1 Korintus 14 - ALLAH ANE WENW KET MEKE WAROGO WOKNINAKHIKHE WENE

Allah Agoreke nen wogeisugunem inane inokodek meke elalinat igik, wene pakhogon yogeisigik, egarek wene

¹ Hinobabut akhuni inebe inakmu welageikharek iti meke hinobatnerogon yakulhe dogono. Yakulhe dogolik, Allah Agoreke nen inobabut tomok wogeisekherek wene iti iteerek asubageik nen, hinobatnerogon hagakhe dogono. Hagakhe dogolik, Allah ane pakhogon yogeisegarek meke iti meke wokhisoagaluk, kogotdino o.

² Tha nen inane inokodek meke elalinat ekherek iti, Allah Agoreke akla dogolik wene limago meke ekherek iti nen, akhuni yogeisiliogo dek mekeat he, at Allah yogokhunem, akhuni aperek nen hutdegarek dek o.

³ Itithogonat meke re, at tha nen Allah ane akhuniat pakhogon yogeisugunem, inetaiken ago wakhik, inasuk wakhik, inetaiken thebelhik, hagakherek iti o.

⁴ Meke re, at inane inokodek meke elalinat ekherek meke iti, at ekaerek etaiken ago warekherek o. Meke re, at ageikhe Allah ane akhuni pakhogon yogeisekherek meke iti anek Allah a'buri natogokharek meke tha'bokhogonat inetaiken ago watdisekherek o.

⁵ Akhuni inane inokodek meke elalinat egarek iti 'bugurlagat erlok dek negen meke re, Allah ane akhuni pakhogon yogeisegarek iti anek, kok motok negen. Iti nen hit hinebe tha'bokhogonat akhuni inane hinokodek meke elalinat umo an warlok mekeat he, ebe hano motok, hit nen Allah ane pakhogon yogeisekhe dogosak itiat warlok o. Meke re, inane hinokodek meke elalinat ugun halok he, yabokane Allah a'buri aperek inetaiken ago warinabuogoluk, hit hinane baga mothogon umo anek he, hano.

⁶ Nagarlak lak nerugi. An yabokane inane ninokodek meke elalinat yokhisa agei halok he, iti baga hanothinabusak nogo? Wene Allah akla meke pakhogon igidegat, wene nilu meke yokhisigidegat, Allah ane yokhisigidegat, wene hutukhogon yakulhisigidegat, halok he, hanothinabusak nogo?

⁷ Yi pikon ti pikon witabo inom gitar hakene meke inom, aborlok dek meke ane anegethasinem, ane ekherek mekeat, ane kut asokhotek tomok igidek halok he, “I, ane iti meke ekhe,” iluk nikithogon hutdusak nogo. Erlok dek o.

⁸ Akhuni wim luogoluk amitmit egarek hak, pikon ageikhe ane kok ekherek meke iti, ane kut nil-hilhogon ekhe halok he, “Yogo, yogotak wim yabuogoluk higi,” iluk hutukhogon hutdigidek tha nen obabut hibil-hebelhogo hagasusak nogo. Erlok dek o.

⁹ Iti hagat hit nen inane hinokodek meke elalinat ekhe dogolik, hinape baga nen wene thekekhogon igidekma, wene iti nikithogon hutukhogon inilu asusak. Erlok dek o. Oka herleka yogokhe dogosak o.

¹⁰ Agat oba yi akhuni ti akhuni inane tomok doalegat werek apigi. Meke re, inane iti yugunat egarek 'buk. Thekekhogon isinem hutdusak anek o.

¹¹ Itithogon mekeat he, it inane kut palekma an nokodek halok he, at ageikhe nen isinem, an nen nasuk nikithogon holusak. Nen, an nane isinem, nane kut palekma, at nen nane nikithogon asuk holusak. Erlok dek o.

¹² Halok he, Allah Agoreke nen inobabut tomok wogeisekherek meke iti wokhisoagaluk hinakla warlokhogon hagakhe lagap mekeat he, Allah a'buri inetaiken ago watdisausak meke halok kokhogon wokhisoak nen, itiat kogotdino.

^13-14 It aperek inane an nokodek meke baga elalinat sembayan ekhe dogolik, netaiken oba nen ekhe lagei mekeat, ebe hutdekhe lagei motok dek iti nen, at ageikhe nen it aperek inane okodek meke baga elalinat ekherek meke iti nen ekhe dogolik, “Allah nopase. Inane inokodek meke iti an nekaerek nane baga mothogon yogeisekhe dogeik nen, hat Hagoreke nen inobabut wogeisekherek etnogo meke ageikhe woknisuak o,” iluk sembayan ekhe dogoak o.

¹⁵ Halok he, an nikithogon hagasik. Yigithogon hagasigin. Sembayan iti, Allah Agoreke nen yoknekhe korlek inane nokodek meke baga elalinat igik, ninekaerek ninane baga ninetaiken hutdiluk nen igik, igin o. Nen, etai iti Allah Agoreke nen yoknekhe korlek inane nokodek meke baga elalinat wakhik, ninekaerek ninane baga netaiken hutdiluk nen wakhik, hagasiginat o.

¹⁶ Iti hagat, hat ageikhe nen Allah Agoreke nen yokhekhe korlek inane hokodek meke elalinat ekhe dogolik, “Allah nopase,” iluk heagei wasigin halok he, at ageikhe okodek meke nen hutdigidek dogolik, “Wene ekhe iti ebeat asuak,” iluk u hak, “Amin,” iluk usak nogo? Wene hat igin iti, at okodek nen, itithogon usak erlok dek iti o.

¹⁷ Halok he, hat nen itithogon Allah heagei hanorogo wasigin meke re, at iti etaiken ago watdigin nogo? Dek o.

¹⁸ Inane inokodek meke elalinat egarek iti, hit nen herlekha'bugat egethep. An anek he, doalegat egerek iluk, “Allah nopase,” iluk heagei wakherek o.

¹⁹ Meke re, an Allah a'buri ninom natogorlek dogolik wene yakulisagaluk, inane nokodek meke elalinat doalekhogon 10.000 hakene igidek, hutdusak meke nane herlekha'bugat 5 baga anek umo hano iluk yogeisegerek.

²⁰ Nagarlak lak nerugi. Wene hinakla ebekhe lagap iti, yekerugi inakla ebekharek hak ebekhe dogogup. Keritago meke nen weak hagakho inokodek welageikharek hak dogolik, hinetaiken inarlue inetaiken hakene horlerogon dogono.

²¹ At ninopase Allah Etagapogot nen ninasuk wakhikhe wene baga wene ageikhe men isikhemo holal waganek werek, “An nen akhuni yoma, wene it aperek inane kut palek meke inane baga yogeisigik, it aperek huso meke inape baga yogeisigik, igin o. Itithogon yogeisagein meke re, inasuk holugun dek o,” iluk isikhemo holal waganogo 'bisukha.

²² Wene Allah Agoreke nen yogeisugunem inane inokodek meke baga elalinat egarek iti, akhuni inetaiken Allah oba hakotdiliogei meke iti hutduagaluk egarek 'buk. It aperek inetaiken Allah oba hakotdigidek meke iti nen hutduagaluk itithogonat egarek o. Meke re, Allah Agoreke nen wogeisugunem, Allah ane pakhogon yogeisegarek iti, inetaiken Allah oba hakotdigidek meke hasik 'buk. It inetaiken Allah oba hakotdiliogei meke nen hutduagaluk yogeisegarek o.

²³ Hit Allah a'buri opakimo natogorlek dogolik, hinebe tha'bokhogonat nen inane hinokodek meke baga elalinat isinem, it wene inokodek meke inom, inetaiken Allah oba hakotdigidek meke inom, hinoba ukitluk, it nen, “Yoma hunu-hunu ageikhasik iliogei o,” iluk yokhisagun dek nogo? Yokhisagunat o.

²⁴ Itithogon mekeat he, hit hinebe tha'bokhogonat nen, Allah ane pakhogon isinem, at ageikhe etaiken Allah oba hakotdigidek meke inom, wene okodek meke inom, hinoba ukitluk, at nen men usak, “Eiye. An weak hagakhima wene noba werek higi o,” iluk akla apasinem,

²⁵ at akla limago meke 'bualasigin. 'Bualagunem obabut isonhogo at ebe thoma iluk Allah hogoralkhe dogolik, men igin, “Eberogonat Allah hinom welagap o,” iluk yokhisagein o.

Allah a'buri natogorlek dogolik hagakhe dogosak wene

²⁶ Halok he, nagarlak lak nerugi. Nikithogon hagakhe dogosak. Yigithogon hagakhe dogosak o. Hit hinebe natogotdiluk, at ageikhe nen Allah aetai isa igik, at ageikhe nen wene thekekhogon yakulhisigik, at ageikhe nen Allah akla wene yokhisigik, at ageikhe nen wene inane hinokodek meke baga elalinat isinem, at ageikhe nen hit hinane baga mothogon yokhisigik, hagakhe dogolik, Allah a'buri inetaiken ago warogo yi wene ti wene tha'bokhogonat erlogat itithogon ekhe dogosak o.

²⁷ It aperek nen, inane inokodek meke baga elalinat uogoluk halok he, inebe pere a? Henagan a, umo hano. Pere nen pere dek. Meke re, eran-alep isinem, at ageikhe nen hit hinane baga mothogon yokhisekhe dogosak hano.

²⁸ Meke re, at ageikhe hit hinane baga mothogon yokhisausak meke ebe dek halok he, it inane inokodek meke elalinat egarek meke iti, Allah a'buri natogorlek werekma etoma inane degat dogosak. Inane degat dogolik, inakla nen Allah at yogokhe dogoak o.

²⁹ Nen, Allah ane yogeisegarek meke iti inebe pere nen a? Henagan nen a, yokhisausak. Itithogon yokhisekhe korlek, hit aperek nen, wene mot iliogo igik, korlo iliogo igik, obabut palhe dogosak o.

³⁰ Itithogonat meke re, Allah nen at ageikhe hurek welaga meke wene akla kagalhe halok he, yokhisoak nen at alep yokhisekhe laga meke iti, ane dek huk asusak o.

³¹ Iti hagat hinebe tha'bokhogonat nen wene yakulogo hinilu ageik, hinetaiken kagouk igik, hagasuogoluk hinebe tha'bokhogonat opakitek opakitek eran-alep Allah ane pakhogon yogeisekhe dogosak o.

^32-34 At Allah yugunat-yaganat hagakherek meke 'buk. At he, mothogon anek hagakherek iti nen, it ap Allah ane yogeisegarek meke iti, wene yogeisekhe dogoagaluk at Agoreke nen inobabut wogeisekherek meke iti ite atluk dogolik, inekaerek nenat, “An yigithogon yogeisak, tigithogon yogeisak,” iluk ekhe dogosak o. Wene Allah nen ninasuk wakhikhe wene etnogo baga holal waganogo 'bekhe dogolik, “Humi inane degat inapma dogosak,” iluk isikhe iti nen, Allah a'buri o yi ai ti ai natogotdiluk welageikharek hak, hit hinebe natogorlek dogolik, humi inane degat dogosak o. Inaneak walhe dogosak dek o.

³⁵ Meke re, it humi nen wene ageikhe yakuluogoluk halok he, Allah a'buri natogorlek werekma, inaneak walusak dek iti nen, inaila lalok inekaerek inaguni inoba hinok waganusak o.

³⁶ Allah ane o yi ai ti ai liliogo iti erlo hit nogo? E a, at he, hit hasik anek hinoba yokhisa agoukha nogo a.

³⁷ At ageikhe nen, “An nen Allah ane yokhisoagaluk, Allah Agoreke nen nobabut iti woknekhemo,” igik, e a, at he, “Ninat meke hagasuagaluk woknekhemo,” igik, ekhe halok, at nen, “Wene Paulus nen ekhe iti, ninoe Etagapogot nen ninasuk wakhikhe meke, holal waganogo ninoba la'i aga iti,” iluk at hutdiluk waganuak o.

³⁸ Meke re, wene iti waganhidek here'isekhe halok he, hit nen ap iti ebe waganhidek here'isekhe dogono.

³⁹ Yogo. Nagarlak lak nerugi. Allah ane pakhogon yogeisekhe dogouogoluk kogotdiluk hinobatnerogo hagakhe dogono. Meke re, it aperek nen inane inokodek meke elalinat uogoluk ega halok he, wene palusak dek o.

⁴⁰ Meke re, yi wene ti wene mothogon igik, hanorogo igik, ekhe dogono.