1 Timotius 2 - ALLAH ANE WENW KET MEKE WAROGO WOKNINAKHIKHE WENE

“Sembayan yigithogon ekhe dogosak,” iluk yogokhikhe wene

^1-2 An nen wene ageikhe kok meke yi Allah a'buri inasuk watnogoluk yokhisik o. Nit akhuni ninom hano liokhogon dogolik nen, Allah hogorakhe dogolik, akhuni inobasik mothogon hagakhe dogosak meke hagakhe dogouok nen he, akhuni tha'bokhogonat hasik inom, koktek inetagapogot inobasik inom, it aperek inetaga werek dogolik haknisik welageikharek meke iti, inebe tha'bokhogonat inobasik inom, sembayan ekhe dogolik, Allah ayoko 'bigik, kino yogokhik, heagei wakhik, hagakhe dogoagaluk inasuk wakhe dogono o.

^3-4 At Allah tilninakherek meke etnogo akla apekhe dogolik, “Yi akhuni ti akhuni tha'bokhogonat tilinakhik, ebe wene hutukhogon inilu asuagaluk yakulisigik, hagasusak meke,” iluk akla warlok apekherek iti nen he, hit itithogon ekhe dogogun halok he, hano.

⁵ Allah ebe opakiat anek o. Nen Allah ninom nit akhuni ninom turlem heisogo dogolik dapulninabiogo meke ap ebe Yesus Kristus iti opakiat anek o.

⁶ At Kristus akhuni tha'bokhogonat weak hagakhorek iti baga herle warogo haknisik werekma herle hisalogo tilninabigiluk ekaerek eram nen, “Nebe nasuak,” iluk wageikhe iti baga, Allah akla nen, “Akhuni tha'bokhogonat tilinabusak,” iluk apekherek meke iti, ekagat asusak tak-tagat ekagat ageikhe iti o.

⁷ Itithogon apekherek iti nen, at nen he, “Hat nen ebe wene iti akhuni itikmanke meke nen eberogonat iluk inakla apalok waganuagaluk, yakulisilik nekhe dogono,” iluk, an nayoko 'biluk la'ani ageikhemo, yogeisilik nekherek iti o. Itithogon igi iti eberogonat igi. Nekalat igi dek o.

Sembayan ekhe dogolik, “Ap nen itithogon hano hagakhik, humi nen itithogon hano hagakhik, hagasuagaluk inasuk watno,” iluk yogokhikhe wene

⁸ Nen, o yi ai ti ai sembayan ekhe dogolik, it ap nen he, iniki nen ageikhe weak hagakhidek, inakla aga dageigidek, wene muk yakhidek, karelek dogolik, sembayan ekhe dogoagaluk, yakulisausak iluk nakla warlok apigirik nen yokhigi iti o.

⁹ Iti hak, it humi re, inisi dalhik, mikhak ikharek hak emas meke ikhik, ilepali ikharek hak mutiara meke ikhik, su oko kok meke ikhik, hagasusak motok dek. Inilaga isonhogon dogolik, inobake thiokhogon waganusak mekeat waganhe dogoagaluk yakulisanogoluk yokhigi iti o.

¹⁰ Inobake waganu hak he, inobabut Allah a'buri dogolik hagasu hagat, it aperek hanorogon yomageisekhe dogoak.

¹¹ It inane degat dogolik, wene yakulisugunem, inasuk hologoat dogoak o.

¹² It humi nen he, ap inapma negen 'bisalok, “Yigithogon hagasin, tigithogon hagasin,” iluk yogeisigik, wene yakulisigik, hagakhe dogunogo iluk an nen wene palherek iti o. It he, inane degat dogosak o.

¹³ Allah nen he, Adam tak winametdisikhesik nen, yabokane he Hawa winametdisikhe iti nen, inane degat dogosak igi itiat o.

¹⁴ Iti hagat, Iblis nen he, Adam tak nukhetdisikhe 'buk. He iti tak nukhetdisikhemo, Allah ane thagalogo weak hagakhikhe iti o.

¹⁵ Itithogonat meke re, it humi inetaiken Allah oba hakotdiluk nen, inebe Allah hasik 'bisalok karelek dogolik, akhuni aperek inakmurinakhik, inilaga isonhogon hagakhik, hagakhe dogogun halok he, ineagei itaginakhunem, Allah nen tilinabiginat o.