1 Korintus 8 - ALLAH ANE WENW KET MEKE WAROGO WOKNINAKHIKHE WENE

Kaneke ako hasik warekharek wene

¹ Hit nen he, “Kaneke ako wakharek iti, wene erlo yigithogon iluk ninilu anek,” egethep iti, nit hutdogo. Meke re, wene itithogon inilu dogolik, inekaerek nen hogorakhegarek mekeat he, akhuni inebe inakmu dogolik hagakharek anek he, inetaiken horlerinakharek iti.

² At ageikhe nen apekhe dogolik, “An wene arat nilu,” iluk apiliogo mekeat, at hutukhogon ilu asusak mekeat he, aban okodek dogolik iliogo o.

³ Itithogon mekeat he, at ageikhe nen, Allah ebe etaiken hunik halok he, Allah nen ap iti ebe ilu o.

⁴ Kaneke ako wakharek iti re, kaneke agat oba meke yoma ebe dek mekeat, iluk ninilu. Ninopase Allah ebe opakiat. Ageikhe motok dek o.

⁵ It akhuni yoma nen ekhe dogolik, “Nit he, ninopase oba ninetaiken hakotdiluk welagorek ninausa meke yiat o,” iluk pogot oba meke hasik inom, agat oba meke hasik inom, iliogei iti. Itithogon egarek iti, inausa meke doalegat werekma, etaga werek doalegat werek o.

⁶ Itithogon mekeat, nit ninopase Allah ebe opakiat. Ageikhe dek. Yi meke ti meke tha'bokhogonat at nen walhasikhemo ninebe at hasigat welago. Itithogonat, ninoe Etagapogot Yesus Kristus ebe opakiat o. Yi meke ti meke tha'bokhogonat Allah nen walhasikhe iti, ebe at Yesus nen walhasikhesik, ninebe at oba nenat niniluk welago.

⁷ Meke re, wene iti akhuni tha'bokhogonat inilu 'buk. It aperek alebat inetaiken kaneke oba hakotdiluk dogolik hogorakhe lagoukhasimo nogo nen, yabokane wam kaneke ako warek meke karlelek neke dogolik, oba eberiogei. Inetaiken akut dogolik nasinem, inakla weak agarek.

⁸ Yi meke ti meke nekarek meke iti nen Allah oba woknisik ligin dek o. Nit nikidek kamotdigun halok, nuk asugun dek. Nen, nugun halok he, ageikhe thaburagun degat.

⁹ Hit yugunat nausagat mekeat he, nukunem nen, it akhuni aperek inetaiken akut meke weak asunogo iluk, hinobabut hebelogo dogono.

¹⁰ Hat ageikhe nen, wene iti hilu dogolik o wam kaneke ako wakharekma ukiluk hebe hurek latluk nigin halok he, at ageikhe etaiken akut meke nen ileken healok akla nen, “An ageikhe niginat o,” iluk akla kagalasigin dek nogo a? Akla kagalatluk niginat o.

¹¹ Hat nen, “An wene nilu o,” iluk itithogon hagasigin iti baga, hagarlak ageikhe etaiken aban meke hasik Kristus watlageikhe mekeat he, hat nen weagatdigin iti o.

¹² Hinagarlak lak hinerugi inetaiken aban meke inil damelogo weagarinakhik, inakla kagalhik, hagakhe lagap iti, Kristus ebeat il damelogo hagakhe lagap o.

¹³ Halok he, nekarek meke iti baga nen an nagarlak ebe weagatdinogo iluk, at hasik an wam kaneke ako warek meke karlelek nikidek motok here'isekhe dogogin o.