen, “It ap Allah ane yogeisekhe lagoukha meke nen isukha meke iti eberogonat,” iluk alebat hemurlugat negen apekhe lagagu meke, yabokane ninasuk holhugu iti baga nen, motok hutukhogon hutdisugu iti. Halok he, o mum abirat werekma, akhuni nen isagal yibarlogo 'bugunem, liarogo motok welageikharek iti hak, wene iti hinetaikenma eberogo motok waganhe dogono. Itithogon waganho werekma, yabokane o mum meke wi ekhe korlek, husagal wap dukhi agarek iti hak, at Kristus hinetaikenma liathinabisigin o.

^20-21 Wene Allah ane iti, it akhuni inakla kagalogo ageikhe isukha dek o. Inebe akhuni mekeat he, Allah Agoreke nen inakla kagalogo yakulisekhe korlek, Allah nen isikhe wene iti yogeisekhe lagoukha iti nen, wene Allah ane holal waganogo 'bisukha meke werek iti, Allah Agoreke nen ninakla kagalhidekma, ninekaerek ninarligat nen thekekhogon hutdusak erlok dek o.