1 Yohanes 1 - ALLAH ANE WENW KET MEKE WAROGO WOKNINAKHIKHE WENE

Ebe wene nen ninilugutninakherek wene

¹ Wene holal waganogo hinoba la'i ago iti ebe re, ebe wene ninilugutninakherek meke ebekeram erloma nen welagarek etnogo meke. Wene iti, nit arat ninasuk holhik, ninileken tomok higik, 'birogo welageik, niniki hakhigik, hagakhugu meke etnogoat o.

² Nen, at iluk motok welagarek meke iti, ebe opase ipisak iluk motok welageikhesik nen, opase nen nit ninileken hoagaluk thelekmatdisikhemo ninileken hasugusik nenat abok yokhisekhe lago o.

³ Ebe nit ninileken higik, ninasuk holhik, hagakhugu meke iti, ninopase Allah a'but Yesus Kristus ipisak ninom hunik welagorek iti hak, hit nit ninom hano hunik dogouogoluk yokhisekhe lago o.

⁴ Nen, wene yi hasik ninakla arleken akhekhe lago meke iti, yabokane ninakla kokhogon eberogonat arleken akhauwogoluk holal waganogo hinoba la'i ago iti.

“Allah a'but nen he, Allah ebe, lia itiat o,” iluk yogeisasikhe wene

⁵ Allah a'but nen yoknisekhe dogolik, “Allah ebe, lia itiatma, o mum at oba welagarek motok dek o,” iluk yoknisasikhe meke, nit ninasuk arat holhugu meke yokhisekhe lago itiat o.

⁶ Nen, nit he, ninane baga nen, “At ninom hunik welago,” iluk ekhe dogoligat he, o mummo dogolik inobabut hagakharek meke iti hagakhe lago halok he, ebeat meke hagakhidek ninekalat ekhe lago o.

⁷ Itithogon mekeat he, Allah ebe lia baga welagarek iti hak, nit meneke, lia baga dogolik, hano hagakhe lago halok he, nit-nit nagarlak-hagarlak ninom hunik werekma, nit weak hagakhunem at a'but Yesus amep oba hotninakho motok welagarek o.

⁸ Itithogonat meke re, nit nen ekhe dogolik, “Nit weak ageikhe hagakhidek,” iluk ekhe lago halok he, ninekalat ninekaerek nukhetdakhekhe lago iti nen, ebe wene ninakla motok dek o.

⁹ Meke re, nit weak hagakho meke thelekma 'bualogon ugun halok, at Allah obabut mothogon motok dogolik, wene abok yoknisekherek hagat, hagakherethekma, nit weak hagakhorek meke thagalogo here'isalok, weak hagasuogoluk ninakla ebekhorek meke thobalninakherek.

¹⁰ Itithogonat meke re, nit nen he, “Weak ageikhe hagakhidek welago,” iluk ogorek halok he, nit nen, “Allah ekalat ekherek,” iluk u hagat ogorek iti nen, Allah ane nit ninakla motok dek o.