1 Korintus 1 - ALLAH ANE WENW KET MEKE WAROGO WOKNINAKHIKHE WENE

Heagei warinakhikhe wene

^1-2 Hit Allah a'buri o Korintus natogokhe lagap meke, nagarlak lak nerugi. An Paulus Allah akla apasikhe baga, Kristus Yesus nen nayoko 'biluk la'ani ageikhe meke etnogo, ninagarlak Sostenes nipisak nen, wene yi holal waganogo hinoba la'i aga iti o. Hit o Korintus meke Allah nen hinayoko 'bisikhemo ninoe Kristus Yesus hinom hunik werekma, Allah nen, “It yi an na'buri o,” iluk hinebe at ekaerek 'bakhasikhemo welagap o. Itithogon dogolik, akhuni o yi ai ti ai etoma nen, it inom, nit ninom, ninoe Etagapogot Yesus Kristus etaga paliogei meke hinom tha'bokhogonat wene yi holal waganogo hinoba la'i ago iti o.

³ Ninopase Allah, ninoe Etagapogot Yesus Kristus ipisak inobabut hano etnogo nen, hano meke wokhisigik, hinetaiken hapugutdinageigik, hagakhe dogoak o.

Allah nen Yesus alisikhogon hano hagatninakherek wene

⁴ Allah obabut hano nen, Kristus Yesus alisikhogon, hano meke woknisekherek iti nen, hibiku-yogoku heagei wakho motok welagarek o.

⁵ Hit Kristus hinom hunik werekma Allah nen hinebe hano meke wokhisekhemo welagap. Itithogon dogolik, yi wene ti wene Allah ane iti erlo hinilu motok agasip nen, wene hano motok yakulisekhe lagap o.

⁶ Wene iti Kristus hagakhikhe wene yokhisasigimo hinakla nen waganhigisip hinetaiken horletdisigip o.

⁷ Hinetaiken itithogon horletdiluk, ninoe Etagapogot Yesus Kristus thelekmaat wisigin iluk, therogo dogolik Allah nen woknisekherek meke iti, ageikhe aban waganhidek welagap 'buk. Tha'bokhogonat waganhigisip welagap o.

⁸ Yabokane ilugun oba ninoe Etagapogot Yesus Kristus wisigin itinem, hit weak werekma 'bithisa wisunogo iluk, at Kristus nenat hinetaiken horlethinakhe dogogin o.

⁹ At Allah nen a'but ninoe Etagapogot Yesus Kristus hinom hunik dogobageik iluk hinayoko 'bisikhe iti. Itithogon, at obabut hupulik meke nen hinayoko 'bisikhe iti nen, ebeat asigin iluk hinetaiken wene munini tirliphogon dogosak o.

“Allah a'buri meke inebe mikirlusak dek,” iluk isikhe wene

¹⁰ Itithogon mekeat he, nagarlak nerugi. Ninoe Etagapogot Yesus Kristus etaga baga, wene ageikhe hinasuk wasik. Hit tha'bokhogonat hinebe mikikhidek hinom hunik dogolik nen, hinane opakiat meke igik, hinetaiken opakiat welageik, hinakla nen wene opakiat meke ebekhik, hagakhe dogono.

¹¹ Nagarlak lak nerugi. Wene itithogon igi iti, akhuni he Kloe werekma nen wageikhasik, men ega, “It-irat wene yabiogei o,” iluk pakhogon yoknisi ageikhama nen yokhisigi o.

¹² Wene ebe, men ekhe lagap iti hasik igi. Hat ageikhe nen, “An Paulus meke,” isinem, hat ageikhe nen, “An Apolos meke,” igik, hat ageikhe nen, “An Kepas meke,” igik, hat ageikhe nen, “An Kristus meke,” igik, hinane asokhotek tomok ekhe lagap iti nen igi o.

¹³ At Kristus iti ebe mikirlogo asokhotek hagatlagama nen a? E a, at he, hit hasik an Paulus nebe o baga meldaniluk nakhukhama nen a? E a, at he, an Paulus netaga palogo nen ima usa'inagasukhama nen a?

¹⁴ Dek o. An nen hit aperek ima usa'inagagidek apigi. Ap Krispus inom, Gayus inom, eta anek ima usa'isasigi iluk Allah heagei wakhe lagei o.

¹⁵ Akhuni nen, “Paulus ekaerek etaga palogo ima usageinakhikhe,” iluk inogo iluk, inebe eta anek usageinakhigi iti o.

¹⁶ I! An nen Stepanus a'buri inom ima usa'isasigimoat apigi. Itithogon mekeat he, it aperek inom usa'isasigi a? Dek a. An nokodek.

¹⁷ At Kristus nen, an nen akhuni ima usageinakhe dogoagaluk la'ani ageikhe 'buk. Dek o. Allah ane hano wene iti yogeisilik nekhe dogoagaluk la'ani ageikhe. At ebe o baga meldiluk wakhukha etnogo alomatlasunogo iluk, an akhuni inawene meke kagoukhogon egarek iti hakene ekhe dogoagaluk la'ani ageikhe dek o.

“Allah awene kagalek wene, Yesus ebe itiat o,” iluk yogeisasikhe wene

^18-19 It akhuni nuk asugun meke nen, men egarek, “Yesus o harokhogon wakhukha wene iti, akhuni kepu meke nen egarek hakene iliogei o,” iluk egarek iti. Itithogon mekeat he, at Allah nen, “Akhuni inakla kagalek meke nen wene kagoukhogon egarek iti, an nen nonhonetdisagein o. Nen akhuni yi wene ti wene erlo inilu hagakharek meke iti, an nen degetdisagein o,” iluk isikhemo, holal waganogo 'bisukhama werek iti nen, nit tilninabiogo meke nen, “Wene iti, Allah obatne itiat o,” iluk ogorek.

²⁰ Akhuni agat oba yoma inakla kagalek meke iti inom, akhuni yi wene ti wene erlo inilu meke iti inom, akhuni wene oko-oko ekhe dogolik inane obatne ageikharek meke iti inom, we yugunat werek o. At Allah nen, “Akhuni inawene inakla kagoukhogon egarek meke iti, akhuni inetaiken abisake meke nen egarek hak iliogei o,” iluk isikhe dek nogo?

²¹ At Allah akla motok kagalek iti nen, men isikhe, “Akhuni agat oba meke nen, inekaerek inawene kagoukhogon egarek iti nen, an nebe inilu asusak erlok dek o. It aperek nen wene ebe wene yogeisilik lagunem, it akhuni agat oba meke nen apekhe dogolik, Wene iti akhuni kepu meke nen egarek hakene iliogei, iluk isi korlegat, it aperek nen, Wene iti eberogonat, iluk apagun meke halok, an nen tilinabiginat o,” iluk oba la'buk iluk ekaerek nenat isikhe.

²² It akhuni Yahudi meke nen ekhe dogolik, “Wene hutdusak he, elalin meke ageikhe hagatni o,” igik, it akhuni Yunani meke nen, “Wene hinakla kagoukhogon ageikhe yoknisani o,” igik, iluk egarek mekeat

²³ nit anek he, Kristus o harokhogon oba meldiluk wakhukha wene etnogoat yogeisekhe lago. Yogeisugunem, it akhuni Yahudi meke nen, “Wene iti weak,” iluk kolelogo herek'isigik, nen, it akhuni itikmanke meke nen, “Wene iti, akhuni kepu meke nen egarek hakene iliogei,” iluk here'isigik, iliogei o.

²⁴ Itithogon mekeat he, it akhuni Yahudi meke dek, Yunani meke dek, Allah nen inayoko 'bisikhe meke nen, “Allah obatne Kristus ebe itiat o. Nen, Allah awene kagalek wene, Kristus ebe itiat o,” iluk hutdiliogei.

²⁵ At Allah awene mekeat, it akhuni agat oba meke nen, “Wene iti, akhuni kepu meke nen egarek hakene,” iluk egarek mekeat, at Allah akla motok kagalek o. Nit akhuni ninawene meke ninakla kagoukhogon ogorek iti, ninakla abisake meke nen ogorek o. It akhuni agat oba meke nen, “At Allah erlok dek,” apegarek mekeat, at obatne horleak o. Nen, nit akhuni nen, “Ninobatne horleak,” apogorek mekeat, erlok dek o.

²⁶ Nagarlak lak nerugi. Hinebe nikithogon werekma Allah nen hinayoko 'bisikhe. Hinakla ebetni. Akhuni hit meke inakla kagalek meke inom, inobatne horleak meke inom, koktek inetaga werek meke inom, inebe doalegat inayoko 'bisikhe 'buk. Dek o.

²⁷ At Allah akla nenat, it akhuni agat oba meke inakla kagalek meke iti, inekarli wasigiluk akhuni nil-hilhek mekeat wenago inayoko 'bisikhe. Akhuni inobatne werek meke iti, inekarli wasigiluk, it erlok dek meke wenago 'bisalok inayoko 'bisikhe iti o.

²⁸ At Allah akla nenat, akhuni agat oba meke nen hogorakhe dogolik kogotdegarek meke iti, degetdisagaluk, it akhuni agat oba meke inakla nen, “It iti inebe kepu meke, motok ina'it meke, inetaga dek meke,” iluk apegarek meke iti, Allah nen wenago 'bisalok inayoko 'bisikhe.

²⁹ Iti nen, nit akhuni ninekaerek nen Allah il oba hogorakhausak erlok dek o.

³⁰ At Allah nenat hit Kristus Yesus hinom hunik dogobageik iluk 'binageikhemo welgap iti. Wene ninakla kagalek dogou hak, Yesus ebeat woknisasikhe. Itithogon woknisasikhemo, at nen Allah ninom yabokane ninapuke dapulogo 'binanhik, ninebe Allah hasik 'binanhik, tilninakhik, hagakherek.

³¹ Iti nenat, Allah ane holal waganogo 'bekhe dogolik, “At ageikhe hogorakhagaluk halok, ninoe Etagapogot itiat hogorasuak o,” iluk isukhama holal waganogo 'bisukha.