2 Korintus 3 - ALLAH ANE WENW KET MEKE WAROGO WOKNINAKHIKHE WENE

“At Allah nen wene ket wene nit ninoba watninasikhemo, at hasik hagakhe lago,” iluk yogeisasikhe wene

¹ Itithogon igi iti, nit ninekaerek nen yabokane ninakeke 'bakhekhe lago nogo a? Motok dek o. E a, at he, it akhuni aperek nen hagakharek iti hak, nit wokninabuagaluk surat hit wokhisigik, it aperek nen wokninabuagaluk surat hit nen wogeisigik, hagakhe lago a? Dek o.

² Nit wokninabuagaluk, hit hinebeat holal hakene waganek nit ninetaikenma werekma, akhuni tha'bokhogonat nen etaa thalhik, hutdinanhik, hagasusak werek o.

³ Hit hinebe, wene Kristus nen holal waganogo 'bisikhemo nit nen la'isugu meke hakene welagap o. Holal iti, disu apusu baga waganhidek mekeat he, Allah iluk motok welagarek etnogo Agoreke baga waganhikhe o. Nen, helekit thabia meke baga waganhidegat. Akhuni inetaiken obaat waganhikhe o.

⁴ At Kristus nen nit ninetaiken wene munini uan 'bero ebekhidegat, Allah oba hakotdiluk dogoagaluk hagatninakhikhe iti nen, wene itithogon igi o.

⁵ Nit ninekaerek ninobatne baga yi meke ti meke hagasusak erlok, iluk, ninakla apekhe lago dek o. At Allah nenat ninobatnetninakhikhemo hagasusak erlogat welago.

⁶ Allah nen wene ket wene nit ninoba watnisasikhe iti, nit nen wolok loagaluk, at nenat ninobatnetninakhikhemo erlok wolok lausak welago. Wene alep inasuk wakhikhemo holal waganogo 'bisukha meke tak-tagat hagakhidek halok, iti baga inebe inakherek. Meke re, Allah Agoreke nen inilugurinakherek iti nen, nit wene alep holal waganek meke wolok lageidek, at Agoreke nen yoknisiliogo meke wolok laga lago iti.

^7-8 Allah nen wene helekit oba holal waganhikhe iti here'isogorek iti baga wene ninoba 'bakhalok ninebe watlagorek o. Meke re, ebekeram wene iti wogeisugunem, hogorakhukha. Helekit iti at Musa nen wolok usa'agunem, at elokhoken a'bi'bal weak meke dek aga korlegat, it akhuni Israel meke inileken lakhau sirluk-pabuk isikhe. Wene holal waganek iti wogeisugunem, hogorakhukha iti hak, at Allah Agoreke woknisugunem, ebeluk kogat hogorasusak o.

⁹ Wene holal wganek iti tak-tagat hagakhidek oba nen wene ninoba 'bakhasugu iti. Meke re, wene iti wogeisugunem hogorakhukha mekeat he, iti herlekha'bugat o. At Yesus nen wene ninoba meke korogo wokhalok nen Allah baga ninapuke hunogo 'binanhikhe iti wene woknisasikhe iti hasik anek, ebeluk motok kogat hogorasusak o.

¹⁰ Wene yabokane meke motok kogat hogorasusak iti nen, alep meke hogorakhukha iti hak, yabokane hogorasusak dek aga o.

¹¹ Wene alep meke iti dek asigin werek korlegat, hogorakhukha halok he, motok dogogin meke iti ebeluk motok kogat hogorasusak o.

¹² Yabokane itithogonat hano asigin iluk, ninakla arleken akhekhe dogolik, wene etnogo ninayuk motok degat yogeisekhe lago o.

¹³ Nit he, at Musa elokhoken a'bi'bal weak etnogo motok dek asigiluk dek aga korlegat he, it akhuni Israel meke nen inileken neaunogo iluk, elokhoken su baga labekhikhe iti hak, nit itithogon hagasusak dek o.

¹⁴ Meke re, it iti inetaiken abiretdisikhemo welagoukha. Yogotak meneke Allah nen, “Itithogon hagathinabigin,” iluk wene inom wakhukha meke holal waganek meke iti, it nen etaga thalhunem, inetaiken kagalasusak dek abisake ageikhesik sapumeke laberek werek. Itithogon laberek meke iti, at Kristus inom hunekhunem anek he, inetaiken sapumeke laberek meke iti erlok 'bukalagarek iti.

¹⁵ Yogotak meneke wene at Musa nen holal waganhikhe meke iti, it nen etaga thalhunem, inetaiken kagalasusak dek sapumeke laberegat werek.

¹⁶ Itithogon mekeat, akhuni it meke aperek inetaiken ninoe Etagapogot oba hebenokhogon la'isinem, inetaiken sapumeke laberek meke iti wokhekherek.

¹⁷ “Ninoe Etagapogot,” iluk igi iti, Allah Agoreke hasigat o. Akhuni ninoe Etagapogot Agoreke inakla werekma, herle hialek inasokne welageikharek iti.

¹⁸ Inileken inamukhak oba it akhuni aperek inebe ekagat lageisegarek iti hak, nit tha'bokhogonat ninelokhoken sapumeke laberek dekma, akhuni nen ninoe Etagapogot hogorakharek meke iti amukhak negen inileken laknisiliogei. Nit ninebe at ninoe hakene asuagaluk, eran-alep hagatninakho motok werekma, hogotninabusak negen aga lago. At Allah Agoreke iti ebe Etagapogot atma, at nenat hagatninabiogo.