2 Korintus 7 - ALLAH ANE WENW KET MEKE WAROGO WOKNINAKHIKHE WENE

¹ Halok he, nagarlak lak nerugi. Hinebe nakmu lak o. At Allah nen itithogon dogogun iluk abok yoknisasikhe iti nen, ninebe inom, ninetaiken inom, weak hagakhorek meke iti, hanorogo horogo here'isauwok o. Itithogon here'isalok, Allah ebe ninayuk dogolik, ninebe at hasik 'bisalok dogouok nen, ninetaiken 'bogokhogon horletdekhe dogouok o.

Akhuni o Korintus meke inobabut hebelagoukhama Paulus akla arleken akhasikhe wene

² Nit ninobasik he, ninebe wokninabu hak hinetaiken hunik dogono. Nit nen he, ap ageikhe weagathinakhik, alomathinakhik, nukhetdinagagik, hagakho dek o.

³ An nen alebageik yokhisekhe dogolik, “Hit he, hinebe ninetaiken oba hunik motok welagap o. Halok he, ninom watlasumo watlasusagat o. Nen, ninom niniluk dogoumo, dogosagat o,” iluk itihogon alebageik isigi iti nen, yogotak, wene yokhisigi iti, wene hinoba 'bigiluk igi dek o.

⁴ An nakla nen, hit hano hagasugun, iluk netaiken hapukhogonat dogolik hogothinakho motok welagarek o. Itithogon dogolik, it akhuni aperek nen weagatninabuogoluk yi aik ti aik hagatninakhe korlegat an nakla motok hano ageik, kogat nakla arleken akhigik, hagakhe lagei o.

⁵ Nit o Makedonia yoma wagagusik werekma, ninoba hapugutdakhigidekmaat, weagatninabuogoluk yi aik ti aik hagatninakhukhaat iti o. Akhuni aperek nen ninasuogoluk hagakhunem, nit ninetaiken ninayuk aga korlek welagosik.

⁶ Werekma, at Allah obabut he, akhuni nen, “Nikithogon hagasugun,” iluk inakla weak atlukmo inakla hanorinakherek etnogo nen, at Titus la'i agama wagasik nen nakla hanotninabi aga.

⁷ At Titus ebe waga iti baga anek nakla hano aga 'buk. Hit nen hagakhunem at akla hano aga meke iti, yoknisi aga iti baga, nakla hanotdekheat o. Hit nen he, “At Paulus ninom abuk atlo e,” iluk noba ebekhik, “Ninobabut nen weak hagakhugu e,” iluk hinakla apigik, it aperek nen an nabok isinem, hinetaiken oba nenat an werekmake ageik, hagakhep meke iti pilinerogo yoknisi agama nakla arleken motok akhigiat o.

⁸ Itithogon nakla arleken akhigi mekeat he, an nen alebageik holal waganogo hinoba la'i agagi etnogo nen, “Inakla weagarinakhigi iti, thogotdusak meke napik nen la'isigi o,” iluk nakla ebekhe lagei dek o. “Napik nen opaki hasik inakla weagarinakhi,” iluk nakla apekhe lagarigat,

⁹ yogotak nakla arleken akhekhe lagei o. Hit hinakla weak aga iti nen nakla arleken akhekhe lagei 'buk. Hit hinakla weak aga iti baga, hit weak hagakhigip meke here'isalok hinobabut hebelagap iti nen, nakla arleken akhigi o. Hit hinakla weak agap iti, at Allah akla warlok apekhe bagaat weak aga. Halok, nit nen nukhetdinagago usak dek o.

¹⁰ Akhuni agat oba meke nen inakla kagalhunem, inakla weak atluk nen, inebe watlageikharek mekeat he, at Allah akla warlok apekherek oba inakla weak agarethek, weak hagakharek meke here'isalok inobabut hebelagunem, Allah nen hanorinakherek iti. Hanorinakhunem, “An nakla weak aga baga, napik nen nobabut hebelhi,” iluk yabokane wene munini ebekharek dek.

¹¹ At Allah akla warlok apekherek oba hinakla weak atluk nen, “Napik nen weak hagakhima,” iluk hinobabut hebelatluk nen, hano meke obatnerogo hagakhik, wene hinoba dek mothogon hagakhik, hinakla aga dageigik, hinayuk ageik, “Paulus ninom abuk atlo o,” iluk noba ebekhik, hinakla agaken thok-thok hagakhik, at weak hagakhikhe werek iti ikirluk oba ula'isigik, hagakhep iti lakhani! Itithogon hagakhe dogolik hit weak agekhe hagakhidek wene hinoba meke korogo motok la'isegep o.

¹² An nen holal waganogo hinoba la'i agagi mekeat, at ap ageikhe weak hagakhikhe iti hasik la'i agagi 'buk. Nen, at weak hagakhikhe iti baga it aperek nuk agoukha meke iti hasik la'i agagi 'bugat o. Iti re, hit hinekaerek hinakla nen, “Nit Paulus lak ninakmurogo it hasik obatnerogo hagasusak welago higi,” iluk Allah il obaat, hinekaerek hinobabut palubageik nen iluk la'i agagi o.

¹³ Itithogon la'i agagimo hagakhep iti nen nit ninakla hano aga. Iti hasik ninakla hano agaat. Nen, at Titus hit tha'bokhogonat nen ebe waganhisip hano hagakhunem, akla hano aga meke pilinerogo yoknisugunem, ninakla arleken motok akhogoat o.

¹⁴ An nen alebageik Titus yogokhe dogolik, “It yabokane hano hagasugun,” iluk hogothinakhe lagagi hak hagakhepma, an nekarli ageidek o. Nit nen yi wene ti wene eberogonat anek yokhisasugu hak, at Titus yogokhe dogolik hit hogothinakhugu iti, eberogonat o.

¹⁵ At nen hit hinebe akmu welaga mekeat he, ebe hinoba wagama, hinayuk ageik, hinoageleke dik-dik igik, hagakhe dogoligat at ebe waganhesip, at nen yokhisugunem, ane hologo hagakhep meke iti, hinoba ebethinakhe dogolik, hit tha'bokhogonat hinebe motok akmuthinabiogo o.

¹⁶ Nen, an nen he, “It yi meke ti meke hano anek hagakhe dogogun meke,” iluk netaiken hapukhogon dogolik nakla arleken akhekhe lagei o.