1 Korintus 11 - ALLAH ANE WENW KET MEKE WAROGO WOKNINAKHIKHE WENE

¹ An Kristus obabut waganogo hagakhe lagei hak, hit nen he, an nobabut waganogo hagakhe dogono.

Humi inasu inukuloak oba dakulik dogolik sembayan ekhe dogosak wene

² Wene yi meke ti meke hasik an noba ebekhe dogolik, an yakulnikhukhama hit yakulhisasigi meke herogoat welagap iti nen hogothinakhe lagei o.

³ Itithogon mekeat he, wene opakiat agekhe yi hinilu asusak meke apekhe lagei. Nit ap ninebe tomok, ninoe Etagapogot Kristus metek werekma apma dogosak. Nen, humi inebe tomok inaguni kok metek werekma inapma dogosak. At Kristus iti opase kok Allah metek werekma apma welagarek o.

⁴ Ap inebe tomok inukulasu thalogo nen akhuni natogorlekma sembayan igik, wene yogeisigik, hagariogei halok he, Ninoe Etagapogot ekarli wasu hagat hagariogei.

⁵ Nen, humi inebe tomok nen, inasu inukuloak oba dakulhidek dogolik akhuni natogorlekma sembayan igi, wene yogeisigik, hagariogei halok he, inekaerek nen inaguni tomok inekarli wasu hagat, hagariogei. Itithogon hagariogei iti re, inisi tha'bokhogon palekma hagasu hagat, hagariogei itiat o.

⁶ At he ageikhe nen asu ukuloak oba dakulusak a'it halok he, isi palumo re. Humi inisi inukuloak oba 'berorogon palhik, hotnokhogon palhik, hagakhunem inekarli halok nen, inasu inukuloak oba thalumo hano.

^7-8 Erlo baga nen, ap inebe erloat, humi 'buk. Humi erlo ap iti nen, ap inebe Allah hogorakharek meke ebe hakene, amukhak hakene, iluk, inukulasu thalusak dek. Meke re, humi inaguni hogorinakharek meke inamukhak hakene.

⁹ Allah nen humi hasik, ap winametdisikhe 'buk. Ap hasik he, he winametdisikhe o.

¹⁰ Iti nen, it humi it malaikat Allah nen yoko usa'isa agarek meke emenogo inil oba dogolik inaguni tomok inane holek welago u hak, inasu inukuloak oba dakulogo dogosak o.

¹¹ Itithogon mekeat he, ninoe Etagapogot ninom hunik dogolik, humi ap dekma inasokne welageik, ap nen, humi dekma inasokne welageik, dogosak dek.

¹² Erlo baga, Allah nen he, humi ap meke waganogo winametdisikhe iti hak, ap inebe humi nen itaginakharek. Meke re, yi meke ti meke tha'bokhogonat, erlo Allah at o.

¹³ Nagarlak lak nerugi. Wene yi hinekaerek hinakla ebetni. Humi su inukuloak oba dakulhidek dogolik, akhuni inebe natogorlekma sembayan usak nogo?

^14-15 Ap he, inisi uatek werekma, inekarli agarek meke re, it humi re, inukuloak laberogo dogoagaluk Allah nen inisi uatek wogeisasikhemo werekma, “Inisi hano,” iluk akhuni nen hogorinakharek, iluk he, hinekaerek hinakla nen apegethep dek nogo?

¹⁶ Meke re, it aperek nen, iti hasik wene palusak werek halok he, nit inom, Allah a'buri o yi ai ti ai natogokharek meke inom, ninat hagakhidek, itithogonat hagakhorek anek.

“Ninoe Etagapogot oba eberek dogouogoluk eken apusu hanorogon neke dogosak,” iluk yakulisasikhe wene

¹⁷ An nen, wene yi hinasuk wakhe dogolik, hogothinabusak dek meke ageikhe werek o. Hit hinebe natogokhe lagap iti baga, hano ariogo 'buk. Weak ariogo o.

¹⁸ Hit wene alebageik yokhisagein apigi yi. Akhuni nen, “It Allah a'buri Allah ai halekma natogotdiluk, it-it inebe hurli wariogei o,” iluk yoknekhama wene iti nasuk holhirik, aperek eberogonat hagariogeima iluk apigi o.

¹⁹ Itithogon hagakhe lagap iti, at Allah nen, “It iti an na'buri,” iluk apiliogo meke, ekagat asuak nen, hinebe hurli wasusagat apigi.

^20-21 Meke re, hit ninoe Etagapogot oba eberek dogolik, eken apusu nuogoluk opakimo natogotdiluk, hinapiri tomok, hinagei tomok, horlalok, “An tak nigin,” iluk nilik lagunem, it aperek dek meke abuat huk ageik, it aperek apusu doalegat nalok hunu-hunu ageik, hagakhe lagap iti, ninoe Etagapogot apiri nikik, agei henago nikik, neke lagap 'buk.

²² Hit itithogon hagakhe lagap iti nenaluk. Hipiri nikik, apusu nikik, hagasusak he, hinai halek dekma? E a, Allah a'buri hinom natogokhe lagap meke hinakla nen erlok degetdisigik, inameke dek meke inekarli asuagaluk hagakhik, hagakhe lagap a? An wene nikithogon meke yokhisagein. Hogothinabigin a? Dek o. An wene yi hasik hogothinabigin dek o.

²³ Wene itithogon hagakhe dogosak hasik, ninoe Etagapogot nen yakulnikhikhemo, an nen hit yakulhisasigi iti o.

²⁴ Ninoe Etagapogot Yesus ap inobabut weak meke nen wasuagaluk, ap ageikhe nen hibako yoko lageikhe itinem, at Yesus nen hipiri roti meke ikimo waganhikhesik, Allah heagei warogo, kutdiluk nen men isikhe, “Hipiri yi an nebeat o. An hit hinobasigat nasugun iti noba eberek dogobageik nen, yigithogonat hagakhe dogono,” iluk agarumi wogeisasikhe.

²⁵ Itithogon wogeisasikhemo arat nasukhama nen, isoak eken apusu henago itithogonat ikimo waganhikhesik nen, men isikhe, “Namep ulabogo watlasigin iti baga Allah nen wene ket warogo wokhinabigin iluk isikhe etnogo, namep henago ebe yi o. Halok he, yigithogon neke dogolik, yabokane an noba eberek dogobageik nen, yigithogonat neke dogono.”

²⁶ Hipiri roti meke yigithogon nikik, eken apusu henago yigithogonat nikik, hagakhe dogolik, hit nen, “Ninoe Etagapogot itithogon wakhukha o, iluk wene iti it aperek yogeisau hak, yigithogonat neke dogono. Itithogon nasi werekma, hurli, an wisigin iti hurli nen dek asigin o,” iluk isikhe.

²⁷ Tha nen ninoe Etagapogot oba eberek dogolik, apiri nikik, agei henago nikik, nausak dek meke dogolik neke halok he, ninoe Etagapogot ebe hasik, amep hasik, wene oba 'bigin werek o.

^28-29 It aperek nen, at Ebe hutdigidek dogolik hipiri iti meke nikik, eken apusu iti meke nikik, neke dogolik, inekaerek nen wene inoba 'bakhiliogei iti nen, hit hinebe tomok hinekaerek nen hinobabut palano. Itithogon hinobabut palalok nen, hipiri iti meke nikik, eken apusu iti meke nikik, hagasusak o.

³⁰ Itithogon inobabut paligidek niliogei iti nen, inebe doalegat u hunhik, inobatne dek ageik, hagakhe korlek, it aperek watlariogei iti o.

³¹ Meke re, ninekaerek nen ninobabut palogo nasi halok he, Allah nen wene ninoba 'bigin dek o.

³² Itithogon mekeat he, at Allah nen, “It iti akhuni itikmanke meke inom dapukhogon wene inoba 'biluk weagarinabusak iti erlok dek o,” iluk, at nen ninobabut palogo nen ninasuk wakherek.

³³ Iti nenat, nagarlak lak nerugi. Eken apusu itithogon nuogoluk halok he, akhuni hit meke aperek inebe aban wageidek halok he, therisik dogono.

³⁴ Hit hinebe natogorlek werekma, wene hinoba asunogo nen, hit aperek nen hipiri abu halok he, hinaila nalok nen wisusak o. Nen, wene ageikhe an nebe wagei halok nen moretdigin o.