1 Korintus 9 - ALLAH ANE WENW KET MEKE WAROGO WOKNINAKHIKHE WENE

Allah nen akhuni inayoko 'bisikhe meke tomok hagakhe dogosak wene

¹ An nasokneat welagei dek nogo? At Allah nen nayoko 'biluk la'ani ageikhe dek nogo a? Ninoe Etagapogot Yesus ebe an nileken higidek nogo a? Ninoe Etagapogot nipisak hunik dogoligat ayabu hagakhi meke, hinebe welagap iti dek?

² It akhuni aperek nen an hasik ekhe dogolik, “At Paulus Kristus nen ayoko 'bigidek o,” iluk isi halok he, hit nen, itithogon usak dek. An nayoko 'biluk la'ani ageikhemo wagagi iluk, hit hinebe ninoe Etagapogot hinom hunik welagap iti baga ekagat hutdanusak o.

³ Akhuni nen nabok weak isi korlek, an nen oko yigithogon yogeisekhe lagei,

⁴ “An Allah ayabu hagakherek iti hasik, niki oko hipiri woknikhik, i woknikhik, hagakhunem, horlausak dek nogo a? Horlausagat o.

⁵ Nen, it ap aperek Allah nen inayoko 'biluk la'isa ageikhe meke inom, ninoe Etagapogot agarumi oporlik meke inom, at Kepas inom, inagugi wogosik liliogei iti hak, an anek he, nage Allah a'but meke wolok nekhe dogosak dek nogo a?

⁶ E a, at he, it iti yabu waganhidek werlegat werek korlek, an Barnabas nipisak ninarligat anek yi meke ti meke niniki baga nen thet walogo here'isausak apegep?”

⁷ Ap tentara inougi koktek nen inagarumi wim yabuogoluk inayoko 'bisinem, it inekaerek nen iniki oko heago yakharek nogo a? Dek o. Nen, it aperek nen anggur ai ya'iluk nen, eken ikhunem aperek inekaerek nekarek dek nogo a? E a, at he, it aperek inako domba doalegat herogo dogolik irlak apusu aperek inekaerek nekarek dek nogo a? Nekaregat o.

⁸ An wene igi iti, nit akhuni nen hagakhorek meke oba lisogon igi mekeat he, ebe Allah nen wene ninasuk wakhikhe meke etnogo baga iti ipisak tak-tagat igidek nogo. Isikhemo nenat igi o.

⁹ Wene Allah nen ninasuk wakhikhe wene etnogo baga, at Musa nen yogeisekhe dogolik, men isikhe, “Gandum eken meke sapi kulok isok nen wuleleken warogo eken yibiluagaluk 'biluk nen, eken aperek at noak nen ape herle tetnokhogon wakhup o,” iluk isikhe iti, at Allah nen sapi iti etaiken hunik nen isikhe nogo? Dek o.

¹⁰ Nit akhuni nen yabu waganhik, eken palhik, hagakhe dogolik, “An ageikhe nigin o,” iluk inakla arleken akhekhe dogolik yabu waganhik, eken palhik, hagakhorek iti nen, wene iti nit ninobasigat isikhemo holal waganek werek o.

¹¹ Ai yakharek hak, wene hinetaikenma yakhugu iti o. Nen, ebe itasu hak, hit nen yi meke ti meke agat oba meke woknisaumo, iti doalegat a? Dek o. Erlogat woknisausak mekeat o.

¹² Hit nen, it aperek meke itithogon wogeisausak erlogat halok he, nit ebe iteerek meke aperek woknisausak dek nogo a? “Woknisausak erlogat o,” iluk yogeisekhe lagei. Itithogon mekeat he, nit aperek woknisoagaluk ekhe lago dek. Hano wene Kristus hagakhikhe wene iti, nit nen yogeisilik lagunem agolak palunogo iluk, yi meke ti meke aperek woknisausak iluk igidek ninobakhanini hapugutdiluk here'isekhe lago.

¹³ It ap Allah ai halek iteerek dogolik yabu etoma hagakhe dogolik, inapiri re, Allah aila meke nekarek iluk, hinokodek nogo? Nen, Allah ako waritluk hetu hunekharekma oba hunekhe dogolik itithogonat ebelake palogo it nekarek iluk, hinokodek nogo?

¹⁴ Iti hagat, at ninoe Etagapogot nen ninasuk wakhe dogolik, “It akhuni nen hano wene yogeisilik lagunem, it aperek nen hano wene iti alisikhogon inapiri melageisausagat o,” iluk isikhe iti o.

¹⁵ Itithogon isikhe mekeat, an nen hano wene alisikhogon itithogon waganhidek welagarek. An hasik itithogon woknisuagaluk wene yi holal waganogo la'i agei 'buk. An itithogon woknisuagaluk hagakhidek welagei iluk hogorakhekhe lagei meke yi, at ageikhe nen nane degetdusak he, na'it. An nebe watlasumo, hano.

¹⁶ Hano wene yogeisilik nekherek iti, yogeisausak mekeat yogeisilik nekherek iti nen hogorakhausak motok dek o. Yogeisigidek kamotdumo, eiye. An nebe weka hagatnabusakma o.

¹⁷ An itithogon yogeisilik nekhe lagei iti, an nakla nen kagalogo yogeisilik nekhe dogolema, niki oko woknikhunem, waganhe dogole o. Meke re, an nakla nen kagalhidek werekma, Allah nen nayoko 'biluk iteerek 'banhikhe iti nen oko dek yogeisilik lagarek iti.

¹⁸ Halok he, an niki oko nena meke woknisusak? Iti ebe yi. Oko woknisu hak, hano wene iti oko dek werlegat yokhisilik nekhe dogolik, nakla hano welagei iti o. Itithogon yogeisugunem, oko woknisusak tak-tak mekeat, itithogon aperek woknikhunem waganhidek welagarek iti hano.

¹⁹ An he, akhuni inatuaneke welagei 'buk. Nasokneat welagei mekeat he, akhuni inebe doalegat Kristus hasik woginabigiluk, akhuni tha'bokhogonat inatuaneke atluk nekherek o.

²⁰ Akhuni Yahudi meke Kristus hasik woginabigiluk an nobabut Yahudi meke inobabut waganogo hagakhe lagei. Nen, akhuni wene Allah nen ninasuk wakhikhe wene at Musa nen yogeisasikhe meke etnogo, an nen holek dogosak dek mekeat he, it aperek holek welageikharek meke Kristus hasik woginabigiluk, an nobabut wene iti nasuk holek welagarek meke thalek hagakhe lagei o.

²¹ Nen, it aperek wene Allah nen ninasuk wakhikhe wene at Musa nen yogeisasikhe meke iti, inasuk holharek dek meke aperek Kristus hasik woginabigiluk, an nobabut wene iti holhidek thalek welageiat o. Iti an wene Kristus nen ninasuk wakhikhe wene iti holek motok dogolik, wene Allah nen ninasuk wakhikhe wene iti an holhidek welagarek 'buk. Holek welagaregat o.

²² It akhuni inetaiken aban meke Kristus hasik woginabigiluk an nobabut netaiken aban meke thalek welagei. It akhuni tha'bokhogonat inobabut hagakharek tomok hagakhe lagei iti, it meke aperek tilinabigiluk itithogon hagakhe lagei o.

²³ An it akhuni tha'bokhogonat inobabut itithogon waganogo hagakhe lagei iti, it ninom hano meke iteerek asuogoluk hano wene iti hasigat hagakhe lagei o.

²⁴ Tha ae 'busuk werek tha ae 'busuk werek luogoluk, inebe lugun meke iti inebe tha'bokhogonat lageikharek mekeat he, opakiat anek tak lalokma oko hano meke wogokharek iluk hinokodek nogo? Iti hagat, oko hano meke wokhisoagaluk, pirlirli hinobatnerogon laga dogono o.

²⁵ Inae dek asunogo iluk, yi meke ti meke here'isalok inekaerek nen inebe karelegarek iti. It nen, kare-kare ibat weak asigin mekeat wogeisoagaluk karelegarek iti. Meke re, nit nen weak asigin dek meke woknisoagaluk yi meke ti meke hasik karelekhe lago.

²⁶ Iti nenat, an laga lagei iti, koma ligin iluk, yugunat laga lagei 'buk. Nelokhe morat hurli bagaat laga lagei o. Iti hagat, akhuni iniki dikilogo at ageikhe nen ageikhe wakhik, ageikhe nen ageikhe wakhik, hagakhe dogolik alomarogo werlekma inakharek dek iti hak, an we yugunat hagakhe lagei 'buk.

²⁷ It akhuni aperek hano asuagaluk hano wene yogeisilik nekhe lagei mekeat he, nekaerek here'anumo nuk asunogo iluk, nekaerek nen nebe warau hak, netaiken nobatnerogon thebeligik, akhuni inapma dogolik inane holek welageikharek hak, an nebe nane apma dogeigiluk nasuk warigik, hagakhe lagei o.