1 Petrus 2 - ALLAH ANE WENW KET MEKE WAROGO WOKNINAKHIKHE WENE

“Yesus ebe helekit o herlaga 'begarek iti hakeneat o,” iluk yogeisasikhe wene

¹ Iti nen, hit weak hagakhe lagap meke iti motok here'isalok dogono o. Akhuni aperek nukhetdisigik, hinetaiken pere hagakhik, ua palhik, hinekalat nen akhuni aperek inabok weak palhik, hagakhe lagap iti, here'isekhe dogono o.

^2-3 Yi meke ti meke ituk walhalok, hano egarek iti hak, ninoe Etagapogot obabut hano hegep iti nen, elege ket itago meke irlak abu nen nasi motok welageikharek iti hak, wene hano wene hinetaiken iti baga horle asumo hanothinabuagaluk, wene itiat hit warlokhogon waganho motok dogono o.

⁴ At ebe helekit hakene iluk welagarek meke iluk he, oba wetno. Akhuni nen, “Helekit iti weak,” iluk here'isasukha mekeat he, Allah nen, “Helekit yi motok hano mekeat,” iluk wenago 'bisikhe.

⁵ Itithogon 'bisikhemo, hit hinebe helekit iluk welagarek iti meke hakene dogolik, at oba wetno o. At oba wagunem, Allah nen at ekaerek ai halogo 'binaguak. At ai halekma, hinebe Allah iteerek Yesus Kristus hinom hunik dogolik, Allah akla hanorogo ako warekhe dogou hak, hinetaiken wogokhe dogono o.

⁶ Iti meke hasik Allah nen men isikhe, “An nen, helekit hano motok meke wenago o Sion etoma o herlaga ageikhe warogo 'bigi yi 'bikhani. Hit akhuni hinebe dopok hinetaiken at oba hakotdiluk dogogun halok he, hinekarli hugun dek o,” ilu isikhemo holal waganogo 'bisukha iti.

⁷ Hit hinetaiken at oba hakotdiluk welagap meke nen, “At hano motok,” iluk hutdekhe lagap iti. Mekeat he, it aperek inetaiken at oba hakotdigidek meke inobasik anek he, men isikhe, “It ap tukang o helekit meke halharek meke nen, o ebe halhe dogolik, Helekit yi weak, iluk here'isega meke iti herlaga hagatlaga yi,” iluk isikhe.

⁸ Nen, ageikhe men isikhe, “Akhuni helekit iti baga inisok a'bit 'baukhogon waralok wilasi laga dogogun o,” iluk isikhe. Itithogon wilasi laga dogogun iti re, it nen hano wene iti, “Eberogonat,” iluk hutdugun dek iti nen, Allah nen akla apasikhe hagat, warisiliogei iti.

⁹ Meke re, hit anek he, “At Allah nen hano hagatninabiogo,” iluk abok yogeisilik loagaluk, hinebe o mummo werekma, at ebe elalinat lia motok welagarek oba wisuagaluk hinayoko 'bisikhesik, hti at a'buri asuagaluk wenakhinakhik, at ebe iteerek koktek dogoagaluk meldinagagik, hinukuloak etaga at ekaerek ukuloak etaga meke thalogo 'binagagik, “Nekaerek na'buri,” iluk hinebe wokhinakhik, hagakhikhe iti.

¹⁰ Hit alebat, Allah hinom huni welageidek mekeat he, yogotak hinebe Allah a'buri agap o. Nen alebat, hit nen, “Allah ninebe akmu werek,” iluk hinokodek welagagip mekeat he, yogotak, “Ninebe Allah akmu nen wokninakhikhemo welago,” iluk hinilu agap o.

“Hinobabut Allah atuaneke dogolik, Itithogon hagakhe dogono,” iluk yogeisasikhe wene

¹¹ Nagarlak lak nerugi. Hinebe nakmu lak e. Hit hinebe ap huso akhuni inaila la'inagoumo lalok, etoma dogolik, yi meke ti meke hinakla nen kagalogo dageitluk, hinetaiken nen nukunem warlok apegethep meke iti re, thili meke nen inakharek iti hak hinebe weagathinabigiluk, hinakla nen kagalogo dagei agarek meke iti here'isekhe dogobageik iluk yokhisekhe lagei iti o.

¹² It akhuni itikmanke meke Allah inokodek meke hinom dogolik, it nen, hit weak hagakhe lagap meke thalek, “It weak hagariogei o,” iluk hinabok weak ekhe dogoligat, hit hinobabut hano hagakhunem inileken hisekhe dogoluk nen, akhuni nen at Allah ebe yabokane wagunem hogorasuagaluk hit hinobabut mothogon hagakhe dogono o.

^13-15 At Allah nen, hit men hagakhe dogoagaluk akla apasikhe. Akhuni inetaiken dek meke nen wene inokodek dogolik iliogei iti, inekarli atluk inane dek asuagaluk, hit hinobabut hano hagakhe dogoagaluk akla apasikhe iti nen, ninoe Etagapogot hasik, akhuni nen pemerintah meke kok dogoagaluk meldisasukha meke iti, inebe tha'bokhogonat inapma ukiluk inane hologo hagakhe dogono o. Itithogon hagakhe dogolik, Kaisar Etagapogot pemerintah meke kok hakene iti men, at nen it gubernur lak akhuni weak hagakhunem ukum inoba 'bigik, hano hagakhunem hogorinakhik, hagakhe dogoagaluk inayoko 'biluk la'isa agarek meke iti men, inane hologo hagakhe dogono o.

¹⁶ Itithogon dogolik, hit nen, “Nit weak meke apma werekma, Allah nen herle hisalogo ninasokneat 'binanhikhemo welago,” iluk, weak ageikhe limago hagakhe dogogup. Hinobabut Allah atuaneke dogolik hagasusak meke mothogonat hagakhe dogono o.

¹⁷ Akhuni tha'bokhogonat inalon halhe dogono. Itithogon yogeisekhe dogolik, hinagarlak lak hinerugi Allah a'buri meke hinakmurogo dogono o. Dogolik, Allah ebe hinayukhogon welageik, nen, Kaisar etagapogot pemerintah meke inoe kok iti alon halhik hagakhe dogono o.

“Hit nen Kristus obabut waganusak,” iluk yogeisasikhe wene

¹⁸ Hit aperek, hinougi inatuaneke welagap meke iti, it inapma dogolik, inobabut hano enago meke inobasik anek hinayukhogon inane hologo hagakhe dogosak 'buk. At he, inobabut korlo meke inomat hinayukhogon inane hologo hagakhe dogono.

¹⁹ Hit nen weak ageikhe hagakhidekmaat he, hinougi nen yi aik ti aik hagathinakho korlek, hinakla nen, “Allah akla warlok meke hagasusak,” iluk hutdiluk, hinetaiken thebekhogon hinobakhanini hapugutdiluk dogogun halok he, at nen hanothinabigin o.

²⁰ Mekeat he, hti nen weak hagasugun oba, oko tugi hinakho korlek, hinetaiken thebekhogon hinobakhanini hapugutdiluk dogogun halok, hogothinabusak nogo? Dek o. Hinobabut obaat usak o. Mekeat he, hano hagakhunem, yi aik ti aik hagathinakhe korlegat, hinetaiken thebekhogon hinobakhanini hapugutdiluk dogogun halok he, Allah obabut hano nen hanothinabiginat o.

²¹ At Kristus ebe hit hinobasik yi aik ti aik hilik hilik watlageikhe iti nen, hit meneke, at obabut waganogo yi aik ti aik hinoba 'binagouagaluk Allah nen hinayoko 'bisikhe iti.

²² At nen, “Weak ageikhe hagakhidegat. Nen, ekalat isinem, akhuni aperek inasuk holhidegat o.”

²³ Akhuni nen inane sagun weak yogokhe korlegat, at nen oko ane sagun yogeisigidegat. It nen yi aik ti aik hagakho korlegat, at nen, “An yabokane oko ageikhe hinasigin,” iluk yogeisekhe lageikhe degat. At he, “Allah nen wene inoba 'bigik, kokhik, mothogon hagasigin meke werek o,” iluk, at iki baga 'biluk, ane oko igidek huk aga lageikhe.

²⁴ Nit ninobabut weak hagakhe lagagu meke iti, akhuni watlatluk yi meke ti meke hagakharek dek iti hak, nit weak meke here'isalok, niniluk dogolik Allah akla warlok meke hagakhe dogoagaluk, nit weak hagakhe lagagu meke korogo, at Kristus oba 'bakhasikhemo, ebe o baga meldiluk wakhukha iti. At ebe li'bik-la'bakhogon wakhukha iti baga, hit hanothinakhikhe iti.

²⁵ Hit alebat, domba holak nuk asi lagarek iti hak, nuk asi laga lagagip mekeat he, yogotak at Allah nen, ap hinebe hakhisik dogolik thethisik welagarek meke oba hinapuke wokhisik 'binagei agama welagap o.