2 Korintus 10 - ALLAH ANE WENW KET MEKE WAROGO WOKNINAKHIKHE WENE

Paulus nen, “An nen Allah ayabu itithogon hagakhe lagei,” iluk yogeisasikhe wene

^1-2 An Paulus Kristus obabut enago hano etnogo obabut waganogo, nekaerek nen wene ageikhe hinasuk wasik. It aperek nen he, “At ebe horokhogon ninom dogolik, obabut liokhogon wene yoknisekherek. Meke re, ebe walegat dogolik, obabut ayuk dek obatnerogon yoknisekherek,” iluk egarek meke etnogo yabokane hinoba witluk nen nobabut nayuk dek dogolik nane obatnerogon yokhisaunogo iluk, hutdubageik iluk nane liokhogon yokhisigi. It iti nen he, “Paulus lak iti, akhuni inobabut inikhogat dogolik inobabut waganogo hagariogei,” iluk ninabok weak paliogei meke iti, nobabut nayuk dek nane obatnerogon wenageisasigin iluk wene munini ebekhe lagei.

³ Nit ninebe agat oba dogolik, akhuni sikhe thege baga wim yakharek hak yakhe lago dek o.

⁴ Nit wim yakhe lago iti ebe, akhuni inasikhe inarege baga yakhe lago 'buk. Allah obatneak welagarek meke etnogo asikhe arege baga, wim ilugunmo o obatnerogon halek meke iti, erlok misalusak iti baga yakhe lago.

⁵ It akhuni aperek inakla nen, “Allah iti ebe nina'it o. It akhuni aperek at ebe inilu asusak degat o,” iluk inekaerek nen hogorakhegarek meke iti, nit nen sikhe thege iti baga erlok thebeldisausagat o. Nen, akhuni inetaiken weat meke baga eberiogei meke iti, nit nen sikhe thege iti baga Kristus ane hologo hagasuagaluk apma erlok 'bisasusagat o.

⁶ Nit nen, hit Allah ane 'bogokhogon hologo motok hagakhe lagap halok he, karelogo 'binageikhe dogolik it aperek at ane inasuk holu'buk meke ukum inoba 'buogoluk welago.

⁷ An nen wene thelekma meke igin yi hutdini o. At ageikhe akla nen, “An nebe Kristus meke welagei,” iluk hutdekhe halok he, ekaerek nen obabut palekhe dogolik, “An nebe Kristus meke hakene, it Paulus lak itihogonat,” iluk hutduak o.

⁸ Ninoe Etagapogot nen he, an nen weagathinabuagaluk iteerek 'banhemo 'buk. Hinetaiken horlethinabuagaluk, iteerek 'banhemo welagei iti hasik kogat hogorakhekhe lagei halok he, nekarli asigin dek o.

^9-10 Akhuni hit meke aperek nen he, “Paulus iti ebe walegat dogolik holal waganogo la'i agunem, ane magasusak erlok dek. Obatnerogon yoknisiliogo. Meke re, ebe witluk ninom dogolik ebe kepu hakene. Nen, ane isinem, inasuk holusak ina'it negen,” iluk iliogei iti nen he, wene holal waganogo hinoba la'i aga lagei iti, hit hinakla nen, “Ninayuk motok asuagaluk la'iriogo,” iluk apaunogo iluk yokhisigi iti o.

¹¹ Nit yabokane witluk nen, it itithogon iliogei meke iti, ninebe walegat dogolik wene holal waganogo la'i ago meke tak-tagat hagasisugun iti nen, hutdiluk dogoak o.

¹² Nit nen he, it aperek inekaerek nen, “An hano,” iluk inetaiken nen hogorakhiliogei meke iti, ninom wenakninabusak he, nayuk. An nekaerek nobabut palogo nen nebe it ninom tak-tak u nayugat o. Iti, it nen he, “Inobabut hano waganusak he, nirat,” iluk igik, akhuni isi it meke motok it-it inobabut paligik, hagariogei iti, inebe kepu nen hagariogei o.

¹³ Nit ninobabut he, iti hakene dek o. Nit ninobabut ninayabu Allah nen hurli palogo woknisasikhe iti baga hagakhe dogolik, itikmanke meke hasik hogorakhigidek, hurli palogo woknisasikhe meke hasigat hogorakhekhe lago o. Hit hinebe meneke, ninayabu hurli palogo woknisasikhe iti mekeat welagap o.

¹⁴ Hit hinebe Allah nen yabu hurli palogo woknisasikhe baga welagap iti nen, hano wene Kristus nen hagakhikhe wene etnogo wolok, yogeisilik lalok hurli hit hinoba wagagu iti, hurli palek meke thebelogo wagagu dek o.

¹⁵ Allah nen itithogon ninayabu hurli palogo woknisasikhe meke thebelogo 'biluk akhane pok lalok, it aperek hagakha meke, an hagakhi thalek hogorakhekhe lago dek o. Hit hinetaiken Allah oba hakotdekhe lagap meke iti aperek inom obarluk hagatlagunem, o hit werekmake Allah nen hurli palogo nit woknisasikhe baga, yabu kokhogon hagakhe dogogun apekhe lago.

¹⁶ Itithogon hagakhe dogoluk, Allah nen it aperek inayabu hurli palogo wogeisasikhemo hagakha mekeat, nit hagakho thalek hogorakhaunogo iluk, hit hinaila abel ilike, etoma wene hano wene yogeisilik nekhe dogogun apekhe lago.

¹⁷ Allah ane holal men iluk waganek werek, “Akhuni nen yi meke ti meke hasik hogorakhauwogoluk halok he, ninoe Etagapogot hagakhikhe iti hasik anek hogorasusak o,” iluk isikhe.

¹⁸ Akhuni inekaerek nen hogorakhegarek meke iti Allah nen hano iluk woginakherek 'buk. At ninoe Etagapogot nen hogorinakherek meke halok hano iluk woginakherek o.