1 Petrus 5 - ALLAH ANE WENW KET MEKE WAROGO WOKNINAKHIKHE WENE

“Allah a'buri yigithogon therisik dogono,” iluk yogeisasikhe wene

¹ Hit Allah a'buri therisik welagathep iti hak, an itithogonat therisik welagarek meke nen hinasuk ageikhe wasik. At Kristus oba yi aik ti aik hilik hilik watlageikhe iti, an nileken hasigi. Nen, yabokane Allah nen ebe winamhogo la'isigin iti wagunem, akhuni nen hogorasugun iti, an ninom hogotninabugunat o. An nane liokhogon hinasuk wasik.

² Allah nen, “An na'buri domba nomolek hakene itithogon therisik dogono,” iluk hinayoko 'bisikhe hagat, therisik dogono. Therisik dogoli, hinekaerek hina'it werek korlegat, akhuni aperek nen, inane inobatnerogon yokhisugunem therisik welageik, nen, hinakla nen, “Oko ageikhe woknisoak,” iluk apekhe dogolik therisik welageik, hagakhe dogogup o. At he, hinakla warlokhogon therisik dogono.

³ Allah a'buri therisik dogoagaluk supusogo wokhisasikhe iti therisik dogolik, hinebe kok negen dogolik, hinane hithani-hathani negen hagarinakhe dogogup. Hit hano hagakhunem inileken hisalok hinobabut waganogo hagakhe dogoagaluk, hano hagakhe dogono.

⁴ Itithogon hagakho werekma, ninoe kok adomba iteerek etnogo witluk nen, “Hano motok hagakhe lagapma,” iluk oko kare-kare mitago a'bi'baleak dek asigin dek meke wokhisagein o.

⁵ Nen iti hagat, hit ap elege nagarumi. It aperek nen Allah ane baga men isukha, “Akhuni inekaerek nen hogorakhugunem, Allah nen a'it hisekherek o. Mekeat he, inekaerek inetaiken thebekhogon dogogun halok, at obabut hano nen akmurinakherek o,” iluk holal waganogo 'bisukhama werek iti nen, hit nen inarluetek inapma ukiluk inane hologo hagakhe dogono o. Itithogon hagakhe dogolik, hit tha'bokhogonat nen, hinekaerek nen hogorakhigidek inapma dogolik, hit aperek nen it aperek inatuaneke welageik, it nen hit hinatuaneke welageik, hagakhe dogolik yomak-yomak hagakhe dogono o.

⁶ Itithogonat, Allah nen yabokane meldinaguagaluk, yogotak ya hinekaerek nen hogorakhigidek, at iki obatne werek meke apma ukiluk hinetaiken thebekhogon hagakhe dogono o.

⁷ Allah hinebe akmu iti nen, hit yi meke ti meke hasik hinakla wene munini uan 'bero ebekhe lagap iti here'isalok hinetaiken at oba hakotdiluk dogono o.

⁸ At Iblis, hinathili meke etnogo nen, singa yeke helo anini weak meke yi meke ti meke haumhogo nagaluk ane ke agan herarik nekherek iti hak, “Tha hak weagatdigin,” iluk herakhinabik liliogo iti, hinobabut hebelogo hinileken hanorogon dogono o.

⁹ Itithogon dogolik, hinakla nen, “Ninagarlak lak ninerugi o yi ai ti ai agat oba yoma inebe tha'bokhogonat yi aik ti aik hiliogei hagat, hekhe lago,” iluk, at Iblis wagunem, ane holhidek here'isalok hinetaiken Allah oba hakotdiluk hinobatnerogon metek dogono o.

¹⁰ Werekma, at Allah ebe hogorakho motok dogogun iti hak, hit Kristus hinom hunik werekma hinomat hogothinakho dogoagaluk hinayoko 'bisikhemo, yogotak ya herlekha'bugat anek hinoba yi aik ti aik hekhe dogoluk, yabokane, at obabut hano motok etnogo nen, hinetaiken aban meke thirliphogon hagathinakhik, hinetaiken horlethinakhik, hinobatnethinakhik, hapuguthinakhik, hagasigin o.

¹¹ Yi meke ti meke tha'bokhogonat at arligat ite dogolik hago motok dogoak, iluk, “Amin,” igi iti o.

Wene ilokon warogo heagei warinakhikhe wene

¹² An nen wene 'beroat iti hinasuk warogo hinoba la'isigiluk nen, holal waganuagaluk an nagot Allah a'but Silas obabut hupulik higirik nen, ayoko 'bigima waganhemo hinoba la'i agei iti. Allah obabut hano nen hagatninabiogo meke ebe yiat iluk, an nilu dogolik eberogonat yokhisigi o. Halok he, hinetaiken iti bagaat hakotdiluk dogolik, hinobatnerogon metek dogono, iluk wene holal waganogo hinoba la'i agei iti.

¹³ Hinagarlak lak hinerugi Allah a'buri at nen wenageinakhikhe meke o Babilon yoma welageikharek meke nen heagei wathinakhik, na'but Markus nen heagei wathinakhik, ega o.

¹⁴ Nen, hit-hit, nakmu-hakmurogo heagei hinape tharluk wat-wat ilik lano o. Allah nen hit Kristus hinom hunik meke hinebe tha'bokhogonat hinetaiken hapukhogon hakhisik dogoak o.