2 Korintus 11 - ALLAH ANE WENW KET MEKE WAROGO WOKNINAKHIKHE WENE

“It aperek Kristus nen inayoko 'biluk la'isekherek meke negen hagatlatluk wiriogei,” iluk yogeisasikhe wene

¹ An nen wene herlekha'bugat akhuni kepu meke nen egarek hak igin yi re, wenaknikhidek, hinasuk holek dogobageik iluk yokhisigi. Hinasuk holek dogoni o.

² Homagarlugi inobabut ap inom noge igidek meke, inaguni inoba dopokhogon 'bisegarek hak, an nen he, hit Kristus oba dopokhogon 'binagagi mekeat he, hit nen ap ninat meke ageikhe dopolek halok he, Allah akla aga dagou hak, an nakla aga dagousagat o.

³ Itithogon meke re, alebat at Warlo etnogo obabut kaukmo, he Hawa nukhetdisikhe hak, hit hinetaiken opakiat Kristus oba hakotdiluk at hasik karelek welagap meke nukhetdinagousak iti, nayuk ariogo.

⁴ It aperek hinoba witluk nen, nit nen hano wene Yesus hagakhikhe wene yokhisasugumo waganhigip hak, yokhisigidek. Ninat meke yokhisugunem, Allah Agoreke waganhigisibat, yabokane ageikhe meke agoreke waganhik, hano wene waganhigisibat, yabokane wene ninat meke waganhik, hinakla arlekenhogon waganhe lagap hisekhe lagei nayuk o.

⁵ It aperek iti, Yesus nen inayoko 'biluk la'isa ageikhe meke negen hagatlatluk wagunem, hit nen, “It iti koktek negen,” iluk woginakhe korlegat he, an nakla nen he, “It koktek, nen, an erlok dek,” iluk apekhe lagei motok dek o.

⁶ An wene isinem inoba horlagaperek mekeat, wene ebe nokodek 'buk o. Nilu. An nen hibiku-yogoku yi meke ti meke hasik isinem, hit nen, “At wene ilu o,” iluk ekagat hutdanhe lagabat o.

⁷ An nen Allah ane hano wene iti yokhisekhe dogolik, “Oko ageikhe woknitni,” iluk igidek. Hit kogothinabigiluk an nekaerek nebe kepu negen atluk, itithogon hagakhe lagei iti, hit korlo hagathinakhe lagei iluk usak a? Motok dek o.

⁸ An nen hit yomakhisekhe lagei iti hasik, niki oko negen, it Allah a'buri o nekalokma nen woknikhunem waganhe lagei o. Itithogon waganhe lagei iti baga it akhuni aperek nen, “At Paulus nen it akhuni o Korintus meke yomageisagaluk, oko it aperek meke iki abusak negen waganiogo,” iluk yoknisusagat o.

⁹ An hit ninom dogolik uang dek nen, hit nen aperek woknesuagaluk kino hinoba tiolhe lageidek o. Itithogon werekma, it ap nagarlak lak o Makedonia meke wageikhasik erlogat woknesi ageikha iti nen, yi meke ti meke hasik hit hinoba akinetdinogo iluk, apasigisikmo, kino yokhisigidek welagagisik yabokane itihogonat motok hagakhe dogogin o.

¹⁰ Itithogon hagakhe dogogin iluk, nakla arleken akhekhe dogolik hogorakhekhe lagei meke iti, akhuni o Akhaya etoma meke aperek nen nane magasusak erlok dek, iluk Kristus ane ebe wene nakla dogolik eberogonat igi o.

¹¹ Nenaluk an itithogon igi apegep. Hit hinebe nakmu dek nen igi apegep? Dek o. An hit hinebe nakmu welagei iti Allah iluat o.

¹² It aperek Kristus nen inayoko 'biluk la'isa ageikhe meke thalek wageikhasik hagariogei meke iti nen, “Nit Paulus ninom tak-tak o,” iluk ekhe dogolik hogorakhiliogei meke iti, inane kokok uagaluk an yogotak hagakhe lagei meke yi re, hagakho motogat dogogin o.

¹³ It iti, Kristus nen inayoko 'biluk la'isa ageikhe meke 'buk. At nen la'isa agarek meke negen hagatlatluk witluk akhuni nukhetdisiliogei mekeat o.

¹⁴ It hagariogei iti elalinat hagariogei 'buk. Inopase Iblis ekaerek ekalat nen, malaikat lia wene wolok wageikharek hak hagarogo wagarek hak hagariogei o.

¹⁵ At Iblis atuaneke dogolik, at hasik hagakharek mekeat he, at Allah atuaneke dogolik tak-tagat hagakharek meke negen hagatlatluk wiriogei iti inobabut inikhokmaat o. Itithogon hagakharek iti nen, o ilugun oba, Allah nen oko it yi meke ti meke hasik hagakharek tak-tagat hagarinabigin o.

At Paulus Allah ane yogeisilik nukhunem yi aik ti aik oba aga lageikhe wene

¹⁶ Akhuni hit meke aperek nen, “At Paulus ebe kepu negen,” iluk apaunogo iluk, yabokane nane dagakhogon yokhisigi iti. Itithogon mekeat he, hit nen itithogonat apekhe lagap halok he, an nebe kepu negen dogolik herlekha'bugat ageikhe hogorakhagein yi, hinasuk holini o.

¹⁷ An nen hogorakhagein yi, ninoe Etagapogot nen, “Hat itithogon in,” iluk yoknekhemo hogorakhagein 'buk. Akhuni kepu meke nen hogorakhekhe dogolik egarek hak igin o.

¹⁸ It akhuni inebe doalegat nen yi meke ti meke agat oba meke hasik hogorakhiliogei iti, an herlekha'bugat ageikhe hogorakhageinat o.

¹⁹ Hit hinakla kagalek meke hakene yoma re! It aperek kepu meke inane isinem, hit hinakla arlekenhogon holhethep iti.

²⁰ Itithogon hagakhethep iti baga, hit hinebe it nen inapma 'binagaluk, hinapiri motok tha'bokhogon nikik, hinameke iniki abusak horligik, “Hit erlok dek meke re, nit anek he, kok,” iluk inekaerek nen inakeke 'bakhigik, hinelokhoken dapukhogon hinakhik, hagakhe korlek hinobakhanini hapugutdiluk welagap yoma re!

²¹ Nit meneke, itithogon hagasusak, ninobabut ninayuk nen huk agagu iluk usak, nekarli kogat hausak nogo a? Dek o. It akhuni kepu meke nen egarek hak ageikhe yokhisak. At ageikhe ekarli dek hogorakhekhe halok he, an meneke, nekarli dek hogorakhausagat o.

²² It iti inebe Ibrani meke hak, an meneke, nebe Ibrani mekeat o. It inebe Israel meke hak, an meneke, nebe Israel mekeat o. It inebe inopase Abraham nen itago meke hak, an meneke, nebe nopase Abraham nen itago mekeat o.

²³ It iti Kristus atuaneke dogolik, at hasik herlekha'bugat hagakharek mekeat he, an anek he, kogat hagakherek o, iluk, akhuni thinuknuk meke nen egarek hak ageikhe yokhisigi iti o. It he, thet herlekha'bugat negen hegarek mekeat, an he, thet doalegat hegerek o. It he, opaki hasik hakene iniki herle wakhik, tugi inakhik, inebe watlasusak negen motok inakhik hegarek mekeat he, an anek he, hibiku-yogoku niki herle wakhik, tugi nakhik, nebe watlasusak negen motok nakhik, hegerek o.

²⁴ It akhuni Yahudi meke nen tugi la'bisoko tugi opaki hasik iniki 39 oba nen nakhe lagoukha meke niki wenago, niki 5 baga nakhukhasik.

²⁵ Nen, akhuni o Roma meke nen tugi payuk oba iniki henagan oba nakhukhasigat. Nen, helekit oba tamukhogon nakhukhasigat. Nen, i laut yekelekma etoma ku warogo italhunem, niki henagan oba ku weak atluk tamukhogon ima usasigiat. Nen, niki opaki hasik i laut yekelekma etoma agoum oba thakhogon noge isigisigat.

²⁶ Hibiku-yogoku yukmoke laga lagagisik, iti i ugu nen thebelnakhunem nasusak ageik, akhuni inobabut weak iniki abusak waganharek meke nen nasuogoluk hagakhunem yuk igik, akhuni an nukuloak meke nen nasuogoluk hagakhunem yuk igik, it itikmanke meke nen nasuogoluk hagakhunem yuk igik, o ukul kok halekma nen nasuogoluk hagakhunem yuk igik, leget itikmanke nen nasuogoluk hagakhunem yuk igik, i laut yekelekma nen nasuogoluk hagakhunem yuk igik, akhuni ninat mekeat he, Allah a'buri nagarlak lak meke thalek ninom dogolik nasuogoluk hagakhunem yuk igik, hagakhe lagagisigat.

²⁷ Yi yabu ti yabu hasik thet wiik-weakhogon hagakhik, hibiku-yogoku noge niluk noge igik, hipiri inom, i inom, dek nen abuat welageik, hibiku-yogokuat hipiri nikidek hapugutdigik, nasu dek nen thogei nakhik, o koma noge u heat ageik, hagakhe lagagisigat.

²⁸ Itithogon hagatnakhe korlegat, Allah a'buri yi ai ti ai natogokharek meke tha'bokhogonat inobasik hibiku-yogoku hunik hunik motogat noba akin dogolik wene munini ebekherek o.

²⁹ At ageikhe erlok dek aga halok he, an erlok dek asu hak, nakla weak agaregat. Nen, at ageikhe weak meke nen akla kagalhunem weak aga halok, an nakla aga dageikheregat.

³⁰ Meke re, hogorakhausak halok he, an nebe erlok dek iluk hogorakhausak o.

³¹ An wene igi iti, nekalat igi dek o. At ninoe Etagapogot Yesus opase Allah etaga waganogo hogorakho motok motok dogogun meke etnogo ilu.

³² An o Damsyik werekma, inoe etagapogot Aretas apma meke gubernur iti nen agarumi holagapema thuam werekma an haknabuagaluk inayoko 'bisikhe.

³³ Itithogon inayoko 'bisikhemo kagalek welagoukha mekeat, it akhuni aperek nen an nebe mul yago akla ukhatdaniluk nen, leget 'bakleget elo herlelekmake ula'aniluk herle kilogo usa'anhukhama, it inikimo nen lo lagagi.