1 Petrus 3 - ALLAH ANE WENW KET MEKE WAROGO WOKNINAKHIKHE WENE

Humi ap inagugi inaguni inom inobabut hagakhe dogosak wene

^1-2 Iti hak, hit humi hinaguni Allah ane waganhidek meke hinane yogeisagun oba 'buk. Hinobabut hinilaga isonhogo hinaguni inane hologo hagakhunem, it nen inileken hisalok Allah werekmake witluk ane waganuagaluk, hinekaerek hinaguni dopok inapma ukiluk inane hologo hagakhe dogono o.

³ Hinoba hanorogo, hinoado itikmanke meke hasik waganhe dogogup. Iti re, hinisi dalhik, hinobake emas meke waganhik, su hano oko kogat meke ikhik, hagakhe dogogup o.

⁴ At he, hinoba hanorogo iti, hinetaiken hasik limago meke iti waganhe dogono. Iti re, hinobabut motok dogogin meke enago welageik, hapukhogon welageik, hagakhe dogono o. Hinobabut Allah il oba itithogon hagakhunem, at akla nen hano motok apekherek itiat o.

⁵ Haganeat it humi Allah a'buri meke inetaiken Allah baga hakotdiluk dogolik, inoba hanorogon itithogonat inaguni dopok inapma dogolik inane hologo hagakhe lagoukha.

⁶ At he Sara itithogonat agun Abraham apma dogolik ane hologo hagakhe dogolik, heagei, “I, nopase,” iluk wakhe lageikhe. Hit yogotak meneke, akhuni nen hinayuk asuagaluk hagakhunem hinayuk ageidek hano hagakhe lagap halok he, at Sara eageiat welagap o.

⁷ Nen, hit ap meneke, Allah obabut hano nen hinagugi hinom tak-tagat hiniluk motok dogoagaluk iteerek 'binagakhemo welagap iti nen, hit sembayan isinem Allah nen hinane asuk holhidek thogotdinogo iluk, hinagugi hinom hano dogolik, hinakla nen, “Humi inobatne dek,” iluk hutdiluk, inalon halogo hinakmurinakhe dogono o.

“Hinagarlak lak hinerugi hinom nakmu-hakmurogo hagakhe dogono,” iluk yogeisasikhe wene

⁸ Wene iti ilukun warogo men yokhisak. Hit hinebe tha'bokhogonat hinakla nen, “Ninebe Allah a'buri ninagarlak lak ninerugi ninom,” iluk, hinetaiken hunik dogolik, hinakla opakiat meke apigik, hinetaiken opakiat meke ebekhik, hagakhe dogono.Itithogon hagakhe dogolik, hinekaerek nen hogorakhigidek, hinetaiken thebekhogon dogolik, hit-hit nakmu-hakmurogo hagakhe dogono.

⁹ Akhuni aperek nen hit weak hagathinakhunem, hit nen oko weagarinakhup o. Nen, inane sagun weak yokhisugunem, hit nen oko hinane sagun yogeisugubat o. Oko re, Allah nen inebe hanorinabuagaluk, ayoko 'bekhe dogono. Yabokane at nen hano meke wokhisagaluk hinayoko 'bisikhe iti nen, hit nen oko hano meke wogeisekhe dogono.

^10-12 Wene iti hasik men isukha, “Akhuni inobabut ninopase Etagapogot akla warlok apekherek meke mothogon hagariogei meke, at ileken inoba dogolik, sembayan ayoko 'bisinem inane asuk holherek o. Mekeat he, it weak hagariogei meke, elokhoken ageage dageikherek o. Iti nen, tha nen, An niluk ageikhe inom dogole, hibiku-yogokuat hano meke anek hagatlagunem hekhe dogole, iluk dogou warlok halok he, a'bi baga weak wene igidek welageik, ape baga nen ekalat akhuni aperek nukherinakhidek welageik, weak meke oporlike here'isalok hano meke anek hagakhik, obabut akhuni aperek inom dapukhogon hano welageikharek iti meke kogotdiluk obatnerogon mutluk lageik, hagakhe dogosak o,” iluk Allah ane baga holal waganogo 'bisukha.

¹³ Hit he, hano hagakhe dogouogoluk akilukhogo hagakhe lagap halok he, tha nen weagathinabusak nogo. Weagathinabusak dek o.

¹⁴ Mekeat he, mothogon hagakhunem weagathinakha halok, yi aik ti aik hekhe dogolik, hinakla arleken akhekhe dogono. Hinayuk asuagaluk hagathinakhunem, hinayuk atluk hinakla wene munini uan 'bero ebekhup o.

¹⁵ Hit nen Kristus hinayukhogon hogorakhe dogolik, “Ninoe Etagapogot at o,” iluk hinetaiken oba nen hogorakhe dogono. Hogorakhunem, it aperek nen hinok hinoba waganhe dogolik, “Hano asigin, iluk oba eberek welagap iti nenaluk,” iluk yokhisugunem nen, oko wene hutukhogon yogeisagun meke hinakla eberek motok dogolik,

¹⁶ hinane enago heagei warogo yogeisekhe dogono. Itithogon yogeisekhe dogolik, hinakla nen, “An wene noba thelek o,” iluk apekhe dogolik, Kristus hinom hunik dogolik, hano hagakhunem, akhuni nen hinabok weak palugun meke iti inileken hisalok inekarli asugun o.

¹⁷ Hit weak hagakhunem hinoba yi aik ti aik hinobabut oba hekhe dogogun halok weak. Mekeat he, hit nen hano hagakhunem, Allah nen, “It yi aik ti aik hoak,” iluk apekhe halok anek, hano o.

¹⁸ Nit akhuni weak hagakhorek iti hasik niniki ilugun oba, at Kristus yabokane watlageidek dogeigiluk opaki hasigat watlageikhe. Ninebe Allah oba woknisik lagaluk, at obabut mothogon hagakherek meke nen, nit ninobabut korlo hagakhorek meke hasik watlageikhe iti. Ebe nit akhuni meke iti wakhukhama watlageikhe mekeat he, agoreke meke iti Allah nen ilugutdisikhe iti.

¹⁹ Ilugutdisikhemo it aperek inagoreke herle warek werekma wene yogeisa lageikhe.

²⁰ Inagoreke iti inebe re, haganeat at Nuh nen ku kok meke halhe korlek, Allah obabut hano nen therisik werek korlegat, wene waganhidek here'isalok weak hagakho motok werekma i thalukhogon waga dogolik inakhukhama watlagoukha meke iti. Itithogon inakhe korlegat, it aperek ku kok meke akla ukiluk welagoukha meke, inebe 8 nen pererlagat i thalukhogon wageikhe iti baga tilinakhikhe iti.

²¹ It i baga tilinakhikhe iti tak-tak nit yogotak ima usogorek iti baga tilninakherek o. I baga tilninakherek iti, ima usa'inanhunem, ninoado i iti baga thobalagarek iti baga tilninakherek 'buk. At he, ninetaiken oba nen wene ninoba thelek asuagaluk Allah ayoko 'bisinem, Yesus Kristus watlageikhesik iluk ageikhe iti baga tilninakherek o.

²² At ebe iluk ageikhesik nen, pogot oba dageisikhesik, Allah iki ebeke kok dogolik, malaikat Allah nen yoko usa'isa agarek meke emenogo men, inougi koktek meke men, inobatneak meke men, hagasik welagarek o.