1 Korintus 3 - ALLAH ANE WENW KET MEKE WAROGO WOKNINAKHIKHE WENE

“Ninebe Allah atuaneke welago,” iluk yogeisasikhe wene

¹ Nagarlak lak nerugi. An nen alebageigat, wene akhuni Allah Agoreke inakla werek meke yogeisegarek hak, yokhisigidek o. Itithogon yokhisasigi dek iti, hit Kristus hinom hunekhigisibat, hinobabut hinikhogat dogolik, elege ket itago meke hakene welagagip iti nen, akhuni inobabut itithogon werekma yogeisegarek hak yokhisasigi iti o.

² An nen akhuni inarluetek hipiri a'bet meke wogeisegarek hak, hit wene horle meke waganusak erlok dek iti nen he, wene horle meke yakulhisigidek. Elege ket itago meke inirlak apusu wogeisegarek hak, wene akut meke yokhisasigi iti o. Meke re, yogotakne, itithogonat wene horle meke yokhisausak he, erlok degat welagap iti o.

³ Hit-hirat ua palhik, wene palhik, hagakhe lagap halok he, hinobabut akhuni inobaburat welagap o. Akhuni inobabut inikhogat dogolik hagakharek hak, hagakhe lagap iti nen yokhisigi o.

⁴ Itithogon hagakhe dogolik, hit aperek nen he, “Nit Paulus meke,” igik nen, hit aperek nen, “Nit Apolos meke,” igik, ekhe lagap halok he, hinobabut he, akhuni inobaburat welagap o.

⁵ At Apolos iti tha nogo? Nen, an Paulus tha nogo? Nit iti ninoe Etagapogot nenat akla apalok ninayabu tomok hagakhe dogoagaluk ninayoko 'bisikhemo nen, at atuaneke welago. At atuaneke dogolik, wene yakulhisasugumo, hinetaiken Yesus oba hakotdisigip iti o.

⁶ Wene iti, hipiri ai yakharek hak, an nen yakhigi. Nen, at Apolos nen, i tialik lageikhe. Nen, ebe, at Allah nenat kogotdisikhe.

⁷ Ebe kok etaga werek he, ai yakharek meke iti 'buk. I tialik lagarek meke iti 'bugat. Kok etaga werek he, Allah nen ebe kogotdekherek itiat anek etaga werek o.

⁸ Ai yakharek meke iti, i tialharek meke iti, nipisak tak-tak mekeat, niniki oko, ninebe tomok yabu hagakhe dogogun meke tak-takhogonat woknisagein o.

⁹ Hit hinebe iti Allah ayabu hak werekma, nit nipisak nen Allah ayabu wo'isekhe lago. Ageikhe hinebe Allah ai halek hak werekma, nipisak nen Allah ai halogo 'bisekhe lago.

¹⁰ At Allah obabut hano nen nayoko 'bisikhemo, o iti herlaga re, an netai ekerlek meke nen 'bisigimo, it aperek nen oba dukhogon haliogei iti o. Meke re, akhuni inebe tomok, o herlaga iti baga dukhogon haluogoluk halok he, hutdiluk nen inetai ekerlogo halusak o.

¹¹ At Allah nen, “O iti herlaga, Yesus Kristus itiat dogoak,” iluk 'bisikhe iti nen he, at ageikhe nen, o herlaga ninat meke usabusak motok dek o.

¹² O herlaga iti usabek werekma, oba dukhogon it aperek nen oko kok palogo, emas meke halhik, perak meke halhik, helekit eken permata meke halhik, haliogei. Itithogon halhe korlek it aperek nen o meke halhik, o ket eka meke halhik, puk eka meke halhik, haliogei iti.

¹³ Itithogon halho werekma, at Kristus yabokane wisigin itinem, akhuni nen o halha meke tomok hano a? Weak a, iluk, hetumo walhasinem, ekagat thelekma agunem hugun o.

¹⁴ Itithogon walhugunem at ageikhe nen o herlaga iti baga halhe meke hetu nikidek dogogin halok he, oko wogosigin o.

¹⁵ Itithogon mekeat he, at ageikhe nen o halhe meke, hetu neke hanok, o hali nasinem inebe karelogo 'bisa lageikharek hak, at o halhe meke iti ebe anek he, karelogo 'bi ligin mekeat he, oko nuk asigin dek o.

¹⁶ Nit ninebe Allah ai halegat, iluk hinokodek nogo a? Allah Agoreke ninakla ai halogo welagarek, iluk hinokodek nogo a?

¹⁷ Hit hinebe, at Allah ai halek welagap iti, at mekeat welagap o. Halok he, hit nen Allah ai halek iti weagatdumo, at nen hit weagathinabiginat o.

¹⁸ Hinekaerek nen hinebe dalugup o. Hat ageikhe nen, “An akhuni yoma inawene meke nakla kagalek o,” iluk apekhe lagan halok he, hakla ebe wene iti kagalasuak nen, akhuni inawene iti hakla abit asuak o.

¹⁹ Akhuni agat oba meke nen, “Nit akhuni ninawene ninakla motok kagalek,” iluk apiliogei halok he, Allah nen, “Inakla abit werek o,” iluk apekherek. It ap Allah ane holal waganogo 'bekhe lagoukha meke nen, “'Bagei herle 'bilukmo ukisinem kerokhogon wakherek hak, it akhuni agat oba meke yoma inakla kagalek thalek dogolik nukhetdisiliogei iti baga, kerelagunem, Allah nen weagarinabigin werek o,” iluk holal waganogo 'bisukha.

²⁰ Nen, wene ageikhe yi, “It akhuni inakla kagalek meke nen inakla eberiogei iti, we yugunat alomarogo eberiogei o, iluk ninopase Etagapogot ilu,” iluk holal waganogo 'bisukhama weregat.

^21-22 Halok he, an Paulus nebe inom, at Apolos ebe inom, Kepas ebe inom, o agat oba yoma tha'bokhogonat inom, iniluk welageikharek iti inom, watlageikharek iti inom, o yogotak ya welageikharek meke inom, yabokane hagatlasigin meke inom, etoma ta'bokhogonat, hit iteerek iti nen, hit nen he, “An noe iti o,” iluk akhuni meke hasik hogorakhugup o.

²³ Hit hinebe iti, iteerek, Kristus at o. Nen, Kristus ebe iteerek he, Allah at o.