1 Timotius 4 - ALLAH ANE WENW KET MEKE WAROGO WOKNINAKHIKHE WENE

“Akhuni aperek nen wene korlo wene inekalat hinakla kagali isugun etnaga,” iluk yogokhikhe wene

¹ Allah Agoreke nen wene pakhogonat yoknisekhe dogolik, “O ilugun oba, akhuni aperek Allah ane eberogonat iluk apiliogei meke nen, wene iti, Nina'it, iluk here'isalok nen, Iblis agarumi mokat inobabut weak nukhetdisegarek meke inapma ukiluk, wene it nen yakulisegarek wene iti ha'iluk hagakhe dogogun.

² Hagakhe dogolik, akhuni iniki thenap atlukmo, ki meke hakhogo heat iluk egarek iti hak, it iti inakla ko'bot atluk nen, Yi weak hagakhoma higi. Yi hano hagakhoma higi, iluk apigidek yugunat hagakhe dogogun. Itithogon hagakhe dogolik, inekalat dal-kalhogon hagarinakhe dogogun iti o.

³ It nen wene ekhe dogolik, Humi woginabusak motok dek, igik, Yi meke ti meke nekarek meke iti, ageikhe yi meke usa. Neke dogosak dek, igik, ekhe dogogun,” iluk, Allah Agoreke nen yoknisasikhe tak-tagat iliogei iti o. Meke re, nekarek meke iti, Allah nen nit ninetaiken at oba hakotdiluk dogolik, ebe wene iti hutdogo halok he, heagei warogo neke dogoagaluk winametdisikhe meke hasigat iliogei iti o.

^4-5 Yi meke ti meke Allah nen winametdisikhe meke iti hano anek o. Sembayan isinem Allah ane iti baga hanotdekherek iluk, “Yi weak meke,” iluk here'isigidegat, Allah heagei warogo neke dogosak anek.

“Hat Kristus Yesus atuaneke dogolik mothogon hagakhe dogono,” iluk yogokhikhe wene

⁶ Wene hano wene ninetaiken Allah oba hakotdogorek meke etnogo yakulhekhe lagagumo, hat nen waganhigitik mothogon hagakhe lagan iti baga hebe kok aga dogolik, wene yogotak yokhigi iti ninagarlak lak ninerugi Allah a'buri meke aperek yakulisekhe dogono. Itithogon yakulisekhe dogogin halok he, hat Kristus Yesus atuaneke dogolik, at hasik hanorogo hagakhe dogogin iti o.

⁷ Akhuni nen wene suakane ebe wene dek mekeat he, yugunat inekalat pilinekharek meke iti here'isekhe dogono. Here'isalok, Allah apma dogolik hagakharek meke itiat hobatnerogon yakulekhe dogono.

⁸ Akhuni inebe hasik mep aborlokhogon asuagaluk hagakharek iti, yogotak ya elanma hasik herlekha'bugat hano negen hagakharek. Meke re, ninetaiken hasik Allah apma dogolik, at ayabu hagakhe dogoumo, at Allah nen he, “Yogotak hiniluk welagap meke hasik inom, yabokane hiniluk motok dogogun meke hasik inom, hano motok hagatlasigin iti o,” iluk, abok yoknisasikhe iti eberogonat.

⁹ Halok he, wene iti eberogonat ninetaikenma hutukhogon waganusak o.

¹⁰ Allah ebe, yi akhuni ti akhuni tha'bokhogonat tilninakherek meke welagarek mekeat he, kok hakene re, nit ninetaiken at oba hakotdekhe lago meke tilninakherek iti nen, ninetaiken at iluk motok welagarek meke oba hakotdiluk, at hasik nina'it ageidegat, ninobatnerogon hagakhe lago.

¹¹ Wene iti tha'bokhogonat akhuni mothogon hagakhe dogoagaluk, yogeisigik, inasuk wakhik, hagakhe dogono.

¹² Hat hebe elege aban welagan iti nen, it akhuni aperek nen inakla meanetdagousak dek o. Meke re, hebe elegeat dogolik, akhuni aperek inetaiken Allah oba hakotdiluk werek meke nen, hat hobabut waganuagaluk, hane mothogon yogeisigik, hobabut mothogon hagakhik, akhuni hakmurinakhik, hetaiken Kristus oba hakotdiluk welageik, weak hagakhidek hilaga isonhogo welageik, hagakhe dogono.

¹³ An nebe aban wageidek werek korlek, Allah ane holal waganek itiat it aperek inasuk holuak nen, etaga thalhik, inasuk wakhik, yakulisigik, hagakhe dogono.

¹⁴ Hat hobasik haganeat it ap Allah a'buri therisik welageikharek meke nen iniki hukuloak thebelho korlek, it ap Allah ane yogeisegarek meke nen men isukha iti, “Hat yabokane itithogon hagakhe dogono,” iluk, yokhikhukha tak-tagat, Allah Agoreke obabut hano nen ayabu hagakhe dogoagaluk ninobabut dopok woknisekherek etnogo hat wokhikhikhe meke iti baga hagakhidek hobakhanini here'isagun o.

¹⁵ It akhuni tha'bokhogonat nen hat hobabut palhe dogolik, “At Timotius alebageik hano hagakhe lagasik nen yogotak hano motogat hagariogo,” iluk ekagat hutdaguagaluk, wene yokhigi meke iti tha'bokhogonat hetaikenma 'biluk hagakho motok dogono.

¹⁶ Itithogon hagakhe dogolik, hekaerek hasik inom, it akhuni aperek yakulisekhe lagan meke inobasik inom, hobabut hebelogo dogono. Hobabut hebelogo dogolik, hakla puk ageidek, iti mekeat hagakho motok dogono. Itithogon hagakhe dogogin halok, hekaerek nen hebe tiligik, akhuni aperek hano holiogei meke inebe tilinakhik, hagasigin o.