1 Korintus 7 - ALLAH ANE WENW KET MEKE WAROGO WOKNINAKHIKHE WENE

Humi ap waganek welageikharek wene

¹ Hit nen wene holal waganogo noba la'i agap etnogo, oko yokhisak o. Ap nen, humi waganhidek elege werlegat dogosak hano.

² Mekeat he, param hagakhe dogunogo iluk, ap inagugi tomok waganek welageik, humi inaguni tomok waganek welageik, dogosak o.

³ Inaguni nen, inagugi tomok, nen, inagugi nen inaguni tomok, inom noge ekhe dogosak mekeat noge ekhe dogosak o.

⁴ Nen, humi inebe inekaerek iteerek 'buk. Inaguniat iteerek o. Ap inebe itithogonat, inekaerek iteerek 'buk. Inagugiat iteerek o.

⁵ Halok he, humi ap hinom noge ekhe dogosak iti, pauwakhogon dogogup o. Sembayan ekhe dogouogoluk halok he, men usak, “Elanma hasik werlegat dogouok,” iluk wenekak hinom iluk nen, sembayan ekhe dogoluk nen, yabokane hinom dapukhogon dogono. Hinetaiken thebelusak erlok dek iti nen, Iblis nen hinakla kagalunogo iluk, hinom dapukhogon dogosak iti o.

⁶ Wene yokhisigi iti, nane obatnerogon yokhisigi 'buk. Weat hinasuk wakhi o.

⁷ Akhuni tha'bokhogonat, an he dek werlegat welagarek hak dogoumo, hano, iluk apegerek mekeat he, at Allah nen ninobabut tomok, at ageikhe obabut ninat, at ageikhe obabut ninat, woknisasikhe iti nenat he, itithogon erlok dek o.

⁸ Hit ap aperek, hinagugi dek meke inom, hit homagarlugi meke inom, humi thoge meke inom, an welagarek hagat dogoumo, hano, iluk yokhisigi iti o.

⁹ Hinetaiken thebelusak erlok dek aga halok he, hinagugi tomok, hinaguni tomok, woginakhe dogono. Hinoba agaken dageisinem yugunat hagasumo weak o. Hinaguni tomok, hinagugi tomok, waganek dogoumo hano.

¹⁰ Nen, hit ap aperek, hinagugi werek meke inom, hit humi aperek hinaguni werek meke inom, an nen hinasuk wasigin o. Meke re, an nen 'buk. Ninoe Etagapogot nen hinasuk wasigin o. Hit humi hinaguni here'isalok nen, dukhugup o.

¹¹ Hat he ageikhe hagun here'isalok dukhegen halok he, ap ageikhe waganhidek werlegat dogono. Werlegat dogosak erlok dek aga halok he, hagun alep meke itiat waganin o. Nen, hit ap meneke, hinagugi lologo here'isugubat o.

¹² Hit aperek hasik, wene ninoe Etagapogot nen igidek meke, an nenat yokhisak o. Hat ap Allah a'but meke nen, hage etaiken Kristus oba hakotdigidek meke waganek welagan meke, at nen he, “Nagun nipisak dapukhogon dogosak,” iluk apekherek halok, hano. Hat nen, hage iti here'isausak motok dek o.

¹³ Hat he Allah a'but meke nen, hagun etaiken Kristus oba hakotdigidek meke waganek welagan meke, at ap iti nen, “Nage nipisak dapukhogon dogosak,” iluk apekherek halok he, hagun iti here'isalok dukhusak motok dek o.

¹⁴ At he Allah a'but meke nen, agun etaiken Kristus oba hakotdigidek meke, waganek ipisak hano dapukhogon welageikharek iti baga, age nen agun ebe Allah hasik 'bisiliogo. Nen, iti hak at ap Allah a'but meke nen, age etaiken Kristus oba hakotdigidek meke waganek ipisak hano dapukhogon welageikharek iti baga, agun nen age ebe Allah hasik 'bisiliogoat. Itithogon inebe Allah hasik 'bisigidek dogolepma re, hina'buri inebe Allah mekeat, itikmanke meke dogolep o.

¹⁵ At ap etaiken Kristus oba hakotdigidek meke iti age here'isekhe halok he, here'isoagat o. Nen, at he etaiken Kristus oba hakotdigidek meke iti agun here'isalok dukhekhe halok he, dukhuagat o. Allah nen he, ninetaiken hapukhogon hano dogoagaluk ninayoko 'bisikhe iti nen he, itithogon hagasugun halok, wene hinoba 'busak dek o.

¹⁶ Hat he yi, hakla nen, “Yabokane nagun tilusak erlok dek asigin,” iluk apekhe lagan a? Nikithogon nen hilu. Hat ap yi hakla nen, “Yabokane nage tilusak erlok dek asigin,” iluk apekhe lagan a? Nikithogon nen hilu.

“Allah nen ninebe tomok ninayoko 'bisikhe tak-tagat hagakhe dogosak,” iluk yogeisasikhe wene

¹⁷ Hit he, Allah nen hinebe tomok hinayoko ''bisinem, ninoe Etagapogot nen, “Hat ageikhe yigithogon dogono. Nen, hat ageikhe itithogon dogono,” iluk yokhisasikhe hagat dogono. Itithogon dogoagaluk an nen Allah a'buri o ya ta natogokharek meke tha'bokhogonat inasuk wakherek o.

¹⁸ At ageikhe oado aperlagap meke arat palek werekma, Allah nen ayoko 'bisikhesik oba nen, yabokane oado palek dek meke negen asigiluk ageikhe hagasusak erlok dek o. Nen, at ageikhe nen, oado aperlagap meke etnogo palek dek werekma Allah nen ayoko 'bisikhesik oba nen, yabokane oado itithogon palusak degat o.

¹⁹ Inoado aperlagap meke itithogon palek dogosak inom, palek dek dogosak inom, iti kok 'buk. Dek o. Ebe kok he, Allah ane hologo hagakhe dogosak itiat o.

²⁰ Akhuni inebe tomok Allah nen inayoko 'bisinem welagoukha hagat dogosak o.

²¹ Hat ageikhe, akhuni inatuaneke werekma Allah nen hayoko bisikhe halok, “An itithogon welagei meke,” iluk, iti hasik wene munini ebekhun o. Yabokane, hasokne 'baguogoluk halok he, “Na'it,” ugun. “It hano,” iluk hasokneat atno.

²² At ageikhe akhuni inatuaneke werekma, ninoe Etagapogot nen ayoko 'bisikhemo ipisak hunik dogolik nen, at agot asokneat agasik werek. Nen, at ageikhe, asokne werekma ayoko 'bisikhemo, ninoe Etagapogot atuanekeat agasik werek o.

²³ Hit hinebe Allah nen oko motok 'bogokhogon palogo wokhinakhikhe iti nen he, akhuni inatuaneke agup o.

²⁴ Halok he, nagarlak lak nerugi. Hit hinebe tomok Allah nen hinayoko 'bisinem welagagip hagat, Allah hinom hunik dogolik itithogonat dogono o.

Ap inagugi dek meke inom, humi inaguni dek meke inom, hasik isikhe wene

²⁵ Wene homagarlugi tharlisik meke hasik, “Itithogon hagakhe dogono,” iluk ninoe Etagapogot nen ninasuk wakhidek mekeat he, wene an nakla apekhe lagei meke yi yokhisak. Nane yokhisagein yi, hit hinakla nen, “Allah nen Paulus ebe akmu nen waganhikhemo obabut hupulik meke nen yoknisekhe iti eberogonat,” iluk hinakla apano o.

²⁶ Nit o yogotak weak welago ya baga dogolik, ninebe tomok welago hagat dogosak o, iluk apekhe lagei.

²⁷ Hit ap aperek nen hinagugi werek meke halok, lologo here'isauwogoluk hagakhup o. Nen, hit aperek hinagugi dek meke halok, humi woginabuogoluk herageinakhup o.

²⁸ Meke re, hit ap nen hinagugi horlegep halok he, iti weak hagakhep iluk usak dek o. Nen, hit homagarlugi tharlisik meke nen hinaguni horlegep halok he, iti weak hagakhep usak degat o. Meke re, woginabiluk nen yi akin ti akin hugun iti nen, itithogon haunogo iluk igi o.

²⁹ Nagarlak lak nerugi. Yogotakne, o ilugun oba asi lagosik welago ya baga dogolik ap inagugi waganek meke iti, waganek dek meke negen dogoak, iluk apigirik nen yokhisigi o.

³⁰ Akhuni aperek de ariogei meke halok, de ariogei dek meke negen dogoak. Nen, it aperek inakla arleken akhiliogei meke halok he, inakla arleken akhiliogei dek meke hakene negen dogoak. Nen, it aperek yi meke ti meke oko palogo horliliogei meke iti, ite ageidek meke negen dogoak.

³¹ Nen,it aperek agat oba yi meke ti meke horlegarek meke iti, horligidek meke negen dogoak. Itithogon igi iti, yi meke ti meke agat oba welagarek meke tha'bokhogonat arat dek arigoo iti nen igi o.

³² Hit he, humi hasik, ap hasik, hinakla wene munini ebekhidek dogobageik nen iluk yokhisigi o. Itithogon igi iti, ap inagugi dek meke nen, ninoe Etagapogot akla hano asuagaluk at kogotdiluk inakla ebekharek o.

³³ Itithogon mekeat he, ap inagugi waganek meke iti, inagugi inakla hano asuagaluk, yi meke ti meke agat oba meke kogotdiluk inakla ebekharek o.

³⁴ Itithogon ebekhe dogolik, inetaiken pere agarek iti. Homagarlugi inaguni dek tharlisik meke iti, inebe inom, inetaiken inom, ninoe Etagapogot hasik dogouogoluk, at kogotdiluk inakla ebekharek iti o. Meke re, it humi inaguni werek meke iti, inaguni inakla hano asuagaluk, it inobasik yi meke ti meke agat oba meke kogotdiluk inakla ebekharek iti o.

³⁵ Wene itithogon yokhisigi iti, wam kupi irlelogo 'begarek hak, “Yi hagasusak dek. Ti hagasusak dek,” iluk wene palhi 'buk. Hit hano asuagaluk yokhisigi o. Halok, hit nen, hinetaiken weat meke oba ebekhidegat, ninoe Etagapogot hasik mothogon hanorogon hagakho motok dogobageik iluk igi.

³⁶ Ap ageikhe nen horlak tharlisik meke ipisak wene warek dogolik, akla nen, “An yigithogon weak welagei. Horlak iti ebe waganigin o,” iluk oba agaken dageikhe halok he, at akla itithogon apekhesikmo, he ebe waganusak o. Waganigin iti weak 'buk. Hano o.

³⁷ Meke re, at ageikhe, akhuni aperek nen akla kagalhunem, ekaerek etaiken opakiat dogolik, ekaerek etaiken nenat thebeldiluk nen, “Dek o. An horlak nipisak wene warek meke iti, itithogon asokneat dogoak,” iluk akla apekhe halok, iti hano motok.

³⁸ Ap nen horlak tarlisik meke ipisak wene warek meke waganhe halok, iti hano mekeat he, waganhidek thogotdekhe halok he, iti hano motok o.

³⁹ It humi inaguni inebe iniluk werek korlek, ap ninat meke ageikhe woginabusak dek o. Inaguni inebe watlago halogat, inakla warlok apiliogei meke woginabusak. Meke re, yugunat meke woginabusak dek. Ninoe Etagapogot inom hunik meke anek woginabusak o.

⁴⁰ Itithogon woginabusak mekeat he, waganhidek werlegat dogoumo, inakla hano motok dogosak apekhe lagei o. Itithogon apekhe lagei iti, Allah Agoreke nakla dogolik apekhe lagei.