1 Korintus 4 - ALLAH ANE WENW KET MEKE WAROGO WOKNINAKHIKHE WENE

“Nit Kristus atuaneke dogolik yigithogon hagakhe lago,” iluk yogeisasikhe wene

¹ Hit nen nit hasik, “It inebe Kristus atuaneke meke, wene Allah akla apekherek wene akhuni agat oba meke inokodek meke yogeisilik nekharek meke,” iluk hutdinanhe dogoni o.

² It ap koktek inameke yi meke ti meke it inatuaneke meke iniki baga dogoagaluk inobabut palogo nen, inobabut hupulik meke halogat 'bisegarek.

³ Meke re, an nen itithogon hagakhunem, hit nen a? It aperek nen a, ekhe dogolik, “At mot hagariogo a? Korlo hagariogo a,” iluk nitema wokneausak, erlok dek apekhe lagei. Nen, an nekaerek nen usak meneke, erlok degat o.

⁴ An nekaerek nen, “Weak ageikhe hagakhidek,” iluk apekhe lagei iti baga, wene noba koragein degat o. At ninoe Etagapogot nen wene noba 'bigik kokhik hagasusak o.

⁵ Iti nen he, wene akhuni inoba 'bigik kokhik hagasigin itinem aban asi ageidek werek korlek, hit wene inoba 'bigik kokhik hagasusak motok dek o. At ninoe Etagapogot ebe witluk nen, hibakone limago hagariogei meke thelekmatdigik, itithogon hagasugun iluk apalok inakla thebelek werek meke iti 'bualogo 'bigik, hagasisigin iti therogo dogosak o. Itithogon 'bualogo 'bisinem, Allah nen hano hagakha meke inebe tomok hogorinabusak mekeat hogorinabigin o.

⁶ Nagarlak lak nerugi. An wene yokhisigi iti, hit aperek nen, “Hit hinoe iti erlok dek meke re, nit ninoe iti anek he, kok,” iluk hogorakhaunogo iluk yokhisigi. Itithogon hogorakhausak dek iluk, men egarek etnogo, “Wene Allah ane holal waganek werek korlek oba dukhogon ageikhe usak dek,” iluk egarek etnogo hutdubageik iluk, nit Apolos nipisak ninoba lisogon yokhisigi iti o.

⁷ “It aperek iti erlok dek meke re, ageikhe iti anek he, kok motok, iluk ekhe dogono,” iluk tha nen yakulhisasikhemo. Hit hinameke yi meke ti meke horlekhe lagap iti, Allah nenat wokhisekherek dek nogo a? At nenat wokhisekherek o. Itithogon wokhisugunem horlekhe lagap mekeat he, hit nen winametdegep meke thalek hinekaerek nen hogorakhekhe lagap iti nenaluk.

⁸ Hit yi meke ti meke arat horlegep higi. Arat kok akhegep higi. Nit kepu werek korlek, hit anek he, hinetagapogot arat akhegep higi. Hit itithogon hinetagapogot atlepma, nit ninomat ninetagapogot dogolo o. Mekeat he, dek o.

⁹ Nit iti, akhuni motok ina'it meke thelekma akhuni inil oba thebeldisalok inekarli warogo inakharek iti hak, nit Allah nen ninayoko 'biluk la'inani ageikhemo wagagu meke iti akhuni inom, malaikat inom, inil oba itithogonat hagatninabiogei o.

¹⁰ Nit Kristus hasik ninebe kepu werek korlek, hit anek he, Kristus hinom hunik dogolik hinakla kagalek welagap higi. Nit erlok dek werek korlek, hit anek he, hinobatne werek welagap higi. Nit inakla erlok degetdinanhe korlek, hit anek, hogothinabiogei higi.

¹¹ Nit o haganeat eloma nen yogotak hurli, hipiri inom, i inom, abuat welagorek. Itithogon dogolik, ninasu degat werekma tugi ninakhe korlek, ninaila dekma, yi ai ti ai lagorek.

¹² Itithogon nekhe dogolik, yi meke ti meke horlauwogoluk, yabu niniki baga nen, ninobatnerogon waganogo horlogorek. Akhuni nen homan 'binanhunem, nit nen inalonerinakhik, yi aik ti aik hagatninakhunem, ninobakhanini hapugutdiluk welageik,

¹³ ninabok weak palhunem, ninane erogat yogeisigik, hagakhorek. Itithogon hagakho korlek, o haganeat nen yogotak hurli akhuni yoma tha'bokhogonat nen, amumuleke horogo ula'isegarek hak, nit itithogonat hagatninakhoat werek o.

¹⁴ An nen holal waganhe lagei yi, hit hinekarli wasigiluk waganhe lagei 'buk. Hit hinebe an ebeat na'buri meke negen nakmu dogolik hinasuk wakhe lagei o.

¹⁵ Hit Kristus hinom hunik werekma, ap wene yakulhisiliogei meke inebe 10.000 doalegat werek mekeat he, hinopase re, doalegat 'buk. Ina'buri itaginakharek hak, an nenat wene hano wene iti yokhisa agagisik Kristus Yesus hinom hunogo 'binagasigimo welagap iti baga, hinopase narligat agagisik welagei o.

¹⁶ Iti nenat, “An nobabut waganini o,” iluk nane obatnerogon hinasuk wakhe lagei o.

¹⁷ Hit an nobabut waganubageik nen iluk, na'but Timotius nekaerek nen itakhi meke hakene ebe nakmu meke hinoba la'i agei iti o. At ninoe Etagapogot ipisak hunik dogolik, at hasik obabut hupulik hagakherek meke hinoba witluk nen, men yakulhisagein, “At Paulus Kristus ipisak hunik dogolik, it Allah a'buri o yi ai ti ai natogokharek meke, at ekaerek hagakherek meke obabut waganuagaluk, yigithogon yakulisekherek,” iluk hinakla eberogo yokhisasigin o.

¹⁸ An hit hinoba wisigin dek thalek, hit aperek hinekaerek nen hogorakhegep iti o.

¹⁹ Itithogon mekeat he, ninoe Etagapogot akla apalok nen, “Hano, lan,” iluk yoknekhe halok he, an hinoba ibat wisigin o. Witluk nen, it aperek hogorakhiliogei meke iti, inane ugun meke nasuk holigin 'buk. Inobatne werek a? Dek a, iluk inobabut paligin o.

²⁰ Iti, “Allah apma welago,” iluk inane baga ugun halok, ekagat agarek 'buk. Inobatnerogon hagakhe dogogun halok, ekagat agarek o.

²¹ Meke re, an hit hinoba tugi wolok wisu hak, witluk, nane obatnerogon yokhisa isusak warlok a? At he, nane erogat hinebe nakmurogo yokhisa isusak warlok a. Hit nen ki hak warlok apegep.