1 Timotius 1 - ALLAH ANE WENW KET MEKE WAROGO WOKNINAKHIKHE WENE

Heagei wakhikhe wene

^1-2 Timotius na'but o. Hetaiken Kristus oba hakotdisigin iti nen, an na'but eberogonat agaginmo, wene yi an Paulus nen holal waganogo hoba la'i agei iti o. At Allah tilninakherek meke inom, Kristus Yesus nen hanotninabigin iluk ninakla apekhe lago meke etnogo inom, ipisak nenat nayoko 'biluk, at Kristus Yesus hasik hagakhe dogoagaluk la'ani agoukhama wagagi iti o. Ninopase Allah inom, ninoe Etagapogot Kristus Yesus inom, ipisak inobabut hano etnogo nen, hano meke wokhikhik, inakmuthakhik, hetaiken hapugutdageigik, hagakhe dogoak o.

Timotius nen it akhuni aperek inasuk mothogon wakhe dogoagaluk yogokhikhe wene

³ An o Efesus nen o Makedonia yoma wisigiluk, hat hakla kagalogo wene men iluk yokhikhigi apigi, “Hat hebe o yoma dogono. Dogolik it aperek nen wene ebeat meke dek. Ninat meke yakulisiliogei meke iti igidek huk asuagaluk inasuk wakhe dogono.

⁴ It iti nen he, wene suakane inekalat pilinekhik, Ninebe itithogon itaklarik wagagu, iluk wene erloma nen paldigidegat pilinerik hunik-hunik motok lageik, iliogei iti meke baga inetaiken eberek motok dogunogo nen, igidek here'isoagaluk inasuk watnoat,” iluk yokhikhigi apigi. Wene iti meke isinem, ebe wene ninetaiken Allah oba hakotdiluk werekma, at nen hanotninabigin iti meke kok agarek dek o. Ilugun oba inane kogat thagalharek iti o.

⁵ Inetaiken Allah nen horinakhunem inekaerek inakla nen he, “An wene noba dek, nakla thiok welagei,” iluk apekhe dogolik, inetaiken eberogonat Allah oba hakotdiluk welageikharek iti nen, akhuni inakmurogon welageikharek o. Halok he, it itithogonat dogoagaluk inasuk wakhe dogono, iluk yokhikhigi iti o.

⁶ Meke re, it aperek nen inobabut hano hagakharek iti meke hagakhe lageikharethek nen here'isalok mirlokhogon yugunat dek asigin meke itiat ekhe dogolik, inekaerek nenat nuk akhiliogei iti o.

⁷ It iti nen he, “Wene Allah nen ninasuk wakhikhe wene etnogo, nit nen yakulisekhe dogogun,” iluk warlok nen yakulisekhe dogoligat he, wene ebe hutdigidek inokodek dogoligat, “Wene ebe yigithogon o. Eberogonat hutukhogon yakulisogo,” iluk iliogei mekeat he, hutdigidegat iliogei iti o.

⁸ Wene Allah nen ninasuk wakhikhe wene iti, nit nen hutdiluk, hagasusak tak-tagat hagakhe dogogun halok, hano o, iluk ninilu.

⁹ Eberogonat he, wene Allah nen ninasuk wakhikhe wene iti, akhuni mothogon hagakharek meke hasik isikhe 'buk. Akhuni inasuk warek dek holu'buk hagakharek meke inom, Allah ina'it dogolik weak hagakharek meke inom, inebe Allah hasik 'bisigidek Allah ane thagalogo hagakharek meke inom, inopase inagosa lak inebe motok inakharek meke inom, akhuni aperek yugunat inebe debekhogon motok inakharek meke inom,

¹⁰ ap nen humi param ha'isigik, ap-ap ha'isigik, hagakharek meke inom, akhuni aperek ina'buri meke iniki abusak limaginakharek meke inom, inekalat egarek meke inom, “Wene eberogonat igin,” iluk Allah etaga paliluk nen, nukhetdisegarek meke inom, it tha'bokhogonat itithogon hagakharek meke hasik isikhe. Nen, it aperek inobabut ebe wene hanotninakherek meke wene iti thagalogo here'isalok korlo hagakharek meke tha'bokhogonat aperek hasik inomat isikhe.

¹¹ Nen, wene iti mothogon, hano wene etnogo an nen yogeisilik nekhe dogoagaluk noba 'bisikhe. Hano wene iti, Allah hogorakhik, heagei wakhik, hagakhorek meke etnogo aneat o.

Allah heagei wakhikhe wene

^12-13 An alebageik he, Yesus abok weak palhik, ebe nakla nen meanetdiluk Allah a'buri meke yi aik ti aik hagarinakhik, hagakhe lagagi mekeat he, ninoe Etagapogot Kristus Yesus akmutnakhikhesik, “Hat nen yabokane an nobasik hobabut erlok hagakhe dogogin,” iluk, wene yi an noba 'biluk nayoko 'bigik, obatne woknikhik, hagakhikhe iti o. Itithogon weak hagakhe lagagi etanem he, an netaiken ninoe Etagapogot Kristus Yesus oba hakotdigidek dogolik, itithogon hagasusak dek mekeat he, nokodek nen hagakhe lagagi iti nen, at nen nebe akmutnakhikhe iti nen, heagei wakhe lagei o.

¹⁴ Iti, at ninoe Etagapogot Kristus Yesus obabut hano nen kokhogon akmutnakhikhesik, nobabut at inom hunik dogolik hagakharek hagat, netaiken at oba hakotdigik, akhuni aperek nakmurinakhik, kokhogonat hagakhe dogoagaluk, nebe woknakhikhe iti o.

¹⁵ Akhuni weak hagakho werekma Kristus Yesus nen ninebe tilninabigiluk agat oba yoma usa'ageikhe iluk igi iti, akhuni nen he, “Wene iti eberogonat,” iluk hutukhogon waganusak meke. Akhuni aperek weak herlekha'bugat negen hagakharek mekeat he, an anek he, weak kok motok hagakhe lagagi iti o.

¹⁶ Meke re, it akhuni aperek yabokane inetaiken Yesus oba hakotdisinem iniluk motok dogoagaluk, hagarinabigin meke inakla nen apekhe dogolik, “Paulus weak hagakho korlegat he, Kristus Yesus akla puk ageidek obakhanini hapugutdiluk motok welageikhesik nen, akmuratluk ebe waganhikhe iti, at nen akhuni weak hagakharek meke itithogon woginakherekma higi,” iluk, Allah obabut ekagat hutduagaluk, an tak itithogon woknakhikhe iti o.

¹⁷ Ninopase kok Etagapogot Allah iti arligat o. At ebe ninileken hogorek dek. Kok ikhok motok welagarek meke itiat o, iluk, hogorakhik, heagei wakhik, hagakho motok dogouok o, iluk, “Amin,” igi iti o.

¹⁸ Timotius na'but o. An wene yi hasuk warogo yokhisik. It aperek nen wene alebat hat hekaerek hasik ekhe dogolik, “At itithogon hagakhe dogogin,” iluk isukha hak, hano wene yi hasik, wim inobatnerogon yakharek hak, hobatnerogon yogeisekhe dogono o.

¹⁹ It aperek nen, “Wene iti eberogonat,” iluk waganharethek nen, inakla thiokhogon dogosak mekeat he, yabokane weak hagariogei iti nen, ku ima mak-makhogon usekherek hak, horla usega iti. Hat iti hakene hagakhidek, hakla nen, “An weak ageikhe hagakhidek, nakla thiokhogon welagei,” iluk hetaiken Allah oba hakotdiluk hobatnerogon hagakhe dogono.

²⁰ It weak itithogon hagakharek iti, inebe aperek he, Himeneus Aleksander ipisak nen Allah abok weak palhe lagoukhama, yabokane inobabut hebelatluk weak hagakhidek thogotduagaluk inebe Iblis wogokhima werek iti o.