2 Korintus 9 - ALLAH ANE WENW KET MEKE WAROGO WOKNINAKHIKHE WENE

Allah a'buri nen inagarlak lak inerugi aperek yomageisausak wene

¹ An nen he, hit nen it Allah a'buri o Yudea meke yomageisauwogoluk natogokhe lagap meke iti hasik, wene holal waganogo hinoba la'isusak dek meke la'i agei iti.

² Hit nen it iti yomageisauwogoluk hinakla arlekenhogon hagakhe lagap iti, hinobabut an nilu. An nen hit hogothinakhe dogolik, it akhuni o Makedonia yoma men yogeisekhe lagei, “Tahun alep iti baga nen, it akhuni o Akhaya etoma meke nen it iti itithogon yomageisauwogoluk it meke natogorlogo 'bisukhasik werek,” iluk hogothinakhe lagei. Hit hinakla arlekenhogon hagakhe lagap iti baga nen, it akhuni yoma aperek inebe doalegat nen it iti 'bisauwogoluk inetaiken aborlok iliogeiat.

³ Hit hinobabut hagakhe lagap iti hasik, nit nen hogothinakhe lago meke iti, “We yugunat hogorinakhe lagoma,” iluk unogo iluk, hit nen an igi hagat, hulogo 'bisalok dogobageik nen iluk, ninagarlak lak hinoba la'isa ago iti o.

⁴ Itithogon la'isa agei iti, hit nen aban natogorlogo 'bisigidek werekma an akhuni Makedonia meke ninom hinoba wisusak erlok dek o. Alebat an nen ekhe dogolik, “It itithogon eberogonat hano hagasugun werek o,” iluk isigisikmo, an nekarli ageik, hit hinekarli ageik, asunogo iluk, it tak la'isa agei iti o. Hit nen wene iti hasik hutdisigisipmo, hit hinekarli asunogo iluk yokhisausak dek meke igi iti.

⁵ Itithogon aban natogorlogo 'bigidek dogogun halok erlok dek iti nen, an aban wageidek dogolik ninagarlak lak iti tak la'isasigiluk igi iti o. It hinoba witluk nen, hit nen iti 'bisauwogoluk abok isigip meke etnogo, it nen arat ilugun natogosi isuagaluk inakla kagalogo yogeisekhe lagei. An itithogon hagakhe lagei iti, hit nen hinameke warlok werek korlek it inane obatnerogon hinakla kagalumo 'bisausak erlok dek o. Hit hinetaiken nenat 'bisalok werekma hano, iluk hagakhe lagei iti o.

⁶ Wene iti hasik igin yi hinakla hutdini. It akhuni aperek nen ai herlekha'bugat yariogei meke re, eken herlekha'bugat palugun o. Nen, it aperek ai kokhogon yariogei meke ebe kokhogonat palugun o.

⁷ Akhuni inakla arleken motok akhekhe dogolik it aperek 'bisegarek meke iti, Allah nen inebe akmu welagarek iti nen, hit hinebe tomok hinameke warlok werek korlek, it aperek nen hinakla obatnerogon kagalhunem 'bisausak erlok dek o. Hit hinakla hano dogolik, hinekaerek hinakla nenat kagalogo 'bisausak o.

^8-9 Akhuni inobabut hano hagakharek meke hasik, Allah ane baga holal men iluk waganek werek, “It nen hano meke akhuni ya wogeisigik, ta wogeisigik, supurisekhe dogolik, it aperek inerlageik meke supurisegarek. Inobabut hano nen wogeisegarek iti, Allah nen akla eberek motok dogogin o,” iluk holal waganogo 'bisukha hak, at Allah obabut hano nen, yi meke ti meke oba dukhogon wokhisugunem, hit nen hibiku-yogoku hinekaerek hasik erlogat dogolik, oba dukhogon it aperek hanorogon yomageisekhe dogobageik iluk, Allah nen erlogat wokhisausak werek o.

¹⁰ At Allah nen it ai yakharek meke ai wogeisigik, hipiri ebe noagaluk wogeisigik, hagakherek iti. Itithogonat, at nenat, ai yasuagaluk palisegarek hak, hinobabut it aperek yomageisekhe dogosak iti meke wokhisigik, nen ai yakhunem eken kokhogon isu hak, it aperek hinakmu nen yomageisugunem kogotdigik, hagasigin o.

¹¹ Itithogon wokhisaumo, hit nen, yi meke ti meke oba dukhogon dogolik, hiniki kogat it aperek yomageisekhe dogogun o. Itithogon yomageisagun meke iti, nit nen supusogo wogeisugunem, Allah heagei wasugunat o.

¹² Hit akhuni hinakmu nen yomageisagun iti baga, Allah a'buri inikimo dek meke anek erlogat waganhe dogogun 'buk. Titu asu hak, akhuni doalegat nen Allah heagei kokhogon wakhe dogogunat o.

¹³ Itithogon yomageisekhe dogogun iti baga, it Allah a'buri o Yudea meke nen, “It akhuni Korintus meke Kristus hagakhikhe wene hano wene etnogo waganhukhasik, Ninobabut mothogon hagakhe dogogun o, iluk isukha tak-tagat hagariogei. Itithogon hagakhe dogolik it meke aperek warlok ageidek nit yomaknisigik, it aperek tha'bokhogonat yomageisigik, hagakha o,” iluk hinobabut ekagat paldiluk Allah hogorasugunat o.

¹⁴ Itithogon hogorakhe dogolik, it nen he, “Allah obabut hano etnogo nen, it nen akhuni kokhogon yomageisekhe dogoagaluk inobabut iti meke wogeisekhemo hagariogei,” iluk hinebe inakmu dogolik Allah ayoko kokhogon 'bekhe dogogun iti o.

¹⁵ At Allah nen hano motok nit nen pilinerogo usak erlok dek meke woknisasikhe iti hasik khogorakhe dogouok o.